قلب يخشى الحب

PART♡8

🥀قَلْـــــــبٌ يَخْشَـــــــى الحُـــــــبَّ🥀

🤍الفصـــــل الثاني:قســوة قلبٍ يأبى العشــق🤍

🍷بقلـــــم:#SHEWOLF🍷

PART♡8

دازت سيمانة رجع فيها أنور صحتو و يديه برات،الجرح لي فجبهتو شوية لكن الأثر عمرو غادي يبرا هو و الأثر لي خلات ديك الليلة فقلبو،حيت فديك الليلة عاش أسوء كوابيسه، ماشي الكسيدة لا، هاد الكابوس كان مريم فاش وقفات ضدو على قبل فؤاد.

فعلا كان عندو الصح نهار قاليها بلي خايف لا يرجع يبغي و يتعاود نفس السيناريو لي وقع مع ميساء، حيت ها هو رجع بغا و رجع تعاود السيناريو أقسى من السابق.

لكن هاد السيمانة كانت كفيلة فأنها تخليه يتأكد من قرار التخلي عليها، حيت مستحيل يبقى يحارب على ودها غير بوحدو و السيدة واضح أنها ماباغاهش و ما مرتاحاش معاه حتى انها كاتقولها بلسانها.

و العلاقة باش تكون ناجحة خاص الطرفين بجوج يكونو كي حاولو و كي عطيو كل ما فجهدهم باش تنجح،ماشي واحد متشبت بالحبل و لاخر طالقو.
مريم كانت ثاني تجربة سيئة ليه، لكن غادي يبقى يتمنى ليها الافضل ديما و فين ما كانت.

كان واقف قدام المراية لابس اللبسة الرسمية ديال الضباط، و هاز مگانتو كي لبس فيها، هز ريحتو المفضلة رشها ، هز سوارتو و خرج من البيت، هبط لتحت لقا غير شمس لي جالسة كاتفطر، مشا حتى لعندها جر كرسي و جلس.

أنور: صباح الخير

شمس: صباح النور

أنور: فين الواليد و الواليدة؟

شمس(تنهدات):من الصباح و هما جالسين يتحابو عليا هنا فالتالي خرجو بجوج

أنور(حرك ليها راسو بواخا): ديك الطبيبة لي متبعة معاها مزيانة؟

شمس: أه أ خويا مزيانة

أنور(صغر فيها عينيه): كاتهدري معاه؟

شمس(كشرات ملامحها بحزن): لا ما عمرني هدرت معاه جوج سيمانات دابا

أنور(هز فيها حاجبو): شفتك مقلقة؟ باغا ترجعي لعندو باش يبقا حابسك ثاني؟

شمس: احم لا و لكن هو واعدني غادي يتبدل

أنور: إوا حتى يتبدل و نشوفو ديك الساعة

شمس:دازت جوج سيمانات اكيد غادي يكون تبدل

هزات عينيها فأنور لقاتو كي حمر فيها عينيه

شمس(ضحكات ببلاهة): و لكن حتى يتبدل مزيان

أنور: الله يعميها ليك

كمل الفطور ديالو و خرج من بعد ما ودع شمس، ركب فطوموبيلتو و مشا للكوميسارية لي عمرو مشا ليها من نهار دار كسيدة،وصل و يالاه خرج من الطوموبيل حتى كاتلاح عليه.