#الفصل_السادس_و_الأربعون
#صراع_الحب_و_الكبرياء
#يحليوه العشك مريود
اريد العافيه بعطرج
شايل عقل مال شيوخ
بس السالفه من اتيه
ارد الكاها يم خصرج
يلوموني من احبج ليش
وعلي لو حاضر السياب
عاف اقبال ويعشكج ♡
HaneenAli733
......
ست ساعات قضوها بين طريق و زحمة سيطرات إلى أن وصلوا لأربيل، وقت الغروب كان .. و هي حيل تعبت بالطريق، قضتها مرة نوم و مرة سوالف إلى أن خلص الطريق ...
نزلوا بالفندق الي حاجزين بيه مسبقاً .. دخلوا، و مجرد ما استكشف المكان نزل يجيب لهم أكل، و هي أخذت حمام دافي، و وية طلعتها دخل للغرفة يضحك عليها ..
- شبيك ليش تضحك ؟!
- لج هاي شلابسة ؟!
- شنوو، باردة والله ..
ابتسم،
- و البردان اكو تدفئة، كهربائية يشغلها،
و سحبها عليه،
- و اكو تدفئة بشرية ...
دفعته متمنعة،
- لالا حبيبي، احنا نعتمد على التدفئة الذاتية ...
صدحت ضحكاته و هو يعصرها بحضنه و يكَرص خدودها باثنين ايديه و يردد،
- اااخ يابة شلون خدود تشهي عض ...
فلتت نفسها من ايده ردت بنظرة من طرف عينها،
- ترى عيب ...
رفع ايده و مبينة النية شتيمة، و دفعته للغرفة،
- روح بدل يلا خل نتعشا و ننام، مو وكتها تكَوم تقسّم ...
و هو من داخل الغرفة يتوعد لها،
- اني الج اصبريلي ...
رتبت الأكل على الطبلة و كَعدت تنتظره، كل شوية تنقش من التمن شوية بس ظلت بعيدة عن الدجاجة حتى ما يبين ماكلة منها .. شوية و طلع لها ينشف بشعره، نزل الخاولي لجتفه و هو يكَول،
- شكو تنتظرين يابة، اكلي ...
و هي كاتمة ضحكتها عنه،
- ليش تضحكين ؟!
و مد راسه يباوع للصحن من جهتها و صاح،
- أيااا ...
و رفع نظراته المشاكسة،
- يلا بالعافية ...
ضحكت و بلشت أكل و هي ترد،
- والله جوعانة، و الريحة تشهي، و انت تأخرت ...
- بالعافية حبيبي بالعافية ...
خلصوا عشاهم، و من تعب السفر ناموا مباشرةً ...
الصبح كَعدت على تحرشاته، يمشي أطراف اصابعه على وجهها، دفعت إيده متمللة و هو يهمس،
- مو كافي نوم ؟!
دارت وجهها متمللة و رجع تقرب عليها يواصل همسه،
- توتة .. ما شبعتي نوم ؟!
- لااا، عوفني انام بعد ...
- ليمتى بعد ؟! صار لج فوكَ العشر ساعات نايمة، و مناك كَضيتي الطريق نوم، تنبل ولج ؟!
ردت بانزعاج و هي تبعد شعرها عن عيونها،
- شنو تحسب لي ساعات نومي ؟!
أنت تقرأ
صراع الحب و الكبرياء
Romanceظلم تعرض له جيلين من الأبناء على يد الجد .. فرق إبنه عن زوجته، و كانوا ضحايا ظلمه ثلاث أشخاص .. زياد، سميّة و وطن ... و عاود كرّة ظلمه على حفيدته بعد سنين بزواج إجبار من ابن عمها الأكبر ... هي .. عنيدة، ذات كبرياء ... و هو .. يحمل نفس الدماء، عنيد،...
