قصة بالدارجة المغربية🌹تحت عنوان🌹:#مصير عاشقين🔞

💞📝 بارت 73 📝💞

فراح نطقات ولبكيا شداها: راه والله ما كنبغيه و لا باغا ناخدو ليك غير عجبوني شفايفو منفوخين
أحلام خرجات عينيها بصدمة ملي شافتها كتعبر: فرااح
فراح سرطات ريقها: راه ماشي تشهيتهم نبوسهم راه غير بغيت نبقا نشوف فيهم
مع كملات كلامها هزات ليديها بغات تحك عنقها تا حبسوها ليدين أحلام لي شدوها
أحلام برجاء و جدية: هالعار توحمي على اي حاجة غير متحكيش
فراح بغباء: علاش
أحلام عصباتها غوتات : راه حيت كتولي توحيمة فلولد
هنا بجوجهم سرطو ريقهم ملي سمعو نادية نطقات: اشمن ولد ا أحلام
أحلام نطقات عاتقة موقف: لا غير كنا داوين على لوحم و قلت لفراح مرأى لحاملة الى توحمات و حكاتها كتخرج فلبنت
فاطمة : اه ابنتي بصح كينة
سكتات فراح و تا أحلام لي هاد أخيرة بدات كتهز ليها فحجبها بمعنى سمعتي
رجعو مكملين شغلهم و فراح مرة مرة كتاكل من حلوة عجباتها بجهد

خرجو لبنات و لعيالات غادين بلفطور سلمو على رشيد و يوسف لي أحلام غير سلمات على يوسف شد ليديها حلف لا طلقها بزز تا تفكات منو
اوى بداو كيفطرو و فرح غير تسالي ليها لحلوة تحطها ليها أحلام بلا متعيق
وفراح تاكول و حاضية يوسف، بقاو كيدويو مجموعين تا نطق سيف الدين لي وقف
سيف الدين: ياله نمشيو نجيبو لحوالا راه هدا هو لوقت
أدم و يوسف وقفو بغا يوقف رشيد و عمر حبسهم سيف الدين
سيف الدين بجدية: غير بقاو نتوما انجيبوهم و نجيو
و بلا ميتسناه إيجاوبو خرجو فتيات القوة بغيت نقول فتيان القوة 🤣🤣🤣
وقفو لبنات جمعو طبلة و توجهو لبيت أحلام يبدلو حوايجهم دبا وقت تمارة لبسو گندوراتهم و تا فاطمة و نادية لبسو بيجامات عاديين و عمر و رشيد تاهما بقاو بسروال سورڤيط و تيشورط مهم كولشي تمسخ
مشاو لبنات لكوزينا دغيا غسلو ماعن و بقاو كيتسناو تا كيسمعو صوت حوالا خرجو من كوزينا كيجريو كيبانو ليهم دراري كولهم دخلو بواحد بواحد حطو گندورة ديالهم بقاو بتيشورط و شورط من غير سيف الدين لي عاجبو راسو بقا بديباردور
غير لاحو لگندورات خرجو و تبعوهوم عمر و رشيد شوية تمو مدخلين ربعة لحوالا كل واحد تبارك الله حسن من لاخور كانو كلهم سرديين سدو لباب و بقا كل واحد كيربط حولي مع لباب
تقدم أدم و سيف الدين و يوسف شادين واحد لي جاعر باين فيه قبيح كان گرونو تبارك الله كباار نطقات أحلام لي مهاوشة
أحلام: بابا تاعمن هداك
عمر بإبتسامة :هداك تاعك ابنتي
هنا أحلام عرفاتو تاعو
فراح هنا نزلات ليها دمعة من عينيها مسحتها دغيا بلا ميعيق شي حد و علاش مدوزش ليها و هي تفكرات باباها لي كيحلي ليهم لعيد تنهدات بشوية ملي شافتهم مطلعينو طلعات غير نادية و فاطمة إوجدو لفوق اما لباقية بقاو لتحت
شوية تمو هابطين دراري بتلاتة و شدو حولي تاني لي كان شوية قل من لول ولكن تاهوا كبيير تبارك الله ،هنا بعد سيف الدين خلا غير أدم و يوسف و نقزات كيف ديما
أحلام: وهدا تاعمن
يوسف نطق و هو كيضحك: هدا تاعنا مي تاهوا تاعك
هنا كولشي ضحك عند بالهم عادي مي غير دراري و فراح و أحلام لي فهموه
طلعو لحولي و سيف الدين شد حولي تالت لي كان بحال حولي تاني شدو هو و بدر و نطق بدر مقاطع أحلام
بدر: بلا متسولي هدا تاعنا حنا
أحلام بإبتسامة : مهم تاعنا حسن من تاعكم
بدر ضحك على هاد لهبيلة لي كتقول هضرة تاع دراري صغار
طلع سيف الدين حولي و معاونو بدر
تا هبطو بربعة كينهجو راه ماشي ساهل طلع حوالا فدروج
بقا واحد تماشا ليه سيف الدين كيفك لقنبة و أدم تبعو
أحلام: اهاه وهاد لخر تاعمن
أدم بإبتسامة نطق و عينيه حاضين سيف الدين لا يعطيه شي كروشية: هدا تاعي انا و فراح (حيت واحد ملي كيتزوج كيولي محسوب على راسو و مرتو فهمتو)
أحلام بقات كتشوف فيه كان تقريبا بحال لول تاهوا كبير و عالي ،تعاونو عليه كلهم باش دغيا يطلعوه و تبعوهم لبنات و عمر و رشيد
وصلو لسطح كانت شوية شمس فراح ضورات راسها كيبان ليها گاع سطوحة عامرين بناس مشات هي و أحلام تصورو مع لحوالا و تا لعيالات و دراري و عمر و رشيد كولشي تصور و بداو فضبيحة لي أول واحد بداو بيه ديال عمر لي هو بطبيعة لحال لي ضبحو و خلا لولاد هما لي هبطوه (زعما سلخوه)و نفس شئ بنسبة لديال رشيد تاهوا سالاوه و هبطوه و ياله ناوي يضبحو ديال فاطمة ضور عينو ما بانتش ليه حيت ملي كيبغيو إضبحو كيجيو لعيالات كل وحدة توقف حدا حوليها تا يتصورو
نطق بصوتو لي فيه نبرة جدية: فين هي فراح
فاطمة ضورات راسها كتقلب عليها : ماعرفتش اولدي انمشي نشوفها
نطق مقاطعها: اخليك انمشي انا خاصني اصلا نجيب واحد لعيبة
ضار شاف فدراري و نطق: مضبحوهش تانجيو
خلاها قبل ميجاوبوه و ضار لجيهة لاخرة هابط من دروج كيسمع غير صقيل هبط لطبقة ديال أدم بان ليه لباب محلول حلو بشوية تا بانت ليه و هو يحل عينيه بصدمة من منظر لي كيشوف قدامو
سيف الدين نطق بنبرة فيها لخوف: فراااح
فراح بقات كتشوف فلأجواء كتحس بقلبها كينزف توحشاتو بزااف حسات بعينيها غرغرو بدموع مقدراتش تبقا واقفة هبطات دغيا مع دخلات لدار جلسات فالأرض ضامة رجليها لعندها و خاشية وجهها فليديها لي مربعاهم و كتبكي بحرقة
هزات راسها ملي سمعات سميتها كيبان ليا سيف الدين واقف فلباب عينيه فيهم لمعة ديال خوف
هو لي غير هبط شافها جالسة بديك طريقة خاف عليها خلعاتو نطق بصوت لي باين فيه لخوف
سيف الدين: فراح
شافها هزات راسها و ياريت ماهزاتوش كانو عينيها حمريييين و دايزن بدموع و وجهها حمرر
معقلش على راسو تا مشا لعندها شد وجهها بين ليديه و عينيه باين فيهم لخوف
سيف الدين بلهفة و خوف: فراح مالكي اش واقع واش دوا معاك شي حد واش ضراك شي حاجة قولي مالكي
فراح غير شافتو حسات بمنقد ديالها جا وبلا سابق إنذار تلاحت عليه معنقاه كتشهق بلبكا و عينيها دايزين كتبكي بحرقة
هو محملش راسو فهاد لحظة اشنو فائدة ديالو ملي ماعارفش مالها كتافا فقط باش إزير عليها يحسسها بأمان واخا قلبو كيضرو من جيهتها بزاااف
بقاو هكاك شوية و بعدها عليه واخا تهدنات شوية مي باقي عينيها كيدوزو بدموع
شد ليها راسها بليديه و كيشوف فيها بحزن تحنى باس ليها دمعة هابطة من عينيها بعد و بدا كيمسح ليها دموع
سيف الدين بحنان: مالكي واش دوا معاك شي حد
فراح حركات راسها بنفي
سيف الدين: إذن كضرك شي حاجة
فراح بنفي و مرة مرة كطلع ليها شهقة
سيف الدين بحنان: إذن مالكي رحمني افراح و قولي ليا اش واقع ليك
فراح شافت فيه بعينيها لي عامرين بدموع و كتنطق و حروف مرة مرة كيوحلو ليها: توحشتو أسيف الدين عيد بلا بيه گعما حاسة بيه عيد قلبي كيضرني ديما كان نهار لعيد هو لي كيفيقني باش نمشيو لمصلى و ملي نجيو اول وحدة تكون واجدة هي انا مستحيل نخليه شي عيد إضبح ولا إسلخ بوحدو على بالك كنعرف نسلخ و هو لي علمني اي حاجة فنهار كنت كنديرها معااه دبا مبقاش هو راه ممتيقاش مشا اي حاجة كانت كضرني كنت كنقولها ليه هو كيلقا ليا لحل دبا گاع مشاكيل طاحو على راسي و مالقياش ليهم حل بطبيعة لحال حيت هو ماشي معايا راه مقادراش نصبر اسيف الدين راه اه نقدر نضحك و نبان ليك ناسياه مي مستحيل ننساه بمرة راني صابرة غير على قبل ماما باش ماتنهارش انقول ليك واحد حاجة
سيف الدين حرك راسو بإيجاب و عينيه غرغرو كيشوف فيها كدوي بحرقة و بعض مرات كتبتاسم ملي كتفكرو حس بماس كيتغرسو فقلبو
فراح بإبتسامة ديال حزن: على بالك بعد لمرات كنحسد أحلام فاش كتقول ليا جابو ليا بابا ولا ياله نجلسو حدا بابا اه عارفاها مكديرهاش بلعاني مي انا كنتقطع حيت تانا مزال ماشبعت منو تانا باغا نجلس حداه عرفتي كان كيقول ليا فراح نتي عمري نزوجك حيت منقدرش نعيش بلا بيك و كفاش دبا هو بغاني نعيش بلا بيه راه هاد شعور كنحس بيه فوق طاقتي و الله
غير سلات هضرتها وبدات كتبكي خشاها سيف الدين فصدرو مزير عليها كون لقاها تخشى وسط صدرو و متبقاش تخرج
بعدها عليه و كيشوف فيها بحب نطق: فراح الى مشا باباك انا معاك عمرك تنساي هادشي نهار انتخلا عليك عرفيه نهار نموت
و قبل ميكمل كلامو قطعاتو بإبتسامة باهتة معبرة على حزن ديالها : راه مكيناش شي حاجة من غير لموت لي كتاخد مني ناس لي كنبغي
سيف الدين حط جبهتو على جبهتها مغمض عينيه كيما غمضاتهم تا هي و نطق: فراح انا نهار قلت ليك كنبغيك ماشي قلتها هكاك لا راه قلتها و قاض بيها انا بغيتك اي حاجة تقلات عليك تقوليها ليا باش تخفاف باباك الى مشا راه ماشي لخاطرو راه ساعتو وصلات واش فنظرك الى كان باقي عايش واش غادي يبغي يشوفك فهاد لحالة ااا
فراح عينيها دايزين حركات راسها بلا حس بيها و كمل كلامو: اوى شتي داكشي علاش الله إرضي عليك اي حاجة كنتي كديريها مع باباك انا موجود نديرها انا وياك لاش انا كاين هنا اا راه انا باباك و خوك و ولدك و راجلك و حبيبك اي حاجة بغيتيني نكون انكونها مهم نتي تكوني فرحانة و عمر دمعة تهبط ليك من عين مفاهمين، راه بعض لمرات نقدر نبان ليك مكنبغيكش حيت مكنبقاش نقولها ولكن انا افراح هكا داير معنديش مع لهضرة كنبغي نطبق كنبيغيك فراه نقدر قلبي نحطو قدامك غير إلى قلتيها داكشي علاش منبغيش نشوفك فهاد لحالة مرة أخرى، اي حاجة باغاها جي لعندي و فيما تفكرتيه الله إرحمو داعاي معاه حسن من هاد لبكا على والو صافي تفقنا
فراح كانت كتسمع ليه اول مرة يدوي معاها بهاد طريقة حسات براحة من كلامو لقات هضرتو بصح نيت حلات عينيها بعدات منو و شافت فعينيه و هوا مزال محاوط وجهها
فراح بحزن: ولكن دبا حنا فمشكيل انا مزوجة بأدم كفاش غن
وقبل متكمل كلامها قطعة سيف الدين حاط صبعو إبهام فوق شفايفها: ششش هادشي نتي دبا متفكريش فيه غلقاو حل و قريب ان شاء الله
فراح كتافات فقط باش تحرك راسها بإيجاب
سيف الدين وقف و وقفها معاه: ياله اجي غسلي وجهك تعطلنا
فراح وقفات معاه و مشات لحمام غسل ليها وجهها و مسحو ليها واخا هكاك عينيها بقاو منفوخين و حمرين و حتى حناكها مزنگين باين عليها انها كانت كتبكي خرج هو وياها و ملي وصلو لطابق ديالو دخل خدا واحد لموس إدير بيه سبة و عاود طلعو، لقاهم كيتسناوه و لعيالات كيغسلو فدوارة و لمصارن وقف عليهم سيف الدين و تا فراح لي غير شافهم نطقات
فاطمة: اويلي فين كنتي ابنتي
سيف الدين نطق بصوت جيدي: لقيتها كتدوي فتيلي ماعرت شكون صونا ليها
أدم غير لمح فراح شاف فعينيها عرفها كانت كتبكي نطق بلعاني مشتتهم: وراه غير كان بغات تهرب من دوارة بلعاني
كولشي ضحك على هضرتو الا تلاتة سيف الدين و فراح و أحلام لي لمحات أدم غمز ليها ديك ساعة مشات عند فراح شادا فيها مبعداها
أحلام كتشوف فيها : مالكي اش واقع واش دار ليك سيف الدين شي حاجة

يتبع...✏️