قصة بالدارجة المغربية🌹تحت عنوان🌹:#مصير عاشقين🔞

💞📝 بارت 102📝💞

فراح دلات شفايفها بحزن و نطقات و عينيها تغرغرو: مجانيش زوين واش معجبكش
سيف الدين لعن راسو حيت خلاها تقلق ولا هادشي لي ماكيبغيش ديك ساعة حط ليديه على وجهها و بدا كيتلمس ليها فحناكها بصباعو و نطق بحب
سيف الدين: الله إرزيني فصحتي تا جاك خطيير و كلك جيتي قنبولة عمري فحياتي ما شفت شي وحدة فزينك و لا طلعات حسن منك حيت ببساطة عمري تسوقت لبنت لمرأة راك فتنتيني فهاد لحظة و ديتي دنوب فهاد مسكين لي مكرهش إكو*يك دبا غير ملقاش كفاش
فراح خرجات عينيها بحشمة من كلامو
(اويلي اسيف الدين اش هاد تعبير لمخري لي كتعبر بيه)
سيف الدين باس ليها جبهتها و نطق: راه جاك ناضي مي انا كيعجبني ملامح ديالك لكحلين لا شعرك (دوز ليديه على شعرها)لا حجبانك(دوز ليديه على حجبانها)و لا شفارك(دوز ليديه على شفارها) ولا عينيك(حط ليديه على  عينيها ملي غمضاتهم) اه بصح جاوك خطيرين ليلونتي مي لعينيك لكحلين بريق خاص و براءة عمري شفتها فشي بنت انا بغيك على طبيعتك ما باغيش شعرك مصبوغ و لا عينيك لي ماشي طبيعين و لا تا شفارك و فمك هو لخر كون كان زرق و الله تا قابل بيه حيت طعم هو هو، لون لا علاقة ليه بطعم ريقك
فراح عضات على شفايفها كتحس بكلامو دخل ليها لقلبها نيشان و حناكها تزنگو نطقات بصوت خافت
فراح: احم بصراحة تانت لبسة جاتك زوينة بيناتك بعقلك
سيف الدين طلقها بواحد ضحكة: ههههه ايه ابنت ناس هي كان عقلي هارب
فراح حشمات و نطقات بنفي : لا و الله ماشي هكاك
سيف الدين باسها فحنكها و نطق: فهمتك اش كتقصدي اراحة قلبي
ياله ايكمل كلامو سمع دقان
سيف الدين : دخل
دخلو نگافة كيطلو و نطقات و حدة فيهم: راه غنتعطلو خاصها تلبس و تانت هكاك
سيف الدين أومأ ليها خدا لبسة لي خاص إلبس و خرج
مكاملاش 5 دقايق كانو لابسين و واقفين حدا دروج بغاو يهبطو فراح كانت لابسة لبسة تانية و سيف الدين لابس جبادور فنفس لونها جاتو ناضية جا معاه لبلدي
هبطو و بدات لموسيقا و گاع الأعين عليهم جلسو شوية و وقفوهم بغاو يطلعوهم فوق عمارة سيف الدين ديك ساعة نطق بحزم موجه هضرتو لنادية
سيف الدين: بربي و طلعت فيها تا راه نتي مامزغرتاش عليا
نادية ندبات حناكها: ويلي اسيف الدين اش فيها
سيف الدين خنزر و نطق: على اخر ياماتي نطلع فوق هاد نم و يبداو إتزعلو فيا من نيتك
ياله اتنطق فراح و هو إنطق: الى بغيتو هاد نهار يدوز مزيان خليوني هاني
و داكشي لي كان طلعو فراح فوق لعمارية و هو كيتمشا معاهم و فراح خايفة غير طيح كانت كتلوح ليهم لورد و شكلاط و فنيد
ضوروها و حطوها جلسات شوية تصورات و عاودو طلعو باش يلبسو لبسة تالتة
سيف الدين واقف لابس جبادور بيضة و مخيطة بلبونكاسي تمات خارجة لابسة لبسة تالتة لي كانت بلباج شافها و نطق
سيف الدين: زعما ماتجيكش شي لبسة خيبة
فراح تزنگات: وراه هادي معجباتنيش
سيف الدين باس ليها ليدها: لا و الله تا جاتك ناضية
بدل نبرة ديالو لجدية و نطق: فراح بدا كيطلع ليا هاد نم فراسي واش ماغانساليوش
فراح خافت تقول ليه باقي لينا 3 لبسات و ينوض إعطبها فضلات تسكت
جات نگافة و بداو كيزغرتو و هما هابطين هبطو لتحت جلسو و بداو كيصايبو ليهم طبلة لقدام كانو فيها ستة كراسة نغزها قلبها و حبسات دموعها بزز
وقفوها نگافات بداو كيضورو على طبالي كيرحبو بناس حيت تحطات ليهم لماكلة و لكن بأحرى راه فراح لي كانت كترحب ماشي سيف الدين سالاو و رجعو جلسوهم فطبلة و جات نادية و عمر و فاطمة و لعربي جلسو معاهم فطبلة و بداو كيحطو ليهم و فلماكلة فراح كتاكل بزز صافي نفسها تحبسات مابقاتش عندها لگانة و هادشي لي لاحظو سيف الدين كايشوف فيها متوترة و كتسهى فعمر و نادية
قطع من بسطيلة هز شوية بلفورشيط و عطاها تاكول هو مامسوقش لبشار دبا بالو معاها و بغا يعرف مالها و صافي و بطبيعة لحال لكاميرة مافلتاتش هادشي و تا كاميرات ديال درب لي كانو حاضرين
شافت فيه و نعت ليها بعينيه لجيهة فورشيط و كلات بشوية خايفة تخصر لعكر
بقاو هكاك تا سلاو لماكلة لي فوسطها خداو ليهم تصاور بحال فاطمة كتوكل فراح و نفس شئ على نادية سالاو و  و بقاو جالسين فلبرزة صوروهم و ناضو تمو طالعين فدروج ياله بغا إدوي معاها سيف الدين تا زربو عليه ملي حطو ليه لبسة و سدو عليها هي حيت عرفوه كيبقا داوي بزااف معاها تنهد دخل لبس و خرج لقاها واقفة و حادرة راسها ديك ساعة نطق بعصبية و برود فنفس لوقت
سيف الدين: بلا ماتحاولو ياكو راه بربي ماغتهبط بهاد لبسة واخا تموتو
فراح شافت فراسها كانت لابسة قفطان فلموڤ بلا كمام و فوق منو سلهام تاهوا بلا كمام ليديها كلهم باينين هزات راسها فيه و نطقات
فراح: علاش مالو
سيف الدين شاف فيها بجدية: لا والو غير بغيت نفهم ليديك علامن كيطلو ابنت نااس ااا
فراح مادواتش معاه حيت اصلا مابقاتش عندها گانة ديك ساعة دخلات تبعوها نگافات و بدلوها ليها لبسوها وحدة خرى و دارو ليها زيف طويل شوية على شعرها و ياله ايخرجوها تا وقف عليهم
هو لي ماتسرطاتش ليه تمشي بلا متقول والو حيت واخا كتكون مقلقة منو يا كتناقش معاه و لا كتقول ليه واخا اما دبا ماقالت والو عرف كينة شي حاجة تسنى شوية و دخل لعندها
سيف الدين : خرجو، واحد شوية هاحنا معاكم
و داكشي لي دارو تمشا لناحية ديالها شافها حادرة راسها هزو ليها و شاف ليها فعينيها لي تمحات لمعة ديال فرحة و بانت بدلها لمعة ديال لحزن
سيف الدين: مالكي
فراح بحزن: والو
سيف الدين حط ليديه على حناكها و نطق بحب: مالكي افراح
فراح عينيها غرغرو و نطقات: كون كان هو كانت اتكون فرحة من نوع أخر
سيف الدين عنقها حيت عرف علامن كدوي حيت نضراتها لعمر كانت كافية تشرح ليه: ششش حمدي الله عندك ميمتك راه كاين لي باغي غير واحد فيهم و ملقاوهمش فهمتي
فراح تمخشات فيه نطقات و عينيها كيقطرو:اه عارفة مي تاهو بغيتو بغيت لقاه واقف معايا
سيف الدين بعدها عليه و بدا كيمسح ليها دموعها جاب الله لقلم و ريسيل ما ساحش ليها على وجهها: و انا شنو هو دور ديالي الى ماوقفتش معاك راني حاسبك بنتي قبل من مرتي افراح
فراح هزات عويناتها شافت فيه و نطقات بحب و جرأة فنفس لوقت: واخا ما كنقولهاش بزااف مي راه كنبغيك
سيف الدين قلبو حس بيه ضرب بجهد ديك ساعة ماهموش راه بشار كيتسنى تحنى على شفيفها خداهم وسط شفايفو مصهم ليها و باسهم
سيف الدين: انا راني كنعشقك ابنت ناس ماشي غير كنبغيك حبك ولا مخلط ليها مع دم لي فعروقي راك وليتي بحال أوكسجين الى مكنتيش نموت
فراح عضات على شفايفها بحشمة طلق منها و نطق
سيف الدين: تسناي بلاتي
خرج بانو ليه نگافات و نطق: جيبو ليها شي وحدة تصايب ليها داكشي تخسر
نگافات ما فهموش اش قال تا دخلو عاد فهمو جابو لكوافورة صيبو ليها دغيا و خرجوهم هبطو بقاو جالسين و فراح شاعلة فيها لعافية كتشوفهم كيشطحو و هي جالسة بقا فيها لحال بغات تنوض تشطح شداتها لحالة شافت فيها أحلام ديك ساعة فراح غمزاتها جات كتجري
أحلام: نعام الحب توحشتيني
فراح نطقات بصوت خافت فودنها: بغيت نشطح
أحلام شافت فسيف الدين لي كيشوف فيهم اش كيحاولو يديرو: احم ما نضمنش ليك واش لمحكمة توافق
فراح و لأول مرة تخدم دماغها: هانتي غير قوليها لماما و خليها تجي هي تنوضنا باش هو ميقولش ليها لا
أحلام اومأت ليها بإيجاب و مشات سيف الدين كيتسنى فلكاميرة تحيد باش يسولها تا كيشوف ففاطمة وقفات عليهم
فاطمة شدات ففراح كتوقفها و نگافة معاوناها: اجيو تشطحو معانا
سيف الدين عقد غوباشتو هو يشطح ايه مي فراح مستحيل وقف داير لخاطر لفاطمة وقف حدا فراح تحنى لودنها و نطق
سيف الدين: تشطحي نفرعك
فراح اومأت ليها و تحركو شدو فيهم و بداو كيشطحو و هما كيحركو غير فليديهم و بجوج شادينهم لهوايش حيت تا سيف الدين من نوع لي يقدر إيمشي لعرس غير على قبل شطيح،شوية دخلوهم لوسط و هما ضايرين بيهم شدو فبعضياتهم و بداو كيتحركو شوية، مي فراح غير لموسيقا بدا واحد ريتم بدات كتحرك فطر*متها طلقات منو بواحد ليد شدات بيها قفطانها طلعاتو شوية و بدات كتشطح و طر*متها كتحرك سيف الدين خرج عينيه بصدمة خصوصا فاش عطاتو بضهر حيت ضوروها تشطح مع فاطمة و مع طالون داكشي HD طر*متها كتحرك معاها و تاهي كتشطح بتوازن و تقيلة شطحتها سيف الدين صبر تا عيا و جرها و زير ليها على ليديها و كيشطح بشوية باش ميديرش شوهة
سيف الدين: بربي لا بقات فيك دبا تبتي ولا غتكون هضرة خرى
فراح جمدات تا ليديها مابقاتش كتحركهم عرفات راسها كحلاتها حيت راه الأخ تحلف عليها سالات موسيقا و طلعوهم عوتاني باش تلبس أخر لبسة لهاد لعرس و لي هي لبسة لبيضة

طلعو و سيف الدين مدواش معاها غير كيخنزر هز لبسة ديالو و خرج لبيت لاخور لبس كوستيم فزرق و خرج كيتسنا فيها و هو غير معصب كيشوف فيها تعطلات عليه
سمع لباب تحل و تلفت لبؤبؤ ديال عينيه وساع كيشوفها خارجة بحال شي اميرة هاربة من عالم ديزني كانت لابسة لبسة لبيضة من فوق مشبكة و من لتحت منفوخة كانت لكوافورة بدلات ليها مشطة ديال شعر جمعاتو ليها بمشطة كلو و خلات ليها لگصة هابطة و تا من ميكاب تاهو غيرات فيه دارتو ليها تقيل شوية و حيدات ليها ليلونتي خلات ليها عينيها لكحلين لي لعبات عليهم تا ولاو كايبانو كبار و مشفرين مهم جات ناضية من لخر
هو شاف فلكسوة مزيان غير ستقرات عينيه على صدرها عقد غوباشتو واخا مغطية شوية مي لفرقة ديال صدرها كتبان شوية و ياله ايبدا يهضر تا كيلمح كاميرا كتسجل فيهم سكت ملي شافها و هادي بطبيعة لحال فكرة ديال أحلام حيت كانت متأكدة 100٪ مغاديش إبغيها تلبسها و زائد هما ماجابو ليها تا بديل حمقاتهم فيها هادي و صافي تلبسها و ربي كبير داكشي لاش تافقات مع كاميرا مان باش غير يتحل باب ديال لبيت إبدا يسجل
سيف الدين جمع قبضة ليديه و تمشا ناحية ديالها شد حناكها بين ليديه و باس ليها جبهتها تحنى لودنها و نطق
سيف الدين: عمري شفت شي وحدة بجمالك و لكن تال لعرى ما غندوزوهاش افراح
فراح مسكينة عارفة راسها غدوز فمبتسمون رغم إعاقة حيت كانت متأكدة الى تبعات احلام و إسراء اتموت
سيف الدين شافها توترات عطاها دراعو شافت فيه و خشات ليديها فدراعو و تحركو لجيهة دروج طلقات أغنية رومانسية و تمو هابطين فدروج و گاع أعين عليهم جاو مواتين لبعضياتهم بجوج
أحلام شافتهم نطقات موجهة هضرتها لإسراء: قلت ليك ماغادي إوقع والو
إسراء: ياختي خاصني نخاف منك
أحلام تنهدات: غير سكتي الى ما وحلات هي فيه
إسراء بتاسمات بشر: ماتخفيش قريتها اش دير هادشي الى تبعات كلامي
أحلام بشك: اش درتي المسخوطة
إسراء بتاسمات: تال غدا و نعرفو من عند فراح

يتبع....✏️