زوجة الكولونيل / COLONEL'S WIFE

PART 33

عاونات الحاجة هنية تدخل لبيتها وطلعات بالخف لعند لوايساتها مخلية الرجال جالسين لتحت بوحدهم ، وداكشي لي نوات هو لي لقاتو ، لقاتهم مجمعين

[ الحوار بالريفية ]

ختيمة : [ شافت فمريم ] شفتيها اش دارت بنت الحرام؟ على شوية كانت غاتخلي لي يسوا ولي مايسوا يهضر فعِز 

أسماء : صدماتني فيها الصراحة ماكنتش كانتسنا هادشي يخرج منها ، النهار اللول لي شفناها كانت كاتبان حشومية ومتقلة

ختيمة : ا نوضي الله يجيبك على خير ، قالوها ناس زمان دوز على الواد الهرهوري ولا دوزش على الواد السكوتي [ مشات جلسات حدا مريم ] يحسن عوان عِز معاها

أسماء : يحسن عوانها هي معاه ، ديك المرة قلت لكم راه مامواتياش خويا ماصدقاتش لو التزويجة اللولة كان خصهم يشوفو ليه وحدة تكون بعدا بعدا عندها ديك 25 عام شاربة شوية عقلها وغاتفهم وتعرف اش دير معاه و اش ماديرش اما باش يزوجو ليه بنت عندها 19 العام؟

مريم : مابقاتش فواش عندها 19 ولا 18 ، كون نهار اللول شافو لعِز وحدة عائلتهم على قد الحال ماغايلقاش معاها هاد المشاكل والفشوش الخاوي [ شافت فختيمة ] ليلة الحنة جالسة تتشرط على النقاشة ، لاا ديري لؤ هادي لا ماديريش ليا هادي ، لاا غانلبس فالعرس هادي لا انا ماغانلبسش هادي حيت تقيلة عليا ، واش لي ماقاداش تهز التقل ديال توب بالموزون هادي يعول عليها تهز ليه ولادو فكرشها؟ [ حركات راسها بلا ] لا لا لا هادي ماصالحاش ليه

ختيمة : اري داك الراس نبوسو على هاد الهضرة ، والله يا ختي مريم ماكدبتي وشفتي جدها وباها شحال زلݣوها بالذهوبات؟ وباقا كاتتشرط لا انا باغا النقرة ولا الذهب البيض لا انا ماغانلبسش الذهب لصفر وا باااز لوجهها

مريم : قلتها وغانعاودها ، عِز خاصو وحدة درويشة يجيب لها غير خويتيم ديال النݣلاج تفرح بيه اما هاديك وزنتها بعيني وحطيتها من ديك ليلة الحنة البنت عندهم مفششة بزاف ونتي عارفة خويا ماعندوش الخاطر ديال الفشوش

أسماء : الله يدير شي تاويل ديال الخير ، يعلم الله كي غايدوز هادشي فاش ترجع

ختيمة : [ ضحكات وهي طانزة على هضرة اسماء ] علاش واش باقا كاتتسناها تدخل لهاد الدار من مور هاد الفضيحة؟ عمي راه حلف عليها لاحطات رجليها فهاد الدار

أسماء : [ قطبات حواجبها كاتفكر ورجعات نطقات ] ا لا ا ختي ختيمة بابا ماغايكونش قاصد اش كايقول نتي عارفاه فاش كايتعصب

ختيمة : [ دارت يد على يد ] ايوا وعمتي الحاجة؟ ياك نتي عارفاها ماكاتقول الهضرة حتى كاتكون متيقنة من اش كاتقول 

مريم : انا معاهم فديك الهضرة ، السيدة يعلم الله فين مدوزة هاد الليلة ومعامن ونخليوها تدخل لهاد الدار؟ عندنا الزريبة هنا؟ راه قالوها ناس زمان اللحم فاش كايخناز كايهزوه ماليه و ماليها راهم فدارهم غايضربوها الحيوط حتى تعيا وترجع لعندهم أما حتى عِز موحال واش يقبل بيها خويا هداك و انا كانعرفو