هو : تَبْتَغين من غضبي الخمود ... وتأملين أن أضع أصفاد لأسد غيرتي بينما أرى حولك من الرجال حشود ... تستقصي من زئيري الجُمود ... ومن ردود أفعالي الخمود ... بينما تجوبين دروب الفجور بأنوثتك الفاتنة ا ولا تعلمين أن الفتنة أشد من القتل وأن حكم الفتنة هو...
نورة : تينا ما عملتيلي والو ماطلبشي السماحة ، بلحق هو مايجيشي يهضار معايا ، علاش ايطلب مني السماحة انايا؟ واش ضرابني بكتفو بلا مايقصاد باش يطلَب مني السماحة؟ تعطل عليا 5 دقايق باش نشوفو ماجي يطلب مني السماحة؟ لااااء هو اذاني بهضورات لي يانا خروجت من دارنا على وديتهم باش مانسمعومش ، مامنحقوش يطلب مني السمااحة الشيخ فوزي : [ تنهد و زفر بعدم إرتياح ] مو بالغصب يا بنتي بس ضروري يعتذر على ها التصرف الدنيئ ماجاوباتوش ، بقات واقفة فبلاصتها و مقابلة الطوموبيلات لي غاديين جايين فداك الليل حتى نطق مخرجها من سكاتها الشيخ فوزي : تقدري تدخلي نتكلم شوي؟ الجو برد هون نورة : [ حركات راسها بنفي ] لا غي دخول مابغيتشي مابقيت باغا منكم حِتة حاجة يرحم والديك خاليني غي نرتاح هنا بوحديتي و من باعد ا نمشي بحالي الحمد الله ربي كبير و غايشوف من حالي الشيخ فوزي : معك حق يا بنتي ربنا كبير بس في متل مغربي بيقول سَبِب يا عَبدي وأنا أعِينك ، بس تعالي معي نشرب كوفي ونشوف شي حل شافت فيه بحيرة وتردد هي كتفكر فهضرتو شوية بشوية عرفات بلي عندو الحق وهو يمكن ماليه ذنب لحد الساعة مشافت منو غير الخير .. هزهزات ليه براسها في حين هو بتاسم برضا ودخل سابقها لي لداخل وخداو الطبلة لي كانو جلسو فيها اول مرة كان باين و واضح عليها الحزن و الكآبة فقلبها لي من الأصل كان باقي كيضرها على هاد الحگرة لي كتحس بيها الشيخ فوزي : تشربي شي يا بنتي؟ نورة : [ نطقات برفض قاطع ] لا شكرا الله يخليك كايبسط معاها بقدر الامكان الشيخ فوزي : [ تنهدو عينيه على الضربة لي فوجهها ] مصاريك عندي فوق اذا تريدي شوي و بجيبهم لك سكتات كاتفكر .. ها هي عندها الفلوس شنو تقدر تدير بيهم فهاد المدينة دابا؟ و هي عارفة بلي فاروق غايكون فيها تقدر شي نهار تتصادف معاه فشي قنت ايوا وشنو غادي دير داك الساعة؟ إيلا ماخرجات من المغرب غاتبقا كل مرة هاربة لقنت ... الفكرة ديال فيروز ليها ولي هي الخروج من المغرب لحد الساعة كاتشوفها هي أنسب حل نورة : [ حطات يديها فوق الطبلة ونطقات بتردد ] انايا عارفة راسي زدت فيه شويش و انطلب منك حاجة كبيرة بالحق والله ما عاندي ما نعمل بدوك الفلوس وانايا فالمغرب تينا عارف مانقدرشي نكري ولا نسافر ويانا البوليس ايفتشو عليا [ حدرات راسها كاتلعب بصبعانها بتوتر ملحوظ و خجل حممر ليها حنيكاتها ] قولت زعماك واش تقدار تخروجني برا البلاد؟ [ نطقات بزربة كاتبرر هضرتها والله ما نتشرّط على البلاد لي انمشي ليها فاينما مشيت ماعانديشي مشكل يانا باغا غي نخروج برا البلاد و نبدا حياتي من جديد طول فيها الشوفة كيفما طول حتى فسكاتوحتى شكات فأنها كتطلب منو المستحيل .. أبجديات وجهها تعكرو بمزاج قبيح خسر ليها الملامح البريئة لي على وجهها في حين هو قلب وجهو يمين و شمال بحالا كايشوف واش شي حد حداهم و فعلا كان حداهم الزايد الشيخ فوزي : تعالي معي شوي لبرّا حابب احكي معك فموضوع ناض وتبعاتو حتى هي ، خرجو و بعدو من تما شوية على بنادم عاد نطق الشيخ فوزي : في موضوع راح احكي معك فيه بس إلزامي ماتحكيه لحدا ، تمام يا بنتي؟ نورة : [ هزهزات راسها ] كون هاني انايا ماعاندي مانقول و لي قولتيه ليا ايبقا هنا بيناتنا الشيخ فوزي : هاد الموضوع مابيشكل خطر علي يعني اعتبري الموضوع لمصلحتك اذا ضل سر طلقات ودنيها معاه وفعيونها نظرات فضولية باغا تعرف هاد الهضرة لي باين فيها شي حاجة سرية نيييت ، إحساسها كان صحيح وكانت فعلا سرية وفنفس الوقت ماكاتتقالش لكلشي الشيخ فوزي : تعرفي يا بنتي ايش خلاني اتق فيك؟ حاسس روحك طاهرة وبريئة وشغلك مو شغل الهوايش ، المهم يا نورة يمكن للحين ماتدري شي على شغلي هزهزات ليه راسها بنفس العيون الفضولية المتلهفة لداك السر نورة : الصراحة عاندك الحق باقا ماعارفاشي فاياش اتخدم [ حلات عينيها حتى اللخر ونطقات ] ماتقولش ليلي فالحش/يش؟ ضحك ضحكة خفيفة كاتناسب عمرو و شعيرات لحيتو البيضاء الشيخ فوزي : لا يا بنتي لا ، تجارتي الحمد الله و النعم بالله كلها حلال ما بقبل بفلس الحرام [ سكت لثواني كايشوف منين يبدا عاد كمل ] انا يا بنتي تاجر في الشرق الأوسط ، التجارة تمشي بدم عيلتي والحين عندنا علاقات وشبكة قوية ما بين آسيا و أوروبا الحمد الله مافهماتش واش هدا هو السر؟ .. تحيدو من عينيها نظرات الفضول ونطقات بتساؤل نورة : الله يزيدك من عاندو الشيخ فوزي : امين يا رب المهم يا بنتي ، انا عندي أسطول سفن حاويات لنقل البضائع يعني مَرّات بيكون عندنا نقل لأمريكا و بيكون ميناء طنجة محطة إستراحة و بعدا بنكمل طريقنا ، فاهمة كلامي صح؟ بحاول أبسط لك و اتمنى بكون بسطت نورة : [ هزهزات راسها ] فهمت فهمت غي كمّل الشيخ فوزي : [ ستأنف هضرتو ] تعرفي اذا كان في محطة استراحة بشي دولة يعني بيكون إحتكاك و كلام بيني و بين شعبها وهاد لي صاير لي مع الشعب المغربي والافريقي ، مرّات بحمل معي شباب و بوَديهم يشتغلو معي وَلّا بوَديهم لشي دولة فطريقي كَمُساعدة ماتخافي ما بدَور على مقابل بس تعرفي الموضوع مو قانوني والحمد الله للحين ماصاير مشاكل ، لساتك فاهمة كلامي صح؟؟ شافت فيه بنظرات تساؤل ممزوجين بالحيرة ديال واش داكشي لي فهمات هو ولا ماشي ه نورة : يعني اتزور لوم الوراق؟؟ الشيخ فوزي : لا يا نورة لا ، شغلي مو شغل تزوير يعني بس النقل بساعدك تسافري و بعدا تقرري اذا كنتي تريدين تشتغلي معي ما بوعدك بالغنا بس على الاقل تدبري امورك هنيك و اذا ما كنتي حابة تشتغلي معي تقدري تروحي شَرطي الوحيد هاد الكلام يبقى بيني و بينك ، الموضوع ما يشكل تهديد لشغلي الحمد الله سمعتي و سمعة عيلتي الكل يشهد عليها ، عيلتي معروفة بالكويت وأعمالنا معروفة شرعية وقانونية يعني ما في حدا يصدقك بس راح تجيبي مشاكل لراسك و راس الشباب والبنات لي بيكونو معاك .. فاهماني صح؟ فهمات مزياان بلي هو لحد الساعة باغي يعاونها كيفما فهمات بلي باغي و فنفس الوقت ماباغيهاش تبيع بيه و من الأساس واخا كون زغبها الشيطان و بغات تبيع بيه ماكانت غاتستفاد والو ببساطة كانت فعلا عائلتو سمعتها نقية 100٪ لدرجة الباخرات ديالو براسهم ماكايتقلبوش من طرف شرطة الموانئ بسبب تاريخ عائلتو العريق فالتجارة القانونية الشرعية لي ماكايخالفوش بيها القوانين ، الخاسر الوحيد ايلا شكمات بيه غايكون هي ودوك لي غايحرݣو معاها اما هو ببساطة غاينكرهم ايلا شكمو بيه بلي كايعاونهم يحرݣو " كذبة خارجة من فم بورجوازي كاتعادل 10000 حقيقة خارجة من أفواه الپروليتاريين ... ببساطة الصدق فالكلام ولا كايتقاس بكارط ݣيشي و شحال عندك فالكونط و السلام" نورة : لا لا ماتخافشي والله العضيم انايا ماشي شكّامة و ما انعضشي اليد لي توكلني الشيخ فوزي : [ سولها و هو متطلع لجوابها ] يعني موافقة تسافري؟ نورة : [ هزهزات راسها و الفرحة غاتخرج من عينيها ] عاد كاتسَقسيني ادا انقبل نسافر ولا لا ، قابلة و بااغا نسافر والله عمرني ننسا لك هاد الخير حياتي كُلّاا واخا نعيا نشكر فيك عمرني نوفي مشاو عينيه لوجهها ونطق الشيخ فوزي : نيتك يا بنتي كانت بالخير و تستاهلي الخير ، المهم تريدين اعطيك مصاريك الحين لحتى ترجعي للبيت؟ و بكرا و ارجعي لعندي لنحكي على سفرك و ها الشغلات تفكرات فاروق لي كايقلب عليها و عاودات بهاتت الضحكة من وجهها نورة : مانقدرشي نمشي ، كونت باش نقولك اليوما فاش مشيت ندار المرا لي انسكون معاها تشوفت [شفت] تما فاروق الراجل لي قوتلك كايفتش عليا [ تنهدات بضيق و عدم إرتياح ] و دابا منقدرشي نرجع لتما حيت يقدر يتشوفني [ يشوفني ] الشيخ فوزي : هاد الرِيال للحين بيدور عليك؟؟ نورة : [ بضيق ] مزال كايفتش عليا مانقدرشي نرجَع نديك الدار جلسات فالارض و هي كاتفكر فحريرتها ، فين غاتبات تاني هاد الليلة؟ لوطيل؟ ايوا ولا طلبو لها لاكارط منين غاتجيبها لهم؟ .. هزات راسها فالشيخ و فعينيها نظرات تردد شاهدة على شنو كايحاول اللسان ينطق بيه نورة : [ بتردد ] نقدر نطلب منك طليبة خرا يرحم لك الوالدين ، انايا عارفة راسي كترت عليك بالحق والله تا تتقطع بيا الحبل ومابقيت عارفة فاين نبات هاد الليلة [ شافتو باغي يهضر ونطقات بزربة ] والله تا هادي هي اللخرة ماباقيش نعاود نطلب منك حِتة حاجة ، تينا عارف انايا ماعَنديش الكارطة وما ايقبلوش يمكن نسكن عندوم فلوطيل بلا ماتكون عَندي كان أدرى بوضعيتها و عارف مزيان ماعندها فين تبات مدام هدا لقاها تم ، سكاتو مشكوك فيه ولكن تعابيرو كانو يمكن كايشعلو بصيص أمل في فاقد الأمل الشيخ فوزي : كنت حقدم لك ذا العرض بعرف ماكو حل غيرو معك [ هز عينو للسما و دورهم فالزنقة ] الشوارع بالليل مايتحملهم الريّال شلون تݣدر تتحملهم الحرمة مابقاتش قادرة تقول شي حاجة حيت فعلا كاتشوف راسها واخا تشكر حتى تعيا ماغاتوفيش ليه ، هاد الشيخ جاها بحال درهم الحلال وماعارفاش نهائيا كيفاش ترد ليه جميلو ماكانش فراسها بلي هو من الأساس كايشوف بلي وجهها لي مشا ، مشا بسبابو ومن خبرتو و السنين الطويلة لي عاش بين الناس كان عارف مزيان بلي الجرح لي فوجهها ماشي غير جرح و دايز و انما غاتقدر تعاني بيه حتى ايلا بغات تمشي تخدم غايشوفو لها فمرايتها ، ولا بغات تتزوج غايشوفو مرايتها هي اللولة واش مخدوشة نورة : [ بتاسمات ] مابقيتشي قادرة نقولك شي حاجة من غير ربي شاهد عليا شحال فرحانة لاحقاش مديتي لي يديك وسط الضلام ، انايا قول ليا غي فيواخ [فوقاش ] انخرجو من المغرب ؟ و انخلص على راسي فلوطيل فلوطيل مانتقلش عليك كتار من هايدا الشيخ فوزي : شغلتها شغل أسبوع و بسفرك برا البلد ولا تاكلي هم الاوتيل انتي ضيفتي بقات كتفكر الليلة بشحال اتكون هنا زعما؟ لوطيل باين فيه غااالي گاع يقدر شي 50 الف ريال الليلة بلعات ريقها و هي كتشوف بلي فلوسها اتساليهم و غاتمشي لتما صولو ما عندها تا ريال نورة : وشحال الليلة هنايا؟ [جاوبات راسها ] باش تكون بشي 50 ولا 60 الف ريال ياك؟ باينة فيه لاحقاش بحال هاد لوطيلات ايكونو غاليين شوية بالحق كون هاني انايا لي انخلص على راسي هاد السيمانة كولّا ترسمات على تجاعد جبهتو و حناكو إبتسامة و هو كايسمع الثمن لي قالت ليه الشيخ فوزي : لا با بنتي 1000 درهم كافية الليلة وحدة صدمها بهاد التمن اوااه واش هدا كلوو ب1000 درهم؟ وي هي حاليا ماعندهاش ولكن جاتها فشكل و تفاجئات و توسعو عينيها بالصدمة الممزوجة بالفرحة و هي كاتقلب بعينيها فلوطيل نورة : [ ضحكات ] والله العضيم تصدمت و انايا لي كنت انقول باش يكون غاالي بزااف [ جمعات ضحكتها ] ياكا ماكاتكدبشي عليا؟ حرك راسو بلا و ورجعاات ضحكتها ترسمات على وجهها نورة : والله تا كان يزيالي [ حسابلي ] غالي بزاف مجاوبهاش حدو بدا كايضحك ضحكة خفيفة على فرحتها كاتفكرو غير فوحدة من بناتو عايشة فأمريكا سذاجتها من سذاجة نورة ، دييما كايشوف ديك بنتو ماتقدرش تمشي لشي بلاصة بلا مايكون شي حد مسؤول عليها بحال نورة تماما باش ماضيعش ... على الاقل هاكا يقدر يعوضها على الضرر لي تعرضات ليه دخلو للوطيل ومشاو للريسيپسيون باش ياخد لها الشيخ شومبر معاهم فلوطيل وفبالها كاينة الحاجة حنان لي باقا ماقالت لها لا فين هي والا واش غاتجي .. أجلات الموضوع حتى دخل بعدا وتترصا فالشومبر وتتعزل عااد تهضر معاها ° عند فيروز ° واقفة فكوزينتها وحداها زلافة دايرا فيها تخليطة ديال عسل الدغموس وزيت التومة كاتدهن بيها صبعها لي محروق على الله مايبقاش الأثر ديال الحرقة في حين عقلها كان مع ناسها لي لتحت ومعاه هو ... لا هو فطر فالدار لا هي هبطات تفطر ، كون ما نجية لي جابت لها الفطور موحال واش كانت غاتهبط بقات كاتدهن بحذر حتى مشاو عينيها لواحد لاطراس كاينة فيديها من الضرب ديال البارح ، عاودو مشاو عينيها للزلافة لي فيديها وداكشي لي فيها .. كانت عارفة مزياان بلي عسل الدغموس كيما قادر يكون دواء ليها قادر يكون داء ليه هو و كيما قادرة تخدمو فزينها و جلدها قاادرة تهيج ليه بيه جلدو ولكن هي ماشي بحالو ماعندها ضمير. قادرة تطيحو فالفراش و قادرة تستغل داك المصنع ديال السموم لي كايشوفوه فالسطاح و كايسحابلهم غير نوّاار عادي و ربيع عادي بلا مايعرف حتى واحد فيهم بلي جابو لها سلاحها حتى لبين يديها وخلاوها تعتني بيه و تكبرو و تربيه بلا مايعرفو بلي هي عارفة كل نبتة تما و اش كاتسوا و شمن منفعة و مضرة ولا كانو هما كايشوفوهم نباتات زينة ديال الدار هي ماكانتش كاتشوفهم هكاك ، لعنات الشيطان من شي أفكار طاحو فبالها و كتافات بوحدة من الحِيَل لي كانت موالفة ديرهم فدارهم. غسلات ديك الزلافة و غبراات أي حاجة فالكوزينة غاتخليه يعرفها باش كاداوي صبعها ، طلعات للسطاح ومشات ديريكت لواحد الغرس موررد و مزين بواحد الورد فالموڤي ، موالفين الناس يشريوه و يزينو بيه دارهم. سميتو كانت كاتبان كيوت مقارنةً بالسم لي فيه و شكون يقول ديك الوريدة ديال " سِت الحسَن " قادرة ضر وداوي ، تقـ/تل و تحيي مولاها خاصو غير يعرف كيفاش يخدم بيها ... تفكرات أغنية كانت كاتتسنط لها فالام بي طروا و بدات كاتدندنها وتغنيها بصوت عذب و منخفض و فنفس الوقت كاتختار شمن وريقات تقطعهم و مايبانوش منتوفين " أجمل من ست الحسن رقة ودلال ... وحلاوتك مفيهاش حزن ولا تتاقل بالمال " " الحلم يلي تمنيته وعشانه بقيت رحال ... ياما سنين إستنيته وكأنه سراب و موحال ولاكانش يا ناس على البال" " الاقيه بيا خدني لحضن اجمل من ست الحسن " " يا ما الحرمان بيطول وبيملى العمر صدود " " لاكن حسنك مالاول خلاني ابات محسود " "واشوف اجملها ورود تتمايل فوق الغصن" "اجمل يا اجمل من ست الحسن" قطعات وريقات منها و هبطات ... مابغاتش تقيس الورد حيت غرضها ماشي تتسبب فشي ضرر كبير و مابغاتش تحفر على جدورا حيت غرضها ماشي تقتـ/لو و من الاساس هاد 2 أفكار هما لي عممرها تفكر ديرهم ، غير باش تفكر فأنها تزهق روح هاد الفكرة بحد ذاتها كاتخلي التبوريشة طلع معاها هبطات للكوزينة ديالها و شعلات البوطة ، حطات دوك الوريقات من فوق مقيلة وبدات كاتقربهم شويية للعافية غير باش مايبقاوش طازجين ييبسو شوية و تخفف من النسبة ديال السم لي فيهم بقات واقفة فبلاصتها و عينيها مع دوك الوريقات و باقا كاتغني بصوتها العذب نفس الأغنية ، فبالها بلان و ماكان داك البلان إلّا نقطة البداية لي غاتبدا بيها باش تقدر تشد طلاقها بلا مايكون لا ضار لا مضرور شافت الوريقات بداو كاييبسو و حيدات المقيلة من فوق البوطة .. مع حطاتها فوق البوطاجي وهي تسمع صوت شي طوموبيل وقفات لتحت ، مشات بزربة تطل من الشرجم تشوف شكون شوية و هي تتفكر الهضرة لي قال لها على الشراجم ... رجعات اللور و باقا الغصة فقلبها على داك الضرب هزات دوك الوريقات و خبعاتهم عندها وغسلات المقيلة مرجعة كل حاجة لبلاصتها عاد مشات غطات شعرها وهبطات للتحت . قادات فولارها وهبطات للتحت ومع كل درجة كاتهبطها كاتتفكر غير بزيمو و ضربو ليها ، مشات جلسات مع النسا ديال العائلة دارت الصواب معاهم بحكم ماطلات عليهم ما عاوناتهم هاد النهار كان مرة مرة صوتو و صوت الحاج المرتضى كايوصلو حتى لعندها عرفاتو بااقي شوية جالس مع بّاه و ناضت جمعات الوقفة باغا تزرب على راسها قبل مايطلع شافت فالحاجة هنية فيروز : خالتي دشروب اتاي؟ انمشي نطيب شي بريريد داتاي الحاجة هنية : [ ضربات ضربات خفاف فبلاصة حداها ] غي اجي جلسي ا بنتي ها ختيمة ولا اسماء غاتنوض تعمر لينا شي براد فيروز : ا لا ا خالتي مادقولش هايدا يانا ماعملت حِتة حاجة هاد النهار غي خليني نمشي نعمر بريريد [ شافت جهة الباب ديال الصالون ] يانا انعمر انعمر حِقّاش باغا نعمر بريريد اخور الفوق أسماء : ايوا تسناي ا مرات خويا نيت هانا جاية معاك نقاد معاه الطبيسلات مشاو ب2 للكوزينة .. دارت لهم اتاي ودازت لبيت الخزين لي كايديرو فيه التموين و التقضية بالزايد ... هزات منو قوام أتاي والتقاوت والتمر عمرو بيه الطبيسلات لي غايحطوهم مع اتاي هنا لتحت وهزات معاها حتى شنو غاطلع للفوق راادة ليه البال مزياان عزيز عليه أتاي وفشحال من موقف لقات الناس كايضايفوه بيه فبلاصة القهوة إبتداء بالفقيه حتى لداك العربي الذهايبي. حطو لهم أتاي و تقاوتو فوق الطبلة ومع بغات تطلع وهي تسمع الفيكس كايصوني ، ماتسوقاتش ليه وكملات طريقها للدروج باغا تطلع حتى عيطات لها أسماء أسماء : فيروزة اجي تكلمي ا ختي لمرت خوك طارق فرحااات منين عيطات لها ، على الأقل هي كاتحس بيها كاتفهمها شوية ..مشات شدات من عندها لابار فيروز : شكرا ا ختي اسماء [ حطاتو من فوق ودنيها ] الله يا مرت خاي شني هاد الغيوب مابقيتي دسقسي فيا ما والو أميمة : طال غيابك يا غزالي ولا ماصونيتش عليك ماتصوني عليا؟ ياك زعما ديك المرة خليت لك النمرة باش مرة مرة نبقاو نهضرو انا وياك شافت فأسماء لي كانت باقا واقفة حداها وشادة حتى هي التيليفون ديالها فيديها ، رجعات عينيها لجهة الفيكس ونطقات وهي متفادية تبدا تعاود فيروز : غي سماحلي ا مَرت خاي والله العضيم ، كونت شويش عيانة وملهية تا مع توجاد لرمضان ، كيف نتينا بَعدا لاباس عليك؟ كي دوزتي يامك اللولة درمضان أميمة : الحمد الله هاد رمضان جاي شوية بارد هاد العام ، ونتي كي دوزتيه نهاراتك اللولين فرمضان؟ مزيانين؟ ولفتي شوية ناسك وولفوك؟ جاتها الضحكة على راسها ، الله اودي دوزات أول يوماين مخييرين فهاد رمضان يامات لي عمرها تنساهم فيروز : اه الحمد الله جبرتوم الله يعمرا دار ، ݣازو عندي هاد اليوماين اللولانية هنايا من احسن الايام لي عمرني نساهم فحياتي [ مشاو عينيها لأسماء لي هزات عينيها فيها ] هو تهلا فيا وعاملني كيما كانو كايعاملوني خوتي في دارنا فرمضان نتينا عارفة ا اميمة كايشبرو لينا الخاطر و ماكايخليوناشي نتقلقو فرمضان حِقّاش كايعرفو العواشر [ بتاسمات ] تا هو كايعرَف العواشر وكايعاملني مزيان و كايعمل بحساب العواشر [ تنهدات ] توحشت مّا وختي بالحَق تا هنا رمضان مزيون بعدات من حداها أسماء وخلاتها تهضر فراحتها مع عائلتها أميمة : مزال غاتوالفي هاد العام غايجيك شوية صعيب حيت كنتي موالفة دوزيه لهيه مي من هنا للعام غي تعرفي الاجواء والعادات ديال ناسك غايولي يدوز عندك بحالا كادوزيه فدار ولكن هداك لي قلتي عليه هو كي كايتعامل معاك ا فيروزة؟ من هاد " هو " ديالك ماعجباتنيش .. واش كايعاملك بالخايب ولا الزوين؟ فيروز : [ ضحكات ضحكة خفيفة كاتستهزأ فيها على راسها ] علاش ا مرات خاي فاين عمر كانت التانية؟ دايمان كان ايعمل اللولانية أميمة : [ قرنات حواجبها بعدم إرتياح ] اشمن مشاكل واقعين لك معاه؟ واش مزال مامفاهمين؟ فيروز : لا مزال حِقّاش كاين نوع ادقدر دهضار معاه ودعمل معاه ديكشي لي قولتي لي وكاين لي لا ، هو شكل و خاي طارق شكل اخور أميمة : شوفي ا فيروزة سمعيني وحلي وديناتك معايا مزيان ، سوا يكون طارق سوا يكون راجلك سوا يكون الشيطان بعينيه غي تعرفي الكود ديالو غايولي زبدة بين يديك ... واش درتي داكشي لي قلت لك ديك المرة؟ فيروز : [ زفرات وهي مضيوومة ] لا ماقدرتشي ... يتبع معلومة 👇👇👇
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
ست الحسن يا ست الحسن ... هاد النبتة بالضبط من أكثر النباتات لي تقدرو تشوفوهم فالزنقة مايمكنش تكوني عمرك شفتيها ، عندها شلاا سميات و من بيناتهم [ قاتل الليل ] هاد النبتة بجذورها و ثمارها و ورقها فيها الداء و الدواء و تقدري ديريها غير زينة بحال كي كايديروها كاع الناس ولا باش يجريو على البخوش و الرتيلة ولكن اضرارها كتر من منافعها .. نبداو بالمنافع ديالها - كاتضبط النبضات ديال القلب - كاتهدأ الاعصاب و كاتخلي ذاتك نيت ترتااح و تترخا - كايدخلوها حتى فعلاج الإلتهابات ديال العين - مزيانة للدوخة و الردة - مزيانة للقولون العصبي - كاتقلل من الرجفة و مزياااانة بزاف لبنادم لي كايعرق بزاف - مزيانة للرواح و للسخانة والكحبة ... مزيانة لداك لي ماكايتحكمش فالبولة ولكن ايلا ماعرفتيش كيفاش تستعمليها ... ماكاتوليش كاتضبط النبض ديال القلب و انما كاتزييد فسرعة نبضات القلب .. نفس الشي للسخانة ايلا ماعرفتيش كيفاش تستعمليها غاتصدق مطلعة لك السخانة كتر فبلاصة ماتهبطها لك وتقدري دخلي فغيبوبة 🤌 ... ماعرفتيش تخدمي بيها و نتي باغا تعالجي المشكل ديال البولة؟ غاتقودي السوايع فيها و غاتصدقي مزييرة الفران حتى اللخر و اش جا ما فكها ... زيد عليها كاتسبب مشاكل فالرؤية من غير هادشي هاد النبتة كاتسبب الهلاوس و يقدر الموضوع يتطور لمشاكل عقلية ... زيد عليها كاطلع الطونسيو وواخيرا ثم اخيرا قادرة تقتـ/ل بنادم سوا كبير سوا صغير ... هدا علاش ايلا كان عندك شي دري صغير فالدار غير بعديها عليه ومن الاحسن ماتزوقيش بيها الجردة حيت هي فالاساس ماشي غير للتزواق الاجزاء الاكثر سمية فيها هما الجذور و الثمار ديالها .. الوريدات ديالها ، طبعا كاتبقا المسألة مسألة طريقة الإستعمال تعديل : راه كاينة هادي و كاينين شي 2 ولا 3 وحداخرين كايشبهو لها شوية فالشكل ووحدة منهم ماعندهاش شي اضرار خايبييين نيييت
