قلب يخشى الحب

PART♡6

🥀قَلْـــــــبٌ يَخْشَـــــــى الحُـــــــبَّ🥀

🤍الفصـــــل الثاني:قســوة قلبٍ يأبى العشــق🤍

🍷بقلـــــم:#SHEWOLF🍷

PART♡6

بقات مريم كاتبكي و كاتشهق شوية شدات فقلبها ملي حسات بيه كي ضرها، كاتحس بحال الى الماس كي تغرسو فيها بسبب هادشي لي وقع،و أكثر حاجة جرحاتها الآمال لي كانت بانية على أنه حتى هو كي بغيها و إلا ما كانش يغير عليها و يتصرف معاها بديك الطريقة لي اي وحدة غادي تفهم غلط لو كانت فبلاصتها.

دورات عينيها على المكان لي هي فيه لقات غير الطوموبيلات قلال لي كي دوزو و الخلا داير على تما كامل، مسحات دموعها و مشات كاتعرج لجيهت واحد الحجرة كبيرة و جلسات فوقها، هزات الكسوة باش تشوف الجرحة، لقات الد..م خارج منها و باينة بلي تحلات، تنهدات بحزن و بقات جالسة تما كاتسنا شي تاكسي يدوز باش تشدو و تمشي فحالها.

أما انور لي كان وصل للأوطيل و دخل كي قلب عليها لداخل ساعة ما لقاهاش، وقف و حط يديه على خصرو و اليد الثانية كي دوزها على وجهو بعصبية، تفكر التيلي ديالو و هو يهزو دغيا و صونا ليها، ماجاوباتش فالمرة الاولى و عاود عيط ليها للمرة الثانية و هاد المرة جاوبات.

ميساء(بصوت باكي): أنور

أنور(زير على يديه): فينك

ميساء: فالاوطيل

أنور: أنا فالاوطيل فينك نتي

ميساء(مسحات دموعها): فالجردة

قطع معاها و خرج ديك الساعة للجردة كي قلب عليها،شوية و هي تبان ليه جالسة و كاتمسح فدموعها،تنهد بضيق و مشا لعندها.

ميساء(كانت جالسة و غير شافتو وقفات): أنور

انور: لاش البكا؟

ميساء (تلاحت عليه عنقاتو): علاش مشيتي و خليتيني

أنور(كي طبطب على ظهرها): ما خليتكش هاني رجعت

ميساء بعدات عليه و شافت فيه بعينين حمرين و مدمعين، أنور تنهد و مد يديه كي مسح ليها فالدموع.

أنور: باراكا من البكا و قولي ليا فاش بغيتي تدوي معايا

ميساء بقات ساكتة كاتبلع ريقها، مترددة تقول داكشي فاش كاتفكر و مترددة تطبق ديك الخطة لي رسمات فبالها، حيت خطة أنانية و إستغلالية و غادي تجرحو بزاف نهار يعرف، لكن كاتبغي يانيس بزاف و ما تقدرش تخلى عليه و مستعدة تدير اي حاجة باش تبقى معاه واخا على حساب تعاسة الآخرين، تنهدات بحزن كارهة نفسها فهاد اللحظة و خاصة ان انور عزيز عليها بزاف،كاتحتارمو و كاتعتابرو خوها لي ما ولداتش ليها مها.