جمعات الجهد كامل لي باقي ليها وبدات كاتقاتل مع داك الطّوق باش تحيدو من عنقها ماعارفاش كي دير حتى قدرات ترخفو
حيداتو ولاحتو بعيد عليها .. كانت حاسة باللحم مقطع فيها من جهة بيطانها وحتى بغات تغمض عينيها وهي تسمع صوت الساروت كايدور فالباب ، عارفة مزيان ماكاين غيرو لي كايدخل عليها بالساروت ولكن الصوت لي كان كايتسمع هاد المرة ماشي صوتو هو و إنما صوت الحاجة هنية مع صوت أسماء و نجية.
× عند نورة ×
ل5 ديال الصباح كانت ناضت ووجدات لهم الفطور غطاتو وخلاتو فوق الطبلة .. جمعات الدار و وجدات الببوش حطاتو فالجنب كان باقي خاص غير يبداو فطيابو ، كان ياسين وأيوب معجبين منها ومن فياقها مع داك الوقت .. فطرو و شي مشا لخدمتو و شي مشا لخدمتو التانية لي كايخدم فيها من غير الكروصة لي كايقابلها أما هي جمعات الدار باش فاش تخرج وتمشي لجهة داك لوطيل يبقا بالها هاني.
تتسمع الصونيط ديال التيليفون مع 7 ديال الصباح و موراها تبعو صوت الحاجة حنان كاتفيق أسية وولدها الصغير باش يمشيو يقراو
خرجات الحاجة حنان لوسط الدار لابسة بيجامة من البيجامات ديال 600 ريال و باقي غالب عليها النعاس بسباب الوقت لي نعسو فيه معطلين .. ضورات عينيها على الدار بانت لها نقية ومجموعة وريحة سانيكروا ممزوج مع ريحة الحرشة مطلوقة فالدار ، ماحسات بيها ايمتا ناضت بحكم ما سمعاتش من الأساس التقرقيب ديالها
الحاجة حنان : الله يا بنتي نورة واش مانعستيش بالليل؟
نورة : لا لا ا خالتي نعَست وفَقت ، نتينا عارفة ماش نخروج بلاتي ديكشي علاش قولت نزول عليك شويش من تمارة ، ماتخافشي ا خالتي حنان ماقَربتش للسميدة لي عاندكم فالكوزينة .. البارَح شاطت لي 200 فرنك وشريت بيها السميدة وعدلت بيها اليوم الحرشة
الحاجة حنان : [ غوتات بالصوت الأمومي لي مولفين ولادها كايفيقو بيه كل صباح ] أسية فيقيي وفيقي خوك تمشيو تقراو غايمشي عليكم الحال [ عاودات شافت فنورة ] مزال الحال كون غير زدتي نعستي تا نفيقو مجموعين
نورة : ماتهزشي الهم ليا ، تا فدارنا كونت موالفة نفيق بكري
دورات عينيها على الدار كان بااين فيها موالفة تفيق وبااين عليها حادݣة وحاارّة ماشي شي وحدة فنيانة
الحاجة حنان : وفطرتي كليتي شوية؟
نورة : فطرت الحمد الله ، دابا انمشي نخروج نشوف على مولانا ا خالتي نجبر شي حل يدخلني لداك لوطيل
الحاجة حنان : [ قرنات حواجبها ] باش غاتمشي ا بنتي؟ ياك قلتي شاطت لك البارح 2 دراهم
نورة : انمشي على رجلي ا خالتي ونبقا نسقسي فالناس على العنوان تا نوصل
الحاجة حنان : لَواه بزاف عليك ، تسناي تفيق إيمان ولا كان باقي الموتور لتحت توصلك بيه
أنت تقرأ
زوجة الكولونيل / COLONEL'S WIFE
Romanceهو : تَبْتَغين من غضبي الخمود ... وتأملين أن أضع أصفاد لأسد غيرتي بينما أرى حولك من الرجال حشود ... تستقصي من زئيري الجُمود ... ومن ردود أفعالي الخمود ... بينما تجوبين دروب الفجور بأنوثتك الفاتنة ا ولا تعلمين أن الفتنة أشد من القتل وأن حكم الفتنة هو...
