زوجة الكولونيل / COLONEL'S WIFE

PART 47

تتسمع الدقان فالباب ومشاو عينيها لجهة الباب .. إحساسها كان بحال إحساس ولد صغير كاياكل سلخة من عند مو وكاتجي شي جارة تدق عليهم

[ نطقات بالريفية ]
أسماء : خويا واش ماغاتهبطوش تتعشاو؟ العشا راه تحط

جاوبها بالريفية وعينيه باقيين مفيكسيين على عينين فيروز لي كانو جهة الباب
عِز : هودي حتى نلحقو عليك

أسماء : واخا ا خويا

سمع صوت الخطاوي هابطين وزااد زير على وجهها
عِز : عارفة اش غاديري دابا؟

أومأت براسها بمعنى أه وعينيها باقيين مغرغرين ، حسات بيديه زاادو تزيرو على حناكها ورجع نطق

عِز : اش غاديري؟

فيروز : [ نطقات بنبرة مخنوقة ] انغسل وجهي ونغطي شَعري ورجلي

عِز : هي دابا

طلق منها ومشات من تما مبعدة عليه ... دخلات للدوش وجلسات فالأرض بغات تجمع ركابيها عندها وماقدراتش بسباب الحريق والطياب لي باقا كاتحس بيه من لتحت.

حطات يديها على الحيط وسندات عليها راسها كاتبكي ماحملاتش راسها وكيفاش مرخصها كيفاش كايسحابليه هي وحدة لي عينيها زايغين ورخيصة لدرجة يدخلها لدارو وتشوف ليه فخوه ولا راجل ختو ولا باه ، كانت هضرة كتييرة واحلة لها فالحلق ولكن الخوف من العصى خلاها تسكت وتتراجع عليها حيت ببساطة عارفة مزياان واخا يضربها ماكاينش لي يهضر معاه وهادشي لاحظاتو من فاش كانو ملاحظين وجهها لي مضروب ويديها لي محروقة وحتى وحدة فيهم ماقالت شي حاجة من غير أسماء لي نصحاتها على ود شي بومادا لوجهها.

وقفات ومشات لجهة المرايا كاتشوف جهة عنقها ووجهها وكالعادة صبعانو كانو مطراسيين فعنقها وحناكها ، زادت بكاات على هاد الحالة لي كايدير لها فلحمها ، داك اللحم لي كانو كايدارو عليه تماثيل ومنحوتات و يتباعو بزبابل ديال الفلوس فدول الخليج ها هو كاياكل الدق ويتجفف بيه من عند واحد بَربَري

داك اللحم لي بنادم كان بنادم كايبغي غير النمرة ديال مولاتو باش تهضر معاه ها مولاتو تعطات لواحد لي مايستاهلوش وماعارفش بقيمتو

داك اللحم لي كانت مولاتو كايتسيفطو لها الكادوات والروايح بلا ماتخسر حتى الشوفة على شي راجل من الرجال لي كانو كايسيفطوهم ها هو دابا محروم من الزينة ومزوق بالضرب

كان كايعجبها تشوف راسها فالمرايا وكاتحماق على تشوف تماثيلها ولكن دابا رجعات شوية بشوية كاتكره تشوف الإنعكاس ديالها فشي زاجة ولا مرايا غير بسباب دوك الكدمات.

طلقات الما كاتغسل وجهها وتحك عينيها باش يتحيد منهم الكحول كل شوية كاتهز راسها تشوف فالمرايا واش تتحيد وتعاود تحكهم حتى زادو حمارو وتنفخو كتر ماكانو