رد البال لسكاتها لي طال و الشك لي غلف عينيها وباش يهرسو لها حل البواطة حتى بانو ليها حوالق ديال الذهب الأبيض و بحال ديما هي ديييما الذهب البيض كايحمقهاا كيفما كايحمقوها الكادويات .. شدات البواطة و جبدات حلقة منهم كاتتفحصها بيديها و تتفحص البولات لي فيهم
بلا ماتبعد عينيها عليهم نطقات
فيروز : علاش جيبتيهم لي؟
زاد قرب منها بخطوة و حط يدو على كتفها
يوسف : راك ݣلتيها ا بنت عمي صفاو الخواطر بيني و بين خوك ولكن بيني و بينك باقيين ماصفاوش ديريها كادو للصُّلح راك كاتبقاي بنت عمي ا فيروز
ماجاوباتوش ... بقات ساكتة و عيونها الزبرجدية شادين فدوك الحوالق أما الدماغ عندها بدا كايفصل و يخيط فهاد التصرف و الكادو لي جابو لها
رجعات الحوالق لبلاصتهم و سدّات البواطة
فيروز : [ هزات عينيها فيه و بتاسمات بتكلف ] بنت عمك بالحق دابا انا براجلي و هو ماكايبغيش نشبر الكادوات غي شوف ليمن تعطيه [ مدّات ليه الكادو ] يكتّار خيرك
مع بغا يجاوبها و هو يسمع صوت الحاج قاسم واقف قدام الباب و كايعيط ليه في حين هي حطّات ليه كادوه فوق الزعلولة و مشات .. جهة الباب لي واقف حداها بّاها ، دازت من حداه و هي كاتشوف فيه غير بجنب عينيها بانو ليها عينيه مرة عليها و مرة على ولد خوه لي كانت واقفة معاه
طلعات بزربة لبيتها و حرفِيًّا ولات كاتحس براسها وسط 2 ديال العوافي ... هاد التصرف لي دار ولد عمها حل ليها العينين على حاجة خرا كانت غافلة عليه ... تأفأفات واش هي كان ناقصها هادشي؟؟
بقات غادا جاية فالبيت حفرات لرض برجليها بداك المشي و المجي و هي كاتحاول تحط ݣاع الإحتمالات فبالها لي ممكن يوقعو لها سوا تطلقات سوا لا كاتحاول تحط النوايا ديال عِز و حتى ديال يوسف قدام عينيها ماخرجها من هاد الحالة غير صوت الباب كاتتحل
غزلان : [ عقدات حجبانها ] مالك؟
فيروز : [ وقفات و نطقات بداكشي لي شاغل بالها ] دابا شوف ا غزلان انا ادا طلقت ما ايبغيوشي يخليوني فالدار ياك؟
سدات الباب موراها و مشات جلسات فوق الناموسية من مور مافهمات اش واكل ختها و بكل موضوعية و منطقية نطقات
غزلان : فحالا كادشوفا بعينيك ، بَابَا ماباغيكش طلَّاق و لاطلقتي ايشوف لك شي واحيد يدزوجك باش مادبقاش مطلقة
فيروز : و شني فيها ادا كونت مطلقة؟ مالي انعمل الحرام؟
غزلان : انا غي قولت لك [ بإستغراب ] دابا علاش كادفكّار فهادشي؟
فيروز : ماكونتشي انفكّار فيه كون ماشوفتش يوسف قبايلا نتينا عارفة من فيواخ مابقيت هضارت معاه علاش دابا ايجيب لي كادو و يقوليا باغي يصفي الخواطر؟
غزلان : [ بإستغراب ] جاب لك كادو؟؟ فيواخ هادشي؟
فيروز : عاد قبايلا و نتينا عارفة ديك الفضيحة ددوك ليامات لي كان عملا [ جلسات حدا ختها و شافت فيها بشك ] مايكونش كايوجّاد باش من باعدي يقولوم باغي يدزوجني واخا مطلقة و هايدا يكبر فعينين بّا سيدي؟ نتينا شوفتيه هاد اليامات مابقاشي كايخوي الدار
أنت تقرأ
زوجة الكولونيل / COLONEL'S WIFE
Romanceهو : تَبْتَغين من غضبي الخمود ... وتأملين أن أضع أصفاد لأسد غيرتي بينما أرى حولك من الرجال حشود ... تستقصي من زئيري الجُمود ... ومن ردود أفعالي الخمود ... بينما تجوبين دروب الفجور بأنوثتك الفاتنة ا ولا تعلمين أن الفتنة أشد من القتل وأن حكم الفتنة هو...
