زوجة الكولونيل / COLONEL'S WIFE

PART 49

داتها معاها البنت للكوزينة وهي كاتضحك معاها وتلعب معاها شوية سمعات صوت شي طوموبيل وقفات على برا .. مشات لجهة الشرجم تطل شكون جا ، لقاتو مُصعب وختيمة ونجية

رجعات للكوزينة كاتقلب فالپلاكارات والمجورة على الخزامة ولا حبة حلاوة وكل ماتجبد شي طاسة كاتشم ريحتها ولا تشوف الشكل ديالها ... داكشي لي بغاتو مالقاتوش وماعرفاتش من الأساس فين كايديروه ، جبدات شوية ديال النعناع والحامض وخلاتهم كايغليو فوق البوطة عاد مشات لعند البنيتة جلسات حداها وبدات كاتوكلها ، عين معاها وعين مع البوطة حتى دخلات عليها الحاجة هنية بعكازها .. سكانات بعينيها الكوزينة والجهة فين طيبات فيروز لقاتها جامعة روينتها فاش طيبات

ماهضراتش معاها مشات نيشان لجهة الكوكوط حلاتها كاتدوق المرقة ديال كسكسو .. لقاتها مطيباها بالدجاج ، بطاطة باقا شادة فراسها و ماذابتش والݣرعة الحمرا حتى هي نفس الشي ... دورات راسها لجهة واحد الݣصعة مغطية ببلاستيكة كان فيها كسكسو مفور ، هزات شوية منو كاتذوق وغير سالات رجعات غطات داكشي كيما كان

خرجات من الكوزينة بلا ماتهضر معاها ، ماقالت لا زوين لا خايب

ماعمراتش راسها بهادشي ، بقات ملهية مع إيناس حتى دخلات ختيمة للكوزينة حدهاا شافتها إيناس وهي تمشي كاتجري لعندها مخلية فيروز لي كانت هازة المعلقة وكاتوكلها

ختيمة : صافي ا إيناس بدلتيني ياكي ياكي [ شافت ففيروز ] ريحة كسكسو عاطية حتى لقدام الباب الله يبارك ، كسكسو نتاع يديك هدا ا مرت لوسي؟

فيروز : ماعرفتشي واش عاندكم ليلو الشهية ولا لا ، الموصيبة لي صرات لراجل ختي مريم سقماتني بالحق يمكن يكون فيكم الجوع ، نهار كولّو ونتوما فالسبيطار بزاف عليكم

ختيمة : السبيطار؟ لا ا مرت لوسي العزيزة .. هاد نهار كنا معروضين لدار جد راجلي مُصعب من جهة المرحومة عݣوزتنا ، دوزنا نهار زوين حتى طاحت علينا هاد الخبار يا حفيض يا ستار ، غير عدبتي راسك فيه على والو كون غير تاحيتي انا كانقول موحال يكون شي حد شهيتو محلولة

فيروز : ماشي مشكل ا ختي ختيمة لامابغاوشي ياكلوه عاندك الحق يقدار ديك الموصيبة تكون سدات لهم الشهية

ناضت من بلاصتها ومشات لجهة البوطة هزات داك النعناع والحامض مقطع لي كايغليو فالما وخواتو فكاس ، زادت ليه شوية ديال العسل باش يولي حلو شوية وعاد خرجات بيه لعند مريم لي كانت جالسة مع مالين الدار 

فيروز : [ قربات لعندها وحطاتو لها فوق الطبلة ] ختي مريم هدا الليمون مع شويش دنعناع غي شرب اينفعاك تنعس ونتينا مرتاحة وايهدنك دابا

عاودات دوزات يدها عل  كتفها كاتواسيها وحتى بغات تجلس معاها وهو ينطق شيخها
الحاج المرتضى : [ نطق بصوت وَقور ] بداو تحطو العشا الله يرضي عليكم ، عِز باقي معطل على برا