زوجة الكولونيل / COLONEL'S WIFE

PART 103

طلـــع يدو لحناكها و زاد غررز فيهم صبعانو حتى غمضاات عينيها وزييرات عليهم بالحريق

زمجر بصوت مُحتَدِم وفعينيه شوفات ظلامهم كان سَواد فسَوااد
عِز : أش ݣلت لك قبل ماتهودي لعندهم؟

الرعاادة لي عممر ماركباتها فيه لا مراتو اللولة لا لي سبقوها لا لي جاو موراها وسط شي مجمع جات هي ركباتها فيه لتحت وخلّااتو مبررد حرّو فلسانو و سنانو و شاد راسو بزز باش يكمل فإكرام الضيف لي معروف بيه هو وعائلتو .. بلا ماينووض النباش لي هي نوضاتو فيه والا يدير شي مشكل يقلب ديك الجلسة عليها و على جلستها وسط مجمع ديال الرجال الله يجعلو يكون فيها غير هو و بّاها و خوها ماتخشيــش راسها فمجلس فيه الرجال لي خواتاتو و مها و كانو عارفين بلي نااقصة يتطفلو عليهم و مشاو تركنو فبلاصة خرا بيناتهم

غاتحممقو هاد البنت ... غاتحممقو بفعايلها بحماق ماعندو دوا .. فين لسانها؟ و فين صوتها؟ وفين دوك الشفايف لي من فاش حلاتهم مع جدها مابقات سدّاتهم حتى حممر فيها

طلق من حنكها لي كان غيير ماكايزييد يبجغهم ليها بصبعانو وحتى قالت غايبعد منها و هو يسككت لها الحس بضربة ضربها فالباب من موراها بجججهد قفـــزها بيها من بلاصتها

عِز : دوي دابا مال حسك تقطع...!!! لتحت مع جدك كان اللسان عندك مسررح ياك؟!!

بلعات ريقها وهي عارفة راسها مزياان اش دارت ... الطليب و الرغيب؟ عارفاه مانافعش .. البكا؟ حتى هو مانافعش و ماغايبرردش هاد الغضب لي كانت حاسة بيه بدا كايشعل فيه شوية بشوية .. كان عندها حل واحد فايت عطا نتيجة و حتى هناء شجعااتها عليه و هو بفمو قال ليها خاصها تزيد

حل لي عممرها توقعات ديرو ولكن مابغااتش لحمها يتزوق هاد النهار .. مابغاتش بكاها يوصل لختيمة وتتشفا فيها خصوصا منين تأكداات بلي هي مولات الزاج فالكحول

تزعم؟ لا ماتزعمش ... تزعم؟ لا بلاش ... صافي تزعم؟؟ لا لا لا ماتقدرش

ماعرفاتش منين جمعات ديك الزعامة كاملة والجرأة باش دير فعلة عممرها تصورات فحيااتها تقدر ديرها .. فعلة كون قال لها شي واحد فشي وقت غاديريها غاضحك عليه .. تعلات بزربة على صبعانها وقلبها كايضرب فالتسعييين و قبل ماتتراجع ولا تفكر ثاانِية فديك الفعلة غمضاات عينيها وطبعات قُبلَة بارِدة على شفايفو بالخف و رجعات هبطات بزربة .. قلبها غااايسكت بسباب الخفقان ديالو ، حاسة بوجهها غايتفرݣع بالسخوونية لي طلعات معاها من الحشمة و التوتر و الخلعة مابقاتش عارفة ݣااع فين تحط وجهها ولا تخبيه و من الاساس مابقاتش قاادرة حتى تهز عينيها فيه و موحال واش تقدر تشوف فعينيه فالوقت القَريب من مور هاد المجهود الجبّاار لي دارتو باش تبرردو

لا جَواب ... لا رَد فِعل ... وَلا كلمة خرجات من جوف شي واحد منهم كان الصقيييل فديك الطبقة .. ماهررسو غير صوت الهضرة ديال الناس لي جاي من الزنقة و شي طوموبيلات غاديين جايين و وأخيرًا...