زوجة الكولونيل / COLONEL'S WIFE

PART 13

رحب بيهم بيدما يجيو باه وجدو اما فيروز طلعات للبيت وسدات عليها ، ماعطاتش الراحة لرجليها بالمشي والمجي لي بقات غادا جاية بيهم وهي كاتفكر فحريرتها خايفة غير يمشي يفرشها حيت ببساطة خوتها خاصهم غيير دليل ، دليييل واحد ومايزݣلوهاش بيه

مشات وقفات فالشرجم وهي دايرا السناطات فودنيها مبرونشياهم كالعادة مع ام بي طروا وجالسة كاتتسنط وكاتطل وهي حاطة راسها على يديها ومرة مرة كايهبطو عينيها للتحت

حالتها ماكاتفكرها غير بالميلودي [ شريك ] لي الاميرة ديالو محبوسة فقصر ولكن مؤخرا من ورا ماتفرجات فالسيدي ديال راپونزل ولات كاتحس براسها حتى هي فنفس الحالة ديالها ولكن دوماج شعرها ماغايسلكهاش بحالها باش تبقا كل مرة تسلت ، لي غايسلكها هو تخدم داك العقل او بالاحرى يرجعو لأسطار و هادشي ايلااا عاودات خرجات هاد الايام ، حاليا خاااوية راسها من الخروج على الاقل غير على ماينساها خوها.

اما لتحت كانو جالسين الرجال بيناتهم حتى خلط عليهم سعد وبداو كايحطو فالغدا ليهم وفنفس الوقت الهضرة ضاايرة بيناتهم حتى تجمعو فوق الطبلة وكملو كلامهم وهو كايوجدو باش يتغداو معاهم

الحاج المرتضى : واقيلا باقيين معطلين ياك ا ولدي فاروق؟

فاروق : [ كايقطع الخبز ويحط ] دويت مع طارق وعلى ماݣال راهم شادين الطريق باش يرجعو [ قرب الخبز لعِز ]

مصعب : جاي شبعاان ولكن هادشي ديالكم واخا يكون بنادم مسقوم كايرجع يجوع [ بدا كاياكل ] المرة الجاية علينا

فاروق : ان شاء الله علاش لا

مع بغا ياكل وهي تمشي عينيه لواحد الطرف ديال الخبز قطعو وماحطو غير فجهة عِز ... كانت فيه شي حاجة كاتلمع وبقا كايدقق فيها شحال ومع هزو عِز وهو ينطق

فاروق : بلاتي ا عِز شوف شكاين فداك الطرف ، بحالا بانت لي فيه شي حاجة

شد الطرف ديال الخبز وحلو يشوف اش فيه حتى بانت ليه مغروزة فيه واحد ليبرا ... طول فيها الشوفة شي ثواني ودماغو خشا وجا فيها عاد رجع حط ليبرا من فوق الطبلة

عِز : ماشي شي حاجة

حطها ليه من فوق الطبلة وهز طرف ديال الخبز خور اما فاروق غير شافها رجع تقلب ومابقاش فمزاجو 

فاروق : شي حاجة شمن ماشي شي حاجة ، كون دازت فحلق شي حد فين كنا غانوصلو [ هزها وناض قاصد الكوزينة ]

الحاج المرتضى : ماوقع والو ا ولدي بحال هادشي كايطرا

مُصعب : [ ضحك ورجع غمس الخبز ] ايلا غير ليبرا وحدة هاانيا ارا غير مايكونش كتر [ خشا الدغمة ففمو ]

سعد : [ ضحك حتى هو مبادلو الضحكة واخا ماكانش عاجبو الحال على ديك ليبرا ] ارا نسدو غير الجوع وتجي الموت لابغات تجي