زوجة الكولونيل / COLONEL'S WIFE

PART 48

بدات كاتزيييد تغوت باش يسمعوها وكاتزييد فالدقان ديال الباب

فيروز : ختييمة ايلااا ادسمااااعني روود عليا [ جمعات يديها على شكل قبضة وزاادت دقات فالباب بجهد ] أسماااء

الحس كان مقطوع فالدار وحتى حد ماجاوبها ، عيات مادور تما وكل شوية كاترجع تدق وهي معجبة كيفاش ماسولوش عليها وكيفاش ماعاود دق عليها حد .. عياات من هاد المشي والمجي عينيها حاضيين الساعة وعلى مافهمات من الصوت لي مقطوع كانت الدار خااوية وغير هي لي فيها

السوايع كايدوزو و هي باقا على نفس الحال 14h30 _ 15h00 _ 16h00 _ 17h00 ... فينما تسمع صوت شي طوموبيل وقفات كاتمشي كاتجري لجهة الشرجم تشوف واش جاو حتى ملات وعيات ومابقاتش قادرة على داك الجوع مالقات حتى حل من غير تنساه بالنعاس

عممرها نوات شي نهار تبكي بسباب الجوع حيت من الأساس عمرها تحطات فموقف يخليها تصبر عليه حتى دخلات لهاد الدار ... تكمشات فبلاصتها وهي عاارفاه دايرها لها بلعااني ، مايمكنش ينساها تما ولكن من جهة خرا فكرات بلي ممكن يكون بصح ماعندو غرض تاكل ولا تموت .. وعائلتو؟ علاش حتى واحد ما سول والا قال ديك البنت فين راها؟

تأزمات وتفكرات غير البعض من أفراد عائلتها لي كانو فاش كايشوفوها غضبانة كايبداو يحزرو فيها تجي تاكل ولا يقدرو يبززو عليها وكاتصدق هابطة لعندهم بزز عليها يمكن فداك الوقت ماكانتش كاتحمل فاروق يبزز عليها ولكن دابا ماكرهااتش كون كانو داروها لها حتى هنا ومايخليوهاش هاكا.

× عند نورة ×

العشية معاشية والضلام طاح وهي باقا كاتقلب على خدمة .. فين ما بان ليها شي سناك ولا محلبة ولا مخبزة كاتدخل وتسول لعل وعسى يقبلو يخدموها ولكن زهرها جا حتى لقدام كمارتها وهو يضربها لها بتكويزة .. حشمات ترجع أدراجها لدار الحاجة حنان خالية الوِفاض ومشات جلسات فجردة خاوية كاتفكر فحريرتها واحد الراس كايقول لها تعاود تمشي لداك لوطيل وواحد الراس كايقول لها ماتضيعش ديك ل10 دراهم لي عطاوها لها

ضورات عينيها على الزنقة كان الضلام طاح ... 10 دراهم لي عندها ماتقدرش تخسرها دابا حيت من الأساس ماغاتستفاد والو ايلا خسراتها غايخصها دغيا ترجع وماتتعطلش ، مالقات ماحسن من غدا الصباح تبكر و تمشي لتم تبقا عاصرة من الصباح حتى الليل لعل وعسى تلقا شي تسليكة.

• فبلاصة خرا •

قدام واحد الفورݣو بيض .. كان واقف برجل مخليها على الأرض والثانية مطلعها للدخلة ديال الفورݣو ساندها عليه وعينيه مفيكسيين على الخوا لي كان تم

مراد : [ ربع يديه وكروازا رجليه وهو متكي على الباب ديال الفورغو ] تعرضو للفورݣو فالخرجة ديال صنهاجة ، انا ݣلت غايكونو غير دوك ولاد القح•اب صحاب الاوطوسطوب خداميهم هادو .. هادي جوج سيمانات جات تلاحت واحد خيتي قدام الفورݣو لي كان غادي معايا والبارح تلاح داك البرهوش قدام الفورݣو لي كان غادي مع سماعيل