كانت باغا تهضر ولكن شدات عندها لسانها باش ماتنوضش المشاكل لفيروز مع ناسها ويبقاو مضادين معاها ، اما المعنية بالامر شافت حتى شافت وناضت من تما للكوزينة بانت لها غزلان غادا وهازة فيديها طبسيل ديال الملوي كانو موجدينو هاد الصباح وخاشيينو فالفريݣو
فيروز : [ دخلات للكوزينة وشافت فلالة فخيتة ] واش ا مّا ماغانبقاشي فيك؟؟ باغا دسيفطني ندار ديال العقارب؟؟
لالة فخيتة : [ سكتاتها ] مادقولش هاد الهاضرة على ناسك حشومة وعييب واش بغيتيوم يسمعوك؟
فيروز : ا مّا منين دخلت نصالون ومرت خاه كاطلع فيا ودهبط فيا بحالا واكلاها فالورت وحناه دور دور ودبدا دعبار لي فشعري وكايهاضرو غي بريفية كلمة وحدة ماكايقولوها بالعربية وكل شوية كايتغامزو عليا و انا عاارفاهوم كايهاضرو فيا
دخلات اميمة باش تجيب داكشي لي باقي وجلسات كاتتسنط لدوك الفيخرات لي كاتزيدهم فيروز ، شافت لالة فخيتة فأميمة مسولاها بعينيها زعما واش بصح وجاوباتها حتى هي غير بالعينين زعما لا
لالة فخيتة : وا صافي يرضي عليك امشي ا بنتي بلاش مادعمل العصا فالرويضة خاك بوبكر هاد نهار غا على سبة مادخليهش يبرد جنونو فيك
فيروز : علاش يبردوم فيا انا؟ مالي انا شني عملت؟؟ هما لي كايهاضرو ويتغامزو عليا
شدات من عند مها الطبسيل ومشات هي وياها يجلسو مع العيالات في حين أميمة رجعات للكوزينة باش تشد الشغال على عكزوتها وتخليها جالسة مع الناس.
رجع فاروق للدار ودخل ديريكت جلس مع الرجال من ورا ماعيطو ليه فالتيليفون ، دخل سلم عليهم وفاش جا يبوس لباه راسو نطق
الحاج قاسم : فين كنتي؟ ݣالت لي مك غير جيتي ورجعتي خرجتي واش طاري شي مشكل؟
فاروق : ماشي شي حاجة الواليد
مشا سلم سلام رجولي على عِز لي كان جالس جلسة رجولية وكايهضر هو والحاج الرحماني ... وعلى عكس المتوقع ماكانش جاي ضارب الكلاس كيما كايديرو الأغلبية ديال الناس فاش كايجيو يخطبو ... ماكانش ضارب كوستيم بݣرافاطتو مع صباط مقمقم
• كان لابس سروال فالكحل مع پيل كول montant فالزيتي ومن الفوق مونطو فالكحل
جالس معاهم وهضرة كاتمشي وهضرة كاتجي ، كايكون مركز معاهم ومع هضرتهم حتى كايمشيو عيونو الفحمية مرة مرة لجهة خرا مترقبة الطيف ديالها لي ما بين الفينة والاخرى كايدوز من جنب الباب ديال الصالة ولا كايكون شارك الهضرة معاهم حتى كايوصلو لمسامعو الصوت ديالها
بقاو على داك الحال هضرة كاتدي هضرة وهضرة كاتجر الهضرة لي وراها حتى قرر الحاج المرتضى يدخل ديريكت فالموضوع لي جاو على ودو
الحاج المرتضى : ايوا ا سيادنا ماكاين مايتخبا ، داكشي لي جايين على ودو حنا عارفينو ونتوما عارفينو ... جايينكم من الباب طالبين نتشاركو معاكم الدم والنسب [ شاف فالحاج قاسم ] ونديو بنتكم فيروز لولدي عِز على سنة الله ورسوله [ رجع شاف فالحاج الرحماني ] عشرتنا معاكم عشرة سنين وماكرهناش الحاج نختموها بشي عراسية نتناسبو معاكم بيها ، اش ݣلتي الحاج
أنت تقرأ
زوجة الكولونيل / COLONEL'S WIFE
Romanceهو : تَبْتَغين من غضبي الخمود ... وتأملين أن أضع أصفاد لأسد غيرتي بينما أرى حولك من الرجال حشود ... تستقصي من زئيري الجُمود ... ومن ردود أفعالي الخمود ... بينما تجوبين دروب الفجور بأنوثتك الفاتنة ا ولا تعلمين أن الفتنة أشد من القتل وأن حكم الفتنة هو...
