• عـنـدو •
كان جالس وسط الصالون هو و الحاج المُرتضى و مُصعَب كالعادة عاصرين على واحد البراد ديال أتاي
الحاج المُرتَضى : [ شاف فمُصعب و نطق بصوت وَقور ] اش درتي مع الخضّار؟
مسح قرفادتو بيديه و باين عليه عَدَم الإرتياح
مُصعَب : هاني طلقتو ا بّا حتى وكان تتنسا ديك القضية [ زيير على الكاس ماعاجبو حال ] غايبقا الكلب شهر و هو كايضور
هز البرّاد كايعمر كاسو و فهاد الاثناء نطق و عينيه مع الكاس ديالو
عِز : مضاربة الشفّارة ماكاترزيكش غير فالبزاطم
مُصعَب : و اش جاب ولاد علي و مضاربتهم لداك الكلب؟
[ ولاد علي : الشفارة ]
جغم من كاسو و نطق و عينيه مع خوه
عِز : ضبر على جوج من الدراري ديالنا لي فالدرب الكبير و سيفطهم بالسيوفة ينوضوها بيناتهم فالمارشي
بقا كايضور هضرتو فراسو و فهمو اش قاااصد ... مضاربة الشفارة معروف عليها كاتكون مضاربة كدّابية كايديروها بيناتهم بلعاني باش فاش يجيو الناس يفكوهم يستغلو الفرصة و يضربو لهم البزاطم و التيليفونات
عِز : بحال هاد المضاربات كايخص لي يفك [ سند ضهرو على المخدة لي وراه ] ديما داك لي كايفك كاتجي فيه الدقّة
كان هاد البلان هو لي غايشفي ليه غَليلو .. يعرف داك لي زعم الزعامة ديال يتغزل بختو مابقاش عايش و فالحقيقة ماكانش متافق مع عِز فاش قال ليه يصبرو شهر تتنسا ديك الحالة لي دار فالخضّار فالسوق ولكن هاد الهضرة لي قال دابا و البلان لي يقدر يتطبق مباشرة من مور مايقدر الخضّار يرجع لخدمتو كان عاجبو
مُصعَب : ماتعرف هدا لي غايجي يفك دوك لي مضاربين تفلت شي دقة من شي سيف يشرݣوه بيه
نطق بإعتراض واضح
عِز : لا ، دوي معاهم مايضربوهش شي ضربة تقتـلو خليه يخليوه مليوح تم كي الكلب و سيفط لو شي واحد يهزو على ود السبيطار حتى يوصل لنص الطريق
مُصعَب : ماغايكونش عندنا الوقت نديوه حتى للطاحونة هادشي غايدخل الشك بالتعطال
عِز : شكون ݣالك تديه للطّاحونة؟ يوصل لنص الطريق و طلع كمل عليه عاد خليه يكمل طريقو للسبيطار
تغلغل للمَسامِع ديالو صوت ضحكتها و هي دايزا من حدا البيت لي كاين جنب الصالون .. ميل عينيه للجهة لي جا منها الصوت ولكن مابانتش ليه كان باين غير كانت دايزا من تم .. عاود شاف فخوه و نطق
عِز : دوك المضاربات كايطراو فينما مشيتي [ حط كاسو ] غايبعدو علينا العين
عاود شاف فولدو مُصعب
الحاج المُرتضى : ماوصلاتك حتى شي خبار ا مُصعب؟ داك الخضّار ماعاود والو عليها؟
مُصعَب : لا ماسمعت والو و السيكتور فين ساكن كانعرف تم واحد خيتي جارتو مشات عندو للسبيطار سولاتو على شكون دار فيه ديك الحالة ولكن ماجبدش السمية
أنت تقرأ
زوجة الكولونيل / COLONEL'S WIFE
Romanceهو : تَبْتَغين من غضبي الخمود ... وتأملين أن أضع أصفاد لأسد غيرتي بينما أرى حولك من الرجال حشود ... تستقصي من زئيري الجُمود ... ومن ردود أفعالي الخمود ... بينما تجوبين دروب الفجور بأنوثتك الفاتنة ا ولا تعلمين أن الفتنة أشد من القتل وأن حكم الفتنة هو...
