قلب يخشى الحب

PART♡21

🥀قَلْـــــــبٌ يَخْشَـــــــى الحُـــــــب🥀

🏹الفصـــــــل الثالث:سهــــمها أصـــاب قلبــــي🏹

𝓢𝓱𝓮 𝓦𝓸𝓵𝓯✒️بقلــــم

𝓟𝓪𝓻𝓽♡21

مريم غوتات بالجهد و دفعات المونيكة من فوقها،شدات فيديها فين تضربات و شافت فأنور لي كان عقلو غايب عن الوجود، مرفوع و ما كاينش هنا، ما كي فكرش بعقلو بتاتا و عينيه تعماو، لدرجة ديك المونيكة ماردش ليها البال.

عينيه حمرين و صدرو كي تهز و يتحط عاود هز عليهم الفردي و تيرا ثاني فالمونيكة ظنا منه انه رجل، هنا مريم غوتات ثاني و ناضت من الناموسية باغا تهرب و غير بان ليها انور وجه ليها السلاح جيهتها و هي تخرج عينيها بصدمة.

مريم: أن...ور سمعني...واااع

كان انور لي ضرب جيهتها بالرصاصة و كون ما تحدراتش كانت غادي تختارق راسها.
تخبات فالجهة الثانية من الناموسية و مدات غير يديها بشوية جرات الليزار و غطات جسدها العاري في حين أنور كان كي قاد فالسلاح باش يمشي لعندها يفرغو فيها و غير قادو تقدم عندها بخطوات بطيئة حيت ما بقاش كي شوفها،أما المونيكة لي عند بالو راجل حساب ليه صافي ما..ت.

مريم جرات رجليها لعندها و تكمشات كاتصنط للحر لي كاتحس بيه فيديها و غير سمعاتو جاي لعندها و هي تطلق العنان لدموعها، قلبها كي ضرب على الجهد من فرط الخوف و حتى باش تهرب فشلو عليها رجليها،حسات بيه وصل لعندها و وقف عليها، بدات كاتهز فيه راسها و غير بشوية حتى شافت فيه لقاتو كي دير فيها شي شوفات.

و بدون تردد هز عليها السلاح ناوي يقت..لها حتى كي سمعها قالت...

مريم(كاتبكي و تغوت):و الله حتى غير مقلب هئ هئ

أنور عقد حواجبو بإستفهام حيت عقلو تبلوكا حاليا و ما فهم والو

مريم: غير مقلب انا ماكانخونكش هئ هئ

أنور هبط السلاح و شاف جهة المونيكة، قرب لعندها و غير بانت ليه بلي مونيكة و ماشي بنادم و هو يغمض عينيه و حط يديه على خصرو، و اليد الثانية حط صباعها بين عينيه كي حاول يستوعب هادشي لي واقع،شوية جلس و شد راسو بين يديه كي تخايل كون دابا قت..لها و فاللخر يطلع هادشي كامل غير مقلب.

بقا مدة و هو هاكداك في حين مريم عاطياها للبكاوات و شادة دراعها لي مجروحة، حيت اول رصاصة باش ضربهم ختارقات المونيكة و دازت من حدا دراع مريم حتى جرحاتها و كون ماشي المونيكة لي كانت فوقها كانت مريم غادي تكون دابا في عداد المو..تى.