ထာ၀ရနဂါး တန်ခိုးရှင် ( လုမင် ) (Ch 1 - 985 ) Book 1

896 - 900

ထာဝရနဂါးတန်ခိုးရှင် ( လုမင် )
မူရင်း စာရေးဆရာ - Mu Tong Ting Zhu
ဘာသာပြန်သူ      - ထာဝရ
အပိုင်း ( 896 ) ကမ္မတိုက်ပွဲ စတင်ခြင်း။

ကျွင်းစုန့်ကြွယ်၏ စကားက တုန်လှုပ်ဖွယ်ရာဖြစ်ကာ လူတိုင်းကို အံ့အားသင့်သွားစေခဲ့သည်။
   
"ကျွန်တော်တို့ရဲ့ ရှန်းဟွမ်တိုက်ကြီးဆိုတာ သမုဒ္ဒရာကြီးထဲက အရိပ်အယောင်မျှသာ ရှိသေးတယ်၊ အပြင်မှာ ကျွန်တော်တို့ တိုက်ကြီးထက် အဆတစ်ရာ၊ အဆတစ်ထောင်ပိုကြီးတဲ့ တိုက်ကြီးတွေ အမှန်တကယ် ရှိသေးတာလား"
လူငယ်တစ်ဦးက အံ့အားသင့်စွာဖြင့် အော်ပြောလိုက်မိ၏။
   
ဟွမ်ကျန်းနှင့် တခြားသူများလည်း ထိုနည်းတူစွာပင်။ 

သူတို့အားလုံး အလွန် တုန်လှုပ်သွားကြသည်။

ယခင်ကတော့ ၎င်းတို့ဟာ ရှန်းဟွမ်တိုက်ကြီးကို ကမ္ဘာ၏ဗဟိုချက်ဟု ထင်မြင်ခဲ့ကြသည်။ အပြင်လောကတွင် လျှို့ဝှက်ဆန်းကြယ်ပြီး ခန့်မှန်းရခက်သည့် တိုက်ကြီးများ ရှိကောင်းရှိနိုင်သည်ကိုတော့ သူတို့သိထားပြီးသားပင်။ သို့ရာတွင် အများစုမှာ ထိုတိုက်ကြီး နှစ်လုံး သို့မဟုတ် သုံးလုံးသာ ရှိနိုင်မည်ဟု ထင်ထားခဲ့ကြသည်။
   
သို့သော် ကျွင်းစုန့်ကြွယ်က 'အများအပြား' ဟူသော စကားလုံးကို သုံးလာခဲ့ပေသည်။ ထို့ပြင် ရှန်းဟွမ်တိုက်ကြီးထက် အဆရာချီ၊ ထောင်ချီကာ ကြီးမားသော တိုက်ကြီးများ ရှိနေခြင်းက မယုံနိုင်စရာ ကောင်းလှသည်။

ရှန်းဟွမ်တိုက်ကြီးသည် အလွန်ကျယ်ပြော၏။ အရှေ့ပိုင်းကန္တာရမှာပင် ရာချီသော နယ်မြေကြီးများရှိ၍ ကျယ်ပြောလွန်းပေသည်။
   
တောင်ပိုင်း၊ မြောက်ပိုင်းနှင့် အနောက်ပိုင်းတို့သည်လည်း အရှေ့ပိုင်းကန္တာရထက်မနည်း ကျယ်ဝန်းကြသည်။

အလယ်ပိုင်းကန္တာရဆိုလျှင် ပို၍ကျယ်ဝန်းပြီး ထူးချွန်သူများနှင့် တန်ခိုးရှင်များလည်း ပေါများခဲ့ပေသည်။

ဤမျှ ကျယ်ပြောလှသည့် တိုက်ကြီးများ အပြင်လောကတွင် များစွာ ရှိနေသေးသလော။

အားလုံး ခဏတာ တုန်လှုပ်သွားကြသည်။

လုမင်ကတော့ နည်းနည်း ပိုကောင်းသည်။