قصة بالدارجة المغربية🌹تحت عنوان🌹:#مصير عاشقين🔞

💞📝 بارت 70 📝💞

طبيبة كدوز لاباراي: هاهوا شفتيه باقي صغيور مي راه باين مبروك عليك راك حاملة
هنا أحلام شافت ففراح و فراح تاهي شافت فيها بجوج مصدومين فراح عينيها غرغرو
أحلام شدات فيها و حولات تبين لوضع عادي : الله إبارك فيك احم واش بصح حاملة
طبيبة : اه هاهوا و عندها شهرين و شي ايام و صحتو مزيانة
وقفات و عطات كنينيكس لفراح: هاكي باش تمسحي اجيو معايا
فراح باقا مصدومة و غير كتفكر فهاد مشكيل حطات ليديها على كرشها و تماشات هي وأحلام جلسو و بجوج مصدومين و غير أحلام لي كدوي
طبيبة: مهم حاولي ردي لبال لصحتك و كولي مزيان و حاولي متعصبيش و لا تتوتري و انا غنكتب ليك شي ڤيتامينات باش يعاونك
فراح حركات أراسها و أحلام نطقات: شكرا بزااف
طبيبة: اه متهزيش تقل و بان ليا نتي مجاوكش أعراض لحمل
فراح بتساؤل: بحالاش
طبيبة: بحال ردان و دوخة و سخفة
فراح: دوخة كتجيني فصباح بزااف و سخفة ملي كنعيا اما ردان فراه مكيجينيش
طبيبة: مزياان احسن حاجة اه و بالنسبة لوحم افراح ايجيك معطل يعني ناس كيتوحمو تلت شهور لولة من بعد كيحبس كيولي قليل نتي تا غتولي عندك تلات شهور عاد اتولي توحمي
أحلام بإبتسامة: شكرا بزااف ادكتورة
طبيبة: عادي مرحبا غير كل مرة خاصها تقابل صحتها و صحة لجنين
كتبات ليهم طبيبة ڤيتامينات توادعو و خرجو من عندها تاوحدة ما كتدوي مع لاخرى بانت ليها أحلام واحد فارماسيان مشاو خداو دوا و خرجو شدو طاكسي ركبو بعد ما قالو ليه لبلاصة فين غادين
حطهم طاكسي فدرب سلطان و لكن ماشي فدربهم حطهم حدا واحد لقهوة دخلو ليها و هما ساكتين جا عندهم سرباي خداو داكشي لي بغاو و جلسو كل وحدة و فاش كتخمم تا نطقات أحلام
أحلام: اش غنديرو دبا
فراح نطقات بصوت مغنغن: معرفتش مي شكون باه راني عمري نعست معا شي حد و الله
أحلام شدات ليها فليدها: انا تايقة فيك مي مفهمتش كيف جا و منين حملتي
فراح: معرفتش والله
أحلام بإستسلام: فراح خاصنا نقولوها لأدم حيت نتي عارفة شوية غتولي كرشك باينة
فراح بتوتر: الى قلتيها لأدم سيف الدين ايشوف كرشي ايقتلو غيتحاب ليه نعست مع ادم
أحلام نتفات شعرها : و الى قلناها لسيف الدين غيتحابك ناعسة مع شي حد أخور و يقتلك نتي
فراح بدات كتبكي: رااه عيت اأحلام علاش من دون ناس انا لوحيدة لي مامكتابش ليا نعيش هانية عمرك شفتي هادي شي وحدة عمرها نعسات مع شي حد تا كتفيق و تلقا راسها حاملة و مشكيلة اساسية تا باه معارفاهش شكون ناس كيتلفو كيكونو ناعسين مع بزااف و مكيعرفوش شكون باه فيهم انا لعكس عمري نعست مع شي حد مي شكون باه الله و أعلم
أحلام شافت فيها مطولة شوفة شافت تاعيات و نطقات: خصك طيحيه
هاد جملة بدات خلات قلبها يتزير عليها شافت فيها بنفي: منقدرش نقتلو الى كان مكتاب ليه إيموت فراه تنموت انا قبل منو
أحلام خرجات فيها عينها: ودبا حنا اش نديرو عندك شي حل أخور راك نتي معرفاش سيف الدين اش يقدر إدير ليك
فراح بحزن: مكيهمش اش ايدير ليا قد ما كيهمني ميتخلاش عليا
شافت فأحلام بحزن: كنبغيه أأحلام منقدرش نعيش بعيدة عليه
أحلام بقات فيها كتشوف شحال من موصيبة نزلات ليها على راسها ومع دالك متسطاتش: هانتي اول حاجة حاولي متبيينش انك حاملة حمد الله لوحم مغاديش ابداك دبا و تاني حاجة انا انجبد لهضرة مع أدم غير بالفن و نشوف واش عمرو قرب ليك واخا بلغلاط
فراح بنفي: ادم كنتيق فيه لواحد درجة لي كبيرة ميمكنش إديرها
أحلام شافت فيها بشك: كيبقا راجل أفراح ، و الى دارها
فراح شافت فيها شوفة مجموع فيها جدية و لحزن: عمرو باقي يشوف كمارتي
أحلام : اصلا الى كان هو ماشي غير كمارتك لي عمرو باقي ايشوفها راه كمارة بشار كلو حيت سيف الدين ايخسر عليه جنوية وحدة ،و انا شفت سيف الدين درجة هوس ديالو بيك تالين وصل
فراح شافت فيها بخوف : عافاك هادشي خاصو يبقى بيناتنا تانشوفو شي حل واخا
أحلام غمضات عينيها بإطمأنان: كوني هانية مهم كولي نتي مزيان على قبل لجنين و حاوليي متعصبيش صافي
فراح اومأت ليها و بداو كياكلو واخا تا وحدة معندها نفس ديال لماكلة مي فراح بزز منها خاصها تاكول و أحلام من نوع لي الى توترات ولا تعصبات كتبرد غدايدها فلماكلة
سالاو ماكلتهم و وقفو خارجين بعد ما خلصو متوجهين لدار
وصلو لدار و دخلو ،فراح دخلات عند نادية لي جالسة فلكوزية كتوجد لعيد و أحلام وقفات حدا أدم فصالون
أحلام شافت فأدم و جلسات: توتوز اش خبار إسراء
أدم شاف فيها: واش باغا شي حاجة خاصك شي حاجة اقولي نعطيك بلا ديك دخلة
أحلام صغرات عينيها: يااه غير لي بغا يجلس مع أصلك
ياله اتنوض تا جرها عنقها: وراني اضاحك معاك ،فين وصلتو مريم
أحلام بجدية: اه راه وصلناها و من بعد ضربنا دورة و رجعنا
أدم : اه اوى مزيان
بقاو ساكتين مدة و هي تنطق أحلام: أدم وليت كنشك فيك تكون بارد
هنا أدم تصدم حيت هاد لكلمة معروف عليها اش كتعني مي هو قال مع رساتو امكن كتقصد غير لبرد لاخور
أدم مصغر عويناتو: وراه بطبيعة الحال حيت صيف بدا كيخرج
أحلام شافت فيه بجدية: مكندويش على لبرد كندوي على حاجة خرى
هنا هو خرج عينيه بصدمة: من نيتك
أحلام رجعات شعرها مورا ودنيها: داوية بصح واش زعما فراح ديما حداك و كتنعسو فدار وحدة واش زعما عمرك غرك شيطان
أدم ضربها لقرفادتها تا توعتات و جوبها حيت اصلا مولفين بعضياتهم كيدويو فهاد مواضيع : من نيتك كين شي شيطان قدك ،اصلا مستحيل نشوف فيها شي شوفة راه حاسبها مرت خويا ماشي مرتي
أحلام نطقات: واش عمرك نعستي حداها بلا كدوب
هنا أدم سرط ريقو و توتر : احم علاش هاد سؤال
أحلام شافت فيه مصغرة عويناتها حيت شافتو توتر: بلا كدوب ا أدم اصلا غير كنسول
أدم كيحاول ميشوفش فيها: بصراحة اه نعست حداها مي غير مرة و هي محال واش عاقلة
أحلام هنا خرجات عينيها: امتى هادشي
أدم شابك ليديه مع بعضياتهم: عقلتي نهار مرضات لينا واحد نهار فليل مبغاتش تنزل ليها سخانة و بدات كتدخل و تخرج فلهضرة اوى داك نهار هي كان عند بالها انا سيف الدين و مبقاتش بغات تطلقني فإضطريت نعس حداها و فصباح فقت قبل منها باش منحرجهاش
أحلام هنا بحال إلى صرفقتيها: واش ملي مرضات قبل من شهرين دبا
أدم حك راسو بتوتر: اه هداك نهار
هنا أحلام بدات كتبلع فريقها و كطلب من ربي ميكونش هادشي بصح و هو بات لولد: وموقعات تاحاجة بيناتكم ياك
هنا ادم مجوبهاش حدو وقف و نطق و هو مكيشوفش فيها: بزااف أ أحلام هادشي على أسئلة
و ماجات فين تجاوبو تا خرج و خلاها هي فدوامة ديال أسئلة و تخيلات مي اول سؤال جا فبالها "واش هو باباه "
و اول تخيل جا فبالها هو سيف الدين كيقتل فأدم
بقات ساهية فتخيلتها و أفكارها و كتفكر فشي حل لهاد موصيبة حيت ضروري خاصها تعرف واش هو نعس معاها حيت لحالة لي كانت فيها فراح ديك لمرة تقدر تقتل و متعقلش بقات سارحة بتفكيرها لشي حل و من جيهة اخرى تا فراح كتعاون نادية و هي ساهية و كطلب من ربي إعونها فهاد إبتلاء لي تبلات بيه

كيف هاد الأيام لي دازو كلهم غير ساهية و كتفكر فموصيبتها لي من نهار عرفات راسها حاملة نعاس مكتنعسوش مزيان ما بغاتش تفهم ليها كفاش حملات
و تا أحلام ماشي قل منها تاهيا بحالها و ديما كتحول تعرف واش وقعات بينها و بين أدم شي حاجة مي أدم ماعاطيهاش راس لخيط جاتو غريبة هاد أسئلة تا ولا كيشك و لكن أحلام عارفة بلاناتها

اوى واقفين كيوجدو فلفطور ليوما عرافة و كلهم صايميين تا من فراح واخا شداها سخفة مي حالفة تا تكمل نهارها خصوصا مابقا لمغرب غير ربع ساعة واخا طالع ليها دم لي دوا معاها تخنزر فيه وعلاش لا و هما بزز منها دارو ليها لحنة حيت اول عيد ليها و هي عروسة بزز منها نقشات و تا أحلام لمهاوشة نقشات جاتهم زوينة و لكن فراح جن جنونها لحنة غفلوها و صافي
مبقاش بزااف لفطور اي حاجة كينة فوق لبوطة طفاو عليها و لي كينة فشي لعيبة حطوها فطباسل
نادية و فاطمة كيستفو فطباسل و أحلام و فراح كيديو لطبلة واخا أحلام عيات ففراح تجلس ترتاح مي والو تاهي دايرة ليديها
مع سلاو مع تسمع أذان ،لي كان فشي قنت جا خرج أدم و سيف الدين و عمر و تا بدر لي كان فلبيت تماشاو لصالون لقاو كولشي واجد
عمر نطق بإبتسامة: ياله لي ماموضيش إمشي يتوضى باش نصليو
و داكشي لي دارو و لكن أغلبية كانو موضيين ،وقف عمر هو لول ناوي إصلي بيهم و صف من موراه كان فيه بدر و سيف الدين و أدم و عاد صف ديال عيالات من لور كانت أحلام و فراح و نادية و فاطمة
سلاو صلاة بعد ما سلمو و دارو دعاء و وقفو تجمعو على طبلة ديال فطور و باشرو فالأكل بعد ما قالو دعاء الإفطار
لي غير سالاو كولشي عوتاني تشتت من غير لعيالات ،لبنات هربو من ماعن و خلاوهم لفاطمة و نادية بحجة أحلام لي غادي تجفف ملي يساليو
فراح : كون غير غسلناهم و الله
أحلام خنزرات فيهم: فراح راه هادشي ماشي لعب اوه راه خصك تجنبي بزااف لحويج على قبل لجنين راك هلكتيه
فراح حطات ليديها على كرشها: بصح واش كنوقف بزااف كتر من لازم
أحلام حركات ليها راسها بلإيجاب
فراح : ولكن الى مبقيت كندير والو ايعيقو بيا
أحلام خبطات راسها: انا مقلتش ليك ماديري والو نن ديري مي ماشي تقوي فهمتي
فراح كتافات فقط باش تحرك راسها بإيجاب
أحلام نطقات ناوية تخرجها من حزن: ياله نطلعو عندهم لفوق
فراح بتساؤل: عندمن
أحلام: بابا و أدم و سيف الدين و بدر راه كيمضيو لماس على قبل غدا
فراح بلا متسناها تكمل تمات طالعة كيعجبها هاد الأجواء بزاااف
وقفو قدام باب سطح و هما ايموتو خصوصا فراح لي دروج خيبين ليها شوية كانت كطلع درجة و تستراح 10
دخلو عندهم بانو ليهم كل واحد و أش كيدير كان عمر كيوجد لبلاصة فين أيجلسو غدا و بدر كيعمر سطولة و لبانيوات حيت كيما معروف فلعيد يقدر إتقطع لما على غفلة ،اوى و أدم كيوجد لبلاصة فين كيتعلق لحولي و سيف الدين كيمضي فلماس

يتبع....✏️
صدمتكم ياكو🙂 مي الأجزاء جايين اتفهمو كولشي 🙄