زوجة الكولونيل / COLONEL'S WIFE

PART 2

° وجدات راسها من مور مالبسات داك التوب الخفيف ديال الاغريقيين ورجعات جلسات فوق الفوتوي اما رائد طلع عينو فيها وطول فيها الشوفة حاضيها اش كادير .. كانت كاتتقاد فالوضعية وتتكات على جنبها والرجل اللولة كانت مطلوقة مسرحة والرجل التانية مسنودة من فوق الرجل اللولة وخلاتها متنية شوية حتى زاد برز واحد الجزء من الساق ديالها اما الخصر ديالها كان دااخل وباينة بوضوح ديك الهبطة لي فيه اما يديها كانت حاطة وحدة متكية مسنودة عليها والتانية كانت حاطاها على داك التاج ديال الورد لي على راسها في حين شعرها كان مبعثر و واخد راحتو بالتموجات لي دارتهم فيه وبديك الهزة لي هزات راسها كانت فعلا كاتجسد وحدة من الاساطير الإغريقية

جلس جلسة رجولية مفرق فيها رجليه و قدامو واحد التمثال كاينحت فيه .. كان قرب يساليه حدو كايزيد اللمسات الأخيرة

أي واحد شاف دسك المنحوتة كان قادر يتعرف على الفاتة لي فيها .. حيت ببساطة الفنان لي نحتها كان فنان بكل للكلمة من معنى ... قدر ينحتها كيفما هي

وجهها الصافي الدائري لي كان بياضو وحمرة خدودو وتقاسيم الوجنتين وديك الخالة بارزين جمالو .. حجبانها المعتدلين لي كانو بحالا مرسومين بعضم تمر محمر ... عيون الغزال لي عندها ومزينينهم شفارها الكتار .. نيفها لي كان رفيع و متلت بشكل مثالي .. و و أخيرا شفايفها المنفوخين لي كانو بحال شي حبة ديال الفريز

ملامحها كانو مخلطين ما بين البراءة والانوثة الصاخبة .. ما بين الرقة والجاذبية كل تفصيلة باينة فجسدها ماكانش كايزݣلها

لاح نظرة أخيرة كايتفحص فالتمثال و كيتمعن فيه كان متقون بزاف بداية بخصلات شعرها لي بعض منهم تمرد وطاح على وجهها والباقي تبعثر على ضهرها وصدرها ... بقا كيقارن كل تفصيلة ما بين التمثال الطيني والنموذج الحي لي جالسة قدامو حتى وصل لتعابير وجهها ولاحظ بلي مدارش الشامة .. كمل التدقيق ديالو وركز كتر فاش وصل لعنقها الطويل لي مزينو شعرها المسدول عليه وعاد عظمات الترقوة لي باينين عندها و مزيناهم خالة مستقرة فوق واحد منهم

كانت الكسوة لي لابسة توبها خفييف ومحلولة بزاف من جهة الساق .. ذراعها معريين وعظمة الترقوة وااضحة منها وبارزة

كل مرة وشمن نوع ديال الكساوي لي كيعطيها تلبس ولكن اغلبيتهم كانو أشبه بأثواب الأساطير الإغريقية .. مخيطين ومفصلين على مقاسها باش يوصفوه ويبرزو نقاط الجاذبية ديالو المسموح بيها من طرفها

ناض وقف ومشا باش يغسل يديه اما هي لبسات فرجليها وتوجهات جهة التمثال تشوف كي جا واخا هي متأكدة بلي غيكون متقون بحال لي سبقوه ولكن كايعجبها تشوف التماثيل والرسومات ديالها .. وكيما توقعات كان التمثال نسخة عليها فيه أبسط تفاصيلها حتى من التنيات لي فخصرها لي تشكلو بسبب التكية ديالها منساش ينحتهم..