How to flirt with the final boss 2

Arc 9 part 1

         William သည် လက်ဗွေဖြင့် တံခါးဖွင့်လိုက်ပြီး တိုက်ခန်းအား စေ့စေ့စပ်စပ်လိုက်ကြည့်မိသည်။ ဒီခန္ဓာကိုယ်၏မူလပိုင်ရှင်က အလိုလိုက်ခံရသော သူဌေးသားဂုဏ်ပုဒ်နှင့် တကယ်သင့်တော်လေသည်။ အဆင့်မြင့်တိုက်ခန်းများ နောက်ဆုံးထွက် ပြိုင်ကားများ Branded အဝတ်အစားများ နာရီများ ပိုင်ဆိုင်ကာ ဘဝအားပျော်ရွှင်စွာ ရွက်လွှင့်နေသည့်တိုင် ဇာတ်လိုက်မထံမှ ပြန်သဘောကျခြင်းမခံရသဖြင့် ဇာတ်လိုက်ဟူသော ခေါင်းစဉ်ကိုတော့ မရခဲ့ပေ။

      ထိုကောင်းချီးတို့ ထုံမွမ်းနေသော ဇာတ်လိုက်ဖြစ်မလာမှုကြောင့် ပြီးပြည့်စုံသည့် သခင်လေးသည်လည်း အဖြည့်ခံဇာတ်ရံဘဝဖြင့် ကျေနပ်ရလိမ့်မည်။ ဒီကမ္ဘာ၏ အဆုံးသတ်မှာ ‌ဇာတ်လိုက်နှင့်ဇာတ်လိုက်မတို့၏ နောက်ဆက်တွဲ ကြီးကျယ်ခမ်းနားသော အချစ်နှင့်ဘဝအကြောင်း အရိပ်အမြွက်ပေးကာ ပြီးဆုံးသွား‌ေသာ်လည်း မူလပိုင်ရှင် အရံဇာတ်ကောင်လေး၏အဆုံးသတ်ကတော့ မြေအောက်လောကကို သွားရန်စမိခဲ့သည့် ဇာတ်လိုက်အတွက် ကျည်ဆန်ကာပေးခဲ့ကာ သေဆုံးသွားခဲ့ရသည်။ အကောင်းဆုံးသူငယ်ချင်းနှင့် အချစ်ဆုံးမိန်းကလေးတို့ သက်ဆုံးတိုင် ပျော်ရွှင်ဖို့ မျှော်လင့်ရင်း သူကတော့ မြေကြီးအောက်တွင် တောင့်တင်းကာ အသက်ပျောက်နေပြီဖြစ်သည်။

        William သည် ထိုယုတ္တိမတန်လွန်းသော အဆုံးသတ်ကို မလိုချင်ပါ။ ထို့အပြင် သူသည်လည်း သူ့ကိုယ်ပိုင်ဘဝတွင် ထိုကဲ့သို့သော အရံဇာတ်ကောင်လေးဖြစ်နေသည်ကို ပိုလို့ပင် လက်မခံချင်ပါ။ ထို့ကြောင့် ကူးပြောင်းလာလာချင်းပင် အနိုင်ကျင့်ခံနေရမည့် ဇာတ်လိုက်ကိုသွားရှာကာ ဒေါသအပြည့်ဖြင့် ကန်ချလိုက်သည်။ ပိုဆိုးသည်က ထိုဇာတ်လိုက်မှာ တကယ့်ကမ္ဘာရှိ သူ့ညီဝမ်းကွဲနှင့် ရုပ်ချင်းအလွန်ဆင်တူနေသည်။ သရဲဘောကြောင်ပြီး အသုံးမကျတဲ့ကောင်က  ဇာတ်လိုက်ဖြစ်နေတာနဲ့ပဲ ပျော်ပျော်ရွှင်ရွှင် နေသွားနိုင်တယ်ပေါ့လေ။ အရူးကောင်။

      ရေအေးတစ်ပုလင်းက စိတ်ငြိမ်စေရန် ကူညီပေးပြီးနောက် William သည် မှန်ရှေ့တွင် ရပ်ကာ မိမိ၏ရုပ်သွင်ကို စစ်ဆေးကြည့်လိုက်သည်။ ဒါက လုံးဝကို သူ့မျက်နှာအတိုင်းပဲ။ မျက်လုံး‌ေထာင့်စွန်းနားတွင်ပင် မှည့်နက်ကလေးတစ်ခု ရှိနေသေးသည်။  ဒီခန္ဓာကိုယ်ပိုင်ရှင်နှင့်သူသည် တူညီသော ကံကြမ္မာနှင့် တူညီသော မျက်နှာတို့ကို ပိုင်ဆိုင်ထားကြသည်။ ဒါပေမဲ့ သူရှုံးမှာမဟုတ်ဘူး။ တကယ့်ကမ္ဘာမှာ သူ့ညီဝမ်းကွဲကို အရှုံးပေးမယ့်အစား သူ ဒီလိုကမ္ဘာငယ်လေးတွေဆီကို ကူးပြောင်းဖို့ ရွေးချယ်ခဲ့သည်။ တူညီစွာပဲ ဒီကမ္ဘာငယ်လေးတွေမှာလည်း သူ ဘယ်သူ့ကိုမှ အရှုံးပေးမှာမဟုတ်ဘူး။