ဆယ်မိုင်မြေမှချစ်ပုံပြင် [Completed]

37

Unicode

ပိုင်ချင်းက လက်ခံပြီးလိုက်သည့်နောက်တွင်တော့ သူမသည် မိုယွမ်ပြောသောနည်းလမ်းကိုလိုက်နာကာ သူမ၏နှလုံးသားအား မီးစာအဖြစ်အသုံးပြုလေတော့သည်။
သူမ၏လက်အား ကျီရန်၏နှလုံးသားရှိရာတွင် တင်လိုက်သည်။ ထို့နောက် သူမ၏အစွမ်းအချို့ ဖြင့် မီးငြိမ်းနေသောဖီးနစ်နှလုံးသား၏အလယ်ဗဟိုသို့ သူမ၏နှလုံးသားကိုထည့်ကာ မီးစာအဖြစ်ကျွမ်းလောင်စေတော့သည်။
ရင်ဘတ်ပေါ်သို့တင်ထားသောလက်ဖျားမှစ၍ သူမတစ်ကိုယ်လုံး ပူလောင်လာသည်ကို ခံစားလာရသည်။ ခန္ဓာကိုယ်သည် တဖြည်းဖြည်းချင်းဖြင့် အရှိန်ဟုန်ပြင်းပြင်းတောက်လောင်နေသောမီးပုံထဲသို့ ကျရောက်နေသကဲ့သို့   ခံစားလာရသည်။ နှလုံးသားအပိုင်းအစများအား လောင်ကျွမ်းနေသည်ဖြစ်၍ ရင်ဘတ်မှလည်း လွန်စွာနာကျင်သောဒဏ်ဖြစ်ပေါ်လာသည်။ တစ်ကိ်ုယ်လုံးနာကျင်နေသော်လည်း သူမသည် တစ်ချက်မျှပင်မငြီးငြူဘဲ တောင့်ခံကာနေလေသည်။
ဝေဒနာများကိုမေ့လျောပြီး သူမစဉ်းစားနေမိသည်က အမှန်တရအချို့••••။ မက်မွန်ပန်းကမ္ဘာထဲတွင် သူမတို့နှစ်ယောက်ကတိပြုသစ္စာဆိုကာ လက်ထက်ခဲ့ကြသည့်နေ့ရက်များ၊ နေမကောင်းလျှင်စိုးရိမ်ပေးတတ်ပြီး သူမလိုကလေးတစ်ယောက်အား အဖော်လုပ်ပေးခဲ့သောနေ့ရက်များ၊ သူမအားအန္တရာယ်ထဲမှ အကြိမ်ကြိမ်ကယ်ပေးခဲ့သည့်နေ့ရက်များ…။ နေ့ရက်များစွာ၏ပုံရိပ်တို့က သူမ၏စိတ်အာရုံထဲတွင် လျင့မြန်စွာပေါ်လိုက်ပျောက်လိုက်ဖြင့်ပင်..။
မီးတောက်သည် သူမ၏နှလုံးသားတစ်ခုလုံးနီးပါးကို ပြာကျအောင် လောင်ကျွမ်းပြီးသည့်အချိန်တွင်တော့ သူမ၏အစွမ်းများက တဖြည်းဖြည်းယုတ်လျော့လာကာ အင်အားချည်နဲ့လာပြီး ခန္ဓာကိုယ်ကပြောင်းလဲလာသည်ကို သတိပြုလာသည်။ ယခင်ကနက်မှောင်နေခဲ့သော၊ ရှည်လျားလှသောသူမ၏ဆံပင်သည် အဖျားမှစ၍ ဖြည်းဖြည်းချင်း အဖြူရောင်သို့ပြောင်းလဲသွားသည်။ ဝိုင်းစက်နေသောအနက်ရောင်မျက်လုံးအိမ်က အမှောင်ထဲတွင်ပင်ထိုးဖောက်မြင်နိုင်အောင် ကြောက်စရာကောင်းစွာ တောက်ပနေသောအပြာရောင်သို့ ပြောင်းလဲသွားသည်။ နုနယ်စိုပျိုလှသောအသားအရေတို့က သွေးများခမ်းခြောက်သွားသကဲ့သို့ ဖြူဖတ်ဆုပ်လျော်သွားသည်။ မြေခွေးနှလုံးသားသည် ခန္ဓာကိုယ်၏မီးဓာတ်ကို ထိန်းပေးရသောအဓိကအစိတ်အပိုင်းဖြစ်၍ ထိုအစိတ်အပိုင်းကလောင်ကျွမ်းသွားသော်အခါ တစ်ကိုယ်လုံးရေခဲတမျှအေးစက်သွားပြီး အအေးဓာတ်ဖြင့် လွှမ်းခြုံသွားသည်။
သူမ၏ခန္ဓာကိုယ်ပြောင်းလဲသွားသည်ကို သူမကိုယ်သူမခံစားမိသည်။ ယခင်က နှစ်လိုဖွယ်ရုပ်ရည်အသွင်အပြင်ရှိသောသူမသည် ယခုအခါတွင်တော့ ဆံပင်ဖြူဖြူ၊၊အသားဖြူဖတ်ဖတ်၊ မျက်လုံးအပြာရောင်ဖြင့် ကြောက်စရာကောင်းသောအသွင်ဆောင်နေသည့် မကောင်းဆိုးဝါးတစ်ကောင်ကဲ့သို့ ပြောင်းလဲသွားလေတော့သည်။