قلب يخشى الحب

PART♡12

🥀قَلْـــــــبٌ يَخْشَـــــــى الحُـــــــب🥀

🏹الفصـــــــل الثالث:سهــــمها أصـــاب قلبــــي🏹

𝓢𝓱𝓮 𝓦𝓸𝓵𝓯✒️بقلــــم

𝓟𝓪𝓻𝓽♡12

بقات مريم كاتبكي و وجهها ولا حمر و عينيها حتى هما،كاتحس بالعافية شاعلة فيها و باغا بشدة تطفيها باش تحس بالراحة، فراس كان معنقها و كي طبطب ليها على ظهرها باش على الله تبرد شوية و لكن والو صوت بكائها و شهقاتها عاد ما كي زيد.

بعدات على فراس و مشات هزات كاس ديال الما خواتو على صدرها و فراس و باها غير كي شوفو.

مريم(شافت فمحسن): بابا علاش الحر..قة باقا فقلبي واخا خويت الما

محسن (دمعو عينيه و جرها لعندو عنقها): الله ياخد فيه الحق ا بنتي كيف ما حر..ق ليك قلبك بغيت ربي يحر..قو

بقاو هاكداك معنقين و هي كاتبكي فالحضن ديالو حتى حس بيها ترخات و شاف فراس.

محسن: طلعها لبيتها الله يرضي عليك اولدي

فراس مشا لعندو و هزها بخفة بين يديه، طلعها لبيتها و حطها فوق الناموسية و هي مازال كاتشهق و رموشها فازگين بالدموع، فراس تنهد بحر..قة و بقا كي دوز على شعرها بحنان حتى غفات و نعسات، غطاها و مشا خرج من البيت حتى لغدا و يشوف حسابو مع أنور.

داز الوقت و نعسو گاع لي فالدار منهم حتى مريم لي ملي نعسها فراس ما فاقتش، حتى كاتفيق قافزة من بلاصتها، بقات مخرجة عينيها و حاطة يديها على صدرها كاتنفس بالجهد و كاتستغفر مولاها حتى حسات براسها بلي ولات شوية بخير.

شوية تفركات شنو وقع و هما يتغرغرو عينيها بالدموع،كانت كاتمنى كون داكشي لي وقع معاها يكون غير شي كابوس و غادي تفيق منو لكن للأسف طلع كلشي بصح و فعلا أنور نتاقم منها شر الانتقام و خلاها نهار خطبتها.

كاتسآل مع راسها كيفاش عطاه خاطرو يديرها بيها و هو كان شاهد على فرحتها لي كانت فرحة لا توصف فاش طلب منها الزواج، تفكرات شنو دارت ليه قبل 3 سنين و تفكرات حتى فرحتو فاش قبلات أنها تمشي معاه، دابا عاد حسات بداكشي لي دارت و عاد عرفات بلي فعلا آذاتو فاش كذبات عليه و خلاتو كي تسناها فالمطار.

لكن واش هادشي غادي يخليها تسمح ليه و تلتامس ليه العذر؟مستحيل حيت شرحات ليه و طلباتو من السماحة،عتارفات بالغلط ديالها و ماشي بقات زايدا فيه و كاتخرج فعينيها.

مسحات دموعها و وقفات، شافت ديك الكسوة لي مازال لابسة و هي تبتاسم بسخرية على راسها، شراتها و هي فرحانة غير على قبل هاد النهار، مشات للماريو جبدات پيجامتها و بدلات ديك الكسوة، شداتها و مشات هزات المقص كاتقطع فيها و كاتبرد فيها غدايدها حتى رجعاتها شرويطة، شوية و هي تحس بكرشها كاتغرغر، حطات يديها عليها و بلعات ريقها حيت فيها الجوع.