قصة بالدارجة المغربية🌹تحت عنوان🌹:#مصير عاشقين🔞

💞📝 بارت 74 📝💞

فراح بنفي: لا غير تفكرت شي حوايج و صافي
أحلام عرفاتها كدوي على باباها حيت راه ولات صحبتها و ولات عارفة علاقتها بباباها كيف كانت ،ديك ساعة عنقاتها و نطقات: الله إرحمو داعاي معاه
فراح تاهي عنقاتها و نطقات بصوت باين عليه لحزن: اميين
سيف الدين شاف أحلام معنقاها عرفها غتبدا تبكي و هو يعيط: فراح أحلام اجيو تصورو راه بغينا نضبحو لحولي
أحلام جرات فراح و مشاو كيتصورو معاه و هاد لمرة سيف الدين لي ضبح لحولي ديال فاطمة اوى ملي بدا كيسلخو أدم بلا ميقصد ضرب سمعو بلموس خلا دم يترش خليو عليكم يوسف لي مكانش حاكم حولي فضبيحة و نزل عليه لگرن لرجل تا تعطب هو دار تلج و كمدها و تلج لي شاط جاو إجريوه هزوه داروه لأدم لصبعو هبطات أحلام بجرى جابت تحميرة داروها لصبعو و لواو عليه واحد توب هادشي كامل برعاية نادية و فاطمة راه ما كينة لا فاصمة لا نمي
أدم نطق و هو مخنوق ماشي من ضربة لا راه منهم كلهم تجمعو عليه تا خنقوه: وا غير طلقوني خليوني نهبط ندير ليها شي لعيبة
نطقات نادية بأمر: تا ريح راه تحميرة مزيانة
أدم: لا ياكما تخلطت ليك انادية مع لحم ديال لحولي
شاف فأحلام و فراح لي كيضحكو و نطق: ربي ما هبطو جيبو بصلة و زيت و طيبوني
ديك ساعة ضحكو كلهم تا من سيف الدين بتاسم من غير نادية لي عاقداهم
نادية :إوى سري انا نيت
ناض أدم باس ليها راسها: هاني صافي امتقلقيش لينا
بتاسمات نادية وتلفتو لعند يوسف لي نطق
يوسف: وعولنا عليك ضبح حولي ديالك بكري
أدم شاد صبعو لي جا فليد ليمنى كينفخ عليه و كينطق : اووف هاهوا عمر ولا سيف الدين إضبحو انا موعت
ديك ساعة كلهم تلفو لجيهة سيف الدين ملي شافوه هز لحولي و غفلو و جابو طايح فلأرض
سيف الدين: وانتوما طلقونا راه مشا لحال
ديك ساعة جا يوسف إشد هو و بدر ،أدم ياله ايحط ليدو شاف فيه سيف الدين بجدية
سيف الدين: وقف نت
أدم شاف فيه بإستغراب: هاني
سيف الدين شاف جيهة لعيلات و باه و رشيد: اجيو نتوما تصورو طلقونا
جاو دغيا تستفو و تصورو و فراح ياله اتمشي تا كتلفت مصدومة ملي سمعاتو نطق
سيف الدين: فراح اجي شدي بلاصة ديال أدم راه موعت
أدم ياله أيدوي تا خنزر فيه سيف الدين و هو يسرط هضرتو
فراح شافت فيه مخرجة عينها: انا
نطق عمر بجدية: ابعد من درية راه موحال مولفة بحال أحلام
نقزات فاطمة نطقات بحزن: راه هي لي كانت كتشد مع لمرحوم راه كتسلخ گاع
نطق عمر بإبتسامة: هاي هاي هاي ياله ورينا حنة ليديك
فراح توترات و بدات كتبلع ريقها
سيف الدين شاف فيها بإبتسامة: ياله اجي دغيا
و داكشي لي دارت جات فراح بين سيف الدين و بدر شدات معاهم غير كبر سيف الدين و دوز على لحولي بعدو كلهم
سيف الدين شاف فيهم بجدية: اوى ياك حوليها هدا اوى هي لي غتسلخو اسيرو نتوما(كيدوي على دراري) غسلو حالتكم
و داكشي لي كان هبطو دراري و تا عمر و رشيد كيغسلو حالتهم و نادية و فاطمة و أحلام بقات كيغسلو فمصارن ديال حولي
و فراح تقدامات هي و سيف الدين كيسلخو او بلأحرى هي لي كتسلخ هو واقف أكيشوف فيها
فراح حبسات و شافت فيه بواحد نظرة قدر إميزها اش كتعني: شكراااا بزاااف
سيف الدين بتاسم بحب و ضرب ليها على نيفها: كوليها ديك شكرا
بتاسمات ليه بحب و كملو سليخهم  و هادشي كلو داز تحت عينين فاطمة مي محكراتش هما لي سالاو سليخ سيف الدين هبط تاهوا يدوش و فراح مشات حدا لعيالات كتعاونهم تا سلاو دغيا هبطو داكشي و بقات أحلام كطلع و تهبط مخلية فراح كتجفف باش متبقاش تطلع و تهبط فدروج
فراح سالات تسياق و هبطات تاهي تدوش لقات أدم هبط لتحت مكينش فدار ،دوشات تاهيا دغيا ولبسات بيجامة صيفية و لاحت عليها زيفها و هزات تيليفونها مشات جيهة صالون و صونات لإسراء بركات ليها و سولاتها على أحوال و قطعات معاها و عودات صونات لإيمان تاهيا دارت معاها نفس شئ ياله اتهبط تا رجعات جلسات دخلات لواتساب و صونات لمريم مكتجاوبش صونات ليها تقريبا 4 مرات والو مجوباتش شوية و هي تصوني لسعد تاهوا مجوبش تشوشات عليهم و عودات صونات ليه لمرة تانية و هو يجاوب و باين عليه لعيا
سعد: الو شكون
فراح عرفاتو جوبها بلا ميعرف شكون: سعدودي صافا
هنا سعد بتاسم ابتسامة باهتة: حبيبتي فراح صافا
فراح عرفاتو ماشي تال لهيه امن صوتو: سعد مالك واقعة شي حاجة
سعد مابغاش إخلعها: لا والو نتوما كي دوزتو لعيد
فراح بجدية: سعد اش واقع واش نت بيخير و مريم صافا
سعد تنهد تنهيدة خارجة من قلب: فراح انا فسبيطار
فراح قفزات بلخلعة: اويلي اش واقع ياكما كاين باس
سعد مسح على وجهو و نطق: بصراحة كنت مناقش مع مريم و خرجت من دار ملي رجعت لقيتها سخفانة و دم تحتها ملي جبتها سبيطار عرفنا راه دارت إجهاض دري مات ليها
فراح هنا حطات ليديها على فمها بصدمة: كفااش
سعد بحزن: فراح انا سبابها مبغاتش دوي معايا من صباح و هي ناعسة ملي كتفيق تعاود تنعس واش صافي وليت مجرم على بالك كنت حاسبو بحال ولدي و الله واخا باقي متزادش
فراح دازو دموعها بقاو فيها مي حولات تهدنو: ششش متقولش هكا نت ماشي سباب راه مقدر ليه إيموت سمعتي ان شاء الله مزال تحمل مريم و غيكون ولدك بصح نيت
هنا هو سكت مجوبهاش
تاهيا كملات على كلامها: سعد راه مريم بنت ناس و ماغاديش تلقا بحالها واخا هي بصح ماشي بنت مي راه كانت طايشة
قاطعها سعد: راه نتي عارفاني اخر حاجة تخليني نتجاهل شي بنت هي بكرة ديالها راه بكرة ماشي هي شرف مي راه
سكت شوية و كمل كلامو: اصلا واخا نبغي نبدا معاها من جديد هي موحال تبغي راه كون تشوفيها شوفة هي لخرى مكديرهاش فيا زائد
فراح قاطعاتو: لا غير حاول راه غير مسكينة مصدومة ماشي ساهل تكوني حاملة بولد مدة ربع شهور تا كتفيق و تلقا راسك خسرتيه فهمتي غير نت حاول و إن شاء الله يكون خير
سعد نطق مبتاسم بحزن: ان شاء الله
سكت شوية و كمل : راه قالت لينا طبيبة بسباب هاد إجهاد اتر عليها و راه تقدر متولدش بسهولة
فراح غمضات عينيها و عودات حلاتهم بحزن: ان شاء الله ايكون كولشي مزيان انا انداعا معاها غير وقف جنبها صافي
سعد بإمتنان: شكرا بزااف فلأخير كتبقاي نتي حضن لي كنحط عليه راسي
فراح بإبتسامة: تانت ياله بسلامة اسعدود
سعد بإبتسامة: بسلامة
قطع معاها سعد و هو كيفكر اه بصح هو مكيبغيش مريم مي هادشي لي وقع خلاه إحس بدنب زائد انه ديما ولفها مصدعاه و كدوي معاه دبا ملي قطعات معاه لهضرة حس بشي حاجة فشكل مي هو لي عارف انه ناوي ابدا صفحة جديدة معاها و تا من فراح قنع راسو راه ماديالوش هي فقط صديقة و أخت

قطعات معاه فراح و حطات ليديها على كرشها لشوية باينة مي ماشي بزااف بدات كتحسسها شوية و نطقات بحب
فراح: بصراحة واخا معرفتكش كيفاش تا جيتي ولا شكون باك مي ماباغاش نخسرك و ليت كنحس براسي كتعطيني قوة ،كون هاني غادي نحميك لأخر نفس ليا واخا تكون منبود
ختمات كلامها بإبتسامة باهتة و وقفات تماشات خارجة من دار هبطات فدروج سمعات لهضرة تقدمات لجهة صالون دخلات و جلسات حدا لعيالات تا سمعاتها نطقات
أحلام : فين تعطلتي اصحبتي
نادية بجدية: اه ابنتي ياكما كاين باس كتباني ليا مقلقة
فراح تنهدات ضورات عينيها ماجات عينيها غير فعينيه كيفحصوها لمحات لخوف فعينيه عرفاتو خاف لتكون وقعات ليها شي حاجة غمضات عينيها و حلاتهم و بتاسمات بحال إلى كطمأنو راه مكاين والو ،رجعات شافت فاحلام و نطقات
فراح بحزن: مريم طاح ليها لولد
أحلام غوتات بصدمة: كفااااش
هنا كولشي شاف فيها لا عيالات لا رجالة و فراح و نادية غير كيقرصو فيها
أحلام ضحكات ليهم بغباب و رجعات شافت ففراح: هيهيهي
نادية بفقصة: بغيت ليك شوهة ابنت كرشي
أحلام : راه اماما تصدمت
فاطمة نطقات بحزن: كي وقع ليها مسكينة
فراح: معرفتش راه غير سعد لي علمني مسكينة بقات فيا معرفتش كيف غتكون حالتها
أحلام: اوى الله إجعلو طير من طيور لجنة
جميع :أميين

اوى بقاو مجمعين و فراح عينيها خرجو كتسناهم غير امتى يساليو مشات هي و أحلام جلسو حدا سيف الدين و ادم لكبدة لي قطعوها تاكولها هي(دبا فبولفاف نتوما عارفين كيشويو لكبدة لمرة لولة تا كطيب شوية و يقطعوها و يلويوها على شحمة اوى انا داوية على قبل ما يلويوها)
كان عمر و رشيد كيعمرو اتاي، حداهم بوطة و مقراش و براد و سكر و نعناع مهم كولشي حداهم عاد يوسف مقابل لمجمر هو و نادية و ادم و سيف الدين كيقطعو و يعمرو قتبان و بدر مكلف بتفريقة ديال كيسان و أحلام مكلفة بتفريقة ديال قتبان
اوى بقاو هكا مجموعين على لهضرة و ضحك تا سالاو و ناضو كين لي مشا يرتاح و كين لي مشا لكوزينا إجمعها و هاد لوقت بضبط هي أسوء وقت فلعيد كيبقا فيها غير ملال

اوى وصل لمغرب و فاق لي رتاح و سلاو لعيالات روينة و طلعو عوتاني كلهم لسطح لي كان شاعل فيه ضو و موجدين كولشي و هنا لي عندو شي فورمة يبينها و علاش لا و هو وقت تفصال لحولي و هنا فين عيالات دبا إتفرجو و رجالا إخدمو كان سيف الدين و أدم و يوسف و تا بدر لي خاشي راسو راه راجل واخا هكاك متحگروهش، كلهم كيفصلو اما بالنسبة لعمر و رشيد فراه كانو فجيهة لاخرى كيشوطو راس و رجلين ديال حوالا
بقاو مجموعين كيتحتو و يهضرو و نادية و فاطمة إعطيو تعليمات،لا هادي ديال شوا لا هادي گديد لا هادي ديال مبخر، بقاو هكا تا سلاو لحوالة كلهم و هبطو لتحت إتعشاو
فراح و أحلام لي هبطو لتحت طيبوه على لفاخر ملي بداو و كأي عائلة مغربية نهار لعيد كيطبو لكتف ليمن ديال لحولي
حطوه تعشاو مجوعين و كل واحد طاح كاو هادشي طبعا بعد ما دوشو و حيدو لعيا و رشيد و يوسف باتو معاهم حيت مخلاوهومش إمشيو اوى هكا داز نهار على أبطالنا

يتبع....✏️