Dream

25

"Bakit may ball night nanaman, Sir?"

Pag rereklamo ng mga classmates ko nang ideklarang may gaganapin na ball night para sa Valentines Day. Lahat sila nag rereklamo dahil gastos namaman daw, e graduating na nga kami.

"Swerte niyo nga e, kayo  ang sa batch niyo ang may ganyan... Pwede niyo naman suotin ulit ang mga damit niyo nung students ball night, tsaka sa gymnasium lang ang venue. Kayong mga graduating students lang din ang kasali." Pagpapaliwanag pa ng instructor namin.

Ayun naman pala, para sa aming mga graduating lang yung event. Ganon na lang siguro ang gagawin ko. Isusuot ko na lang ulit yung gown ko nung nakaraan para hindi na bumili ng bagong damit. Saglit lang din naman gagamitin.

Nag aayos na ako ng gamit nang lumapit sa akin si Yara at Olive. Absent si Anya ngayon kaya kaming tatlo lang ang pupunta sa canteen.

"Hassle naman... Pano tayo makakapag focus sa finals nyan, e kung lahat tayo excited na next week?" pagrarant ni Olive habang pababa kami ng hagdan.

"Buti nga walang gastos e, recycle out fit lang. Tsaka biglaan, kaka-announce lang tapos next week na agad." sagot sa kaniya ni Yara na naka hawak sa braso ko.

Hindi na ako nag salita tungkol sa usapan nila dahil okay lang naman sa akin kahit ano. Gusto ko na lang enjoyin ang lahat ng ganap sa school dahil next year wala na kami dito.

Umupo kami agad nang may makitang bakanteng lamesa si Olive. Siya na rin ang umorder ng pagkain namin dahil sabi niya ay libre niya. Maraming estudyante sa canteen ngayon dahil lunch break, buti nga at nakakita agad si Olive ng mapupwestuhan kaya hindi na kami nahirapan.

"Kamusta sa bahay niyo? Nalaman ba nilang sinaktan mo ang sarili mo?" tanong bigla ni Yara sa akin. Marahan akong ngumiti sa kaniya bago ko isinandal ang ulo ko sa balikat niya.

"Syempre hindi... Wala rin naman akong balak ipaalam pa yon." sagot ko. Dalawang linggo na din ang nakalipas, kaya okay na yon. Wala rin naman mangyayare kung malalaman pa nila.

Tsaka para saan pa? Simula din naman ng bumalik si Daddy sa Spain, naging busy na ulit si Mommy sa shop. Si Ate Reese at Hershey naman, lagi na ulit naka kulong sa mga kwarto nila.

"Bat hindi mo sabihin? Nagkakaroon ka ng panic attack tapos sila yung trigger. Dapat malaman nila yon." inis na sabi niya. Ngumiti ako kahit hindi niya nakita yon.