ضحك ضحكة رجولية على هضرتو ونطق
فاروق : الله يهديك ا عمي العربي ، كرش وحدة خرجنا منها انا وياها [ شاف فعِز ] راجلها ها هو جالس معاك
بّا العربي : تبارك الله ، الله يجعل كلشي مبارك ومسعود [ شاف فعِز ] قول ا ولدي هاد العزبة لي هضارتي لي عليها
نطق بصوت رَكين مميزاه ديك البحة ديالو
عِز : هادي باش غانعمر داري ا بّا العربي ان شاء الله
بّا العربي : اللهم باارك ديتي وعرفتي اش تدي ماكانسمع على بنات الانصاري غير الخير ، ديتي وعرفتي اش تدي لدارك ايوا مانزيدكم غي الله يكمل عليكم بالخير [ مشا للداخل ] قولتي ا ولدي عِز باغي خاتم ديال النسا
دخل للداخل وبدا كايقلب على شي سلعة كان مخبيها في حين فاروق شاف ففيروز و اشار لها بعينيه باش تجي.
° مجيتهم للهنا ماكانتش ناوياها ، زهرها بااقي واقف معاها وقفة ديال الرجاال حمدات الله وشكراتو منين وقفاتها لالة فخيتة اما كون جات للهنا وخرجات فعِز ولا يصدق السيد شايفها ومن بعد يبقا عاقل عليها كانت غاتكون مشكلة خرااا هادي و اش جا مافكها منها
قربات لعندهم من ورا ما شافت فاروق كايعيط لها .. من واحد الناحية ماكانش عندها غرض اصلا بهاد الخواتم ، ديك الصفورية ديال الذهب من عند الله كاتهرب عينيها منها وزيدها دابا حتى قلبها لي هارب من داك لي واقف من الجهة الثانية ديال خوها .. ماحاملاش تجمعهم بلاصة وحدة ختارت واحد غير من الطرف وهي ماعندها غرض لا فيه لا فالشكل ديالو
فيروز : [ نطقات بصوت هادئ ] صافي ا خاي فاروق بغيت هدا
شاف فيه ورجع شاف فيها شي شوفات فشكل ولكن ماهضرش ، شوفاتو رداات لهم البال وعرفااتهم وقراتهم وهادشي بضبط لي خلاها تعااود دير إعادة النظر فالخاتم لي ختارتو لقاتو ماشي من الذوق ديالها من الاساس أباار الذهب لي كانت عائلتها عاارفاها ماعندهاش معاه ... كان خاتم كايتكون من 2 وب2 تقاال وعاامرين
فيروز : [ رجعات نطقات بنفس الصوت الهادئ ] ولا شوف لي شي واحيد يكون غي خفيف ا خاي فاروق هدا عامر بزاف وغايتقل لي على يدياتي
عِز : [ نطق بنفس الصوت الركِيين ] ماكاينش عندك شي واحد بدهب لبيض ا بّا لعربي ! ولا كان مافيهش كترة الزواق غايكون حسن
فيروز : [ قربات لودن فاروق وتعلات على صباعها وهمسات ] خاي فاروق قولو بغيتو يكون فيه شويش دزواق مابغيتوشي يكون بحال لخاتم درجال [ رجعات تقادات فوقفتها وبقات لاصقة ففاروق ]
فاروق : [ شاف فعِز ] مايكونش عاوتاني ناشف ا صاحبي ، ولفتي على الصيك فكلشي
عِز : كترة زواق بلا فايدة ماعندها ماتزيد ، هاد لعام تختار شكل ولعام جاي تلقاه ديموضا وخرج شي عجب خور
أنت تقرأ
زوجة الكولونيل / COLONEL'S WIFE
Romanceهو : تَبْتَغين من غضبي الخمود ... وتأملين أن أضع أصفاد لأسد غيرتي بينما أرى حولك من الرجال حشود ... تستقصي من زئيري الجُمود ... ومن ردود أفعالي الخمود ... بينما تجوبين دروب الفجور بأنوثتك الفاتنة ا ولا تعلمين أن الفتنة أشد من القتل وأن حكم الفتنة هو...
