زوجة الكولونيل / COLONEL'S WIFE

PART 43

خلاتها ومشات من تما مخلية ختيمة ومريم معاها
مريم : اجي نتي ، قالت ليا ختيمة كاتقلبي على الساروت تولي تطرقي الباب .. من دابا باغا تولي تجري علينا من الطبقة ديال خويا؟؟

فيروز : ا سماع ا ختي انا ماجيتشي نفتش على المشاكيل

ختيمة : [ قاطعاتها ] لاباس منين الدار تقسمات ولي عندو شي حق فيها واخدها اما كون ماجا فين يدور العام حتى تلقايها دارت شرع يديها

فيروز : علاش ا دقول حوايج يانا ماقولتومش؟ ياك نتينا عاندك المفتاح ددارك؟ ويانا باغا المفتاح دداري ماشي حِقّاش مابغيت تا واحيد يدخُل لعاندي ندار..

مريم : [ قاطعاتها ] ا شوفي ا مرت خويا ، داكشي لي ولفتيه فدار واليديك خليه تما ... هاد الدار حنا جامعانا كلنا باش واحد مايتفرق على واحد مشاركين الفرحة والقرحة وواحد كايدخل عند واحد ... دوك الطباقي دايرينهم غير باش كل واحد ياخد راحتو بلا صداع بلا مشاكل والايني كانشوفك نتي جيتي بين ليلة ونهار باغا تفرقي علينا وتولي داخلة وخارجة بالساروت مالنا ياك لاباس؟ خايفة من الشفارة؟ ها ختيمة جاية قبل منك وساكنة هنا اعوام وساروتها عندها وعندنا ، باش فايتاها نتي بالسلامة؟؟

ختيمة : راه قلت لك هادي من نهارها باغا تشتت الشمل وتجر لوسي لجهتها

مريم : شفتيه هو غير ساهل لها [ شافت فختيمة ] مزاال ماشافت واالو معاه [ عاودات شافت ففيروز ] وماتنسايش واحد الحاجة عنداك يقول لك القران ديال عقلك هاد الطبقة تعطات لك باش تولي تعششي فيها وتفرقي كوزينتك من كوزينتنا ... كوزينة وحدة كانطيبو فيها راها لتحت ، الفطور لتحت والغدا لتحت والعشا لتحت .. الطياب عليه النوبة و وااياك تعولي على نجية طيب فبلاصتك ، نجية خدمتها التخمال ديال لتحت ، طبقتك ايلا رونتيها نتي جمعيها ، بحالك بحال غيرك راك مازايدة علينا بوالو ماناقصة علينا بوالو

سمعات صوت الحاجة هنية كاتعيط لها وميقات فيها وهبطات أما فيروز فهاد الأثناء ، ماجاوباتهمش وخدمات أسلوب التجاهل بحالا ماكاينينش .. هما كايهضرو وهي كاتطوي حوايجها وراسها كايدور غير مع هضرة أميمة ، حاسة بقلبها مزيير وكاتشوف راسها محطوطة بين 2 خيارات يا تصبر لعِز وترتاح من المشاكل ديال هادوك يا غايخصها تصبر على الدق من جهتو و جهة عائلتو أما باش تهرب كان هاد الخيار تحذف من القائمة من فاش تكوات

بقات ختيمة كادور عينيها فداكشي لي جا لفيروز ومشات وهي ماعاجبها حال واخا من الأساس ماكانتش مخصوصة من شي حاجة ، كلشي كان عندها سوا طلباتو سوا ماطلباتوش.

° بدات كاترتب حوايجها فبيت النعاس وكاتحط البرودويات ديالها فوق الكوافوز وفالدوش .. مقاتلة مع يد وحدة حتى سالات عاد مشات باش تدوش ، لعل وعسى داك الما يهدنها شوية ويبردها من هاد الفقايص ... باغا شي حاجة تتلف بيها الوقت ، شي حاجة لي تحس فيها بالإنتماء فهاد الدار وماكانت هاد الحاجة غير النباتات والاعشاب