قلب يخشى الحب

PART♡39

🥀قلـــــــبٌ يَخْشَـــــــى الحُـــــــب🥀

🏹الفصـــــــل الثالث:سهــــمها أصـــاب قلبــــي🏹

𝓢𝓱𝓮 𝓦𝓸𝓵𝓯✒️بقلــــم

𝓟𝓪𝓻𝓽♡39

لحسن الحظ و بمشيئة الله، كان يعقوب رجع للدار باش يدي معاه ملف مهم كان نساه، طلع النيشان للبيت و مع دخل ما كي بان ليه حتى حد، عقد حواجبو بإستغراب حيت غزلان ما شافهاش لتحت و كان متوقع يلقاها فالبيت.

بان ليه باب الدوش محلول و توجه ليه بخطوات بطيئة، وصل و سبق غير راسو باش يشوف واش كاينة،و مع بان ليه داك المشهد المروع مع كي وسع عينيه على آخرهم ودخل كي جري لعندهم، تحنى و دفع غزلان بالجهد حتى تكات على الأرض في حين هو جبد رهف لي ولات زرگة بسبب الاكسجين لي تقطع منها.

يعقوب(بخوف): لا لا لا

شافها ما كاتحركش و هو يحطها فالارض، سد ليها نيفها و حط فمو على فمها كي دير ليها التنفس الاصطناعي،فهاد الوقت لي كان يعقوب كي حاول فيه ينقذ حياة بنتو كانت غزلان كاتشوفيهم و ملامح وجهها جامدين.

تقادات فالجلسة و وجهات شوفاتها لبنتها لي كانت على حافة المو..ت، و شوية بشوية بدات كاتوعى على راسها،و غير عرفات اش دارت وسعات عينيها بذهول و مشات لعندهم كاتحبو حتى وصلات و حطات يديها على رهف كاتحرك فيها و تبكي...

  غزلان: بنتي لا، عافاك حلي عينيك

يعقوب ما هدرش معاها دفعها بيديها حتى رجعات باللور و رجع كي عتق فبنتو، حتى لشوية و هي تنفس من الاعماق و بدات كاتحب و الما كي خرج من فمها.

حط يديه على ظهرها و قلبها على جنبها باش داك الما ما يخنقهاش، و فنفس الوقت كان كولو كي ترعد من فرط الخوف لي حس بيه فهاد الدقائق، أما غزلان بقات غير كاتبكي و حاطة يديها على قلبها.

يعقوب هز بنتو و خرج من تما، مشا هز فوطة و لواها فيها عاد خرج كي جري باش يديها للكلينيك في حين غزلان خلاها تما كاتبكي و تنتف فشعرها بسبب داكشي لي دارت.

دقائق كثيرة و هي هاكداك فالتالي حبسات من البكا و مسحات دموعها، وقفات و مشات تقابلات مع المراية كاتشوف فراسها، دابا ولات متأكدة بلي ما تستاهلش لقب الام، لكن فالحقيقة هي كاتعاني من أخطر الامراض النفسية و ما فخبارهاش و ما خبار حد أصلا.

غزلان: انا خاصني نمو..ت، الى بقيت حية غادي نآذي بنتي(بداو ثاني دموعها كي هبطو) انا مانستاهلش نبقا حية