Aab e Hayat || COMPLETED

part16

"Mujhe office ka kuch kaam hai, tum so jao." Woh kapde tabdeel karke sone ke bajaye kamre se nikal gaya. Main intezaar karungi. Imama ne usse kaha.

"Nahi, mujhe zara der ho jaye gi." Usne Imama ke haath mein pakde novel ko nazar andaaz karte hue kaha jo woh raat ko padhne ke liye le kar aayi thi.

"Usay waqai office ke kuch kaam niptane the, magar study table par baithte hi use andaaza hogaya ke aakhri kaam jo woh aaj karna chahta tha, woh yeh tha. Kuch der woh laptop on kiye apne table par baitha raha, phir yak dum uth kar guest room mein aagaya. Light on karte hi kitabon se bhari hui samne diwar ke sath lagi almarian uski nazron ke samne aagayi. Usne un kitabon ko wahan kuch ghante pehle hi rakh diya tha, badi ehtiyaat aur nafasat ke sath. Musannif ke naam ke itbaar se unki mukhtalif raex par grouping ki thi. Tab tak woh uske liye sirf Imama ki kitaben thin lekin ab woh in tamam kitabon ko utha kar Baheera Arab mein ja kar dabo dena chahta tha, ya kam az kam raavi mein toh phenk hi sakta tha. Woh ab kitabein nahi raddi thi.

Imama ki woh tasawwurati perfect zindagi jo woh Jalal Ansar ke saath guzarti rahi thi. Woh dedh hazar romance un kirdaro ke romance nahi the, jo in novels mein the. Woh sirf do kirdaro ka romance tha. Imama aur Jalal ka... aala zarf banne ke liye khule dil ya bardaasht ki zarurat nahi hoti, balki dimaagh ka kaam naa karna zyada zaroori hota hai. Woh raex par lagi in kitabon ko bardaasht nahi kar pa raha tha. Imama ke is aitraaf ke baad koi shohar bhi bardaasht naa kar pata, woh bhi uska shohar tha. Woh in kitabon ko ghar mein nahi rakhna chahta tha aur woh aisa kar sakta tha. Woh uski biwi thi... roti dhoti, naaraaz hoti lekin itni ba ikhteyar nahi thi ke uski marzi ke bagair in kitabon ko waha rakh sakti. Woh aurat thi zidd kar sakti thi, baat nahi manwa sakti thi. Woh mard tha, use apni marzi ke liye zidd jaise kisi harbe ki zarurat nahi thi. Yeh uska ghar tha, yeh uski duniya thi. Woh shara'it ke sath nahi rehna chahta, na hi aise jee sakta hai. Woh mara'at ke sath duniya mein aata hai aur usi ke sath duniya mein rehta hai. Toh aasaan hal yeh tha jo use muaashra aur uska zehen bata raha tha. Mushkil hal woh tha jo uska dil us se keh raha tha aur dil keh raha tha. "Chhodo, jaane do yaar, yeh zeher ka ghoont hai lekin pee jao." Aur dil na bhi kehta tab bhi woh is cheez ko apne ghar se nikaal kar nahi phenk sakta tha, jo Imama ki milkiyat thi. Jo kabhi uske dukhon ki marham bani thi. In kitabon ke kirdaron mein woh jis kisi ko bhi sochti rahi thi lekin in kitabon par likha hua naam uska apna tha aur yeh wo naam tha jo uski rooh ka hissa tha.. Sabr ki kayi qisamain hoti hain aur koi bhi qisam aasan nahi hoti. Wahan khade usne socha aur light off kar ke kamre se bahar nikal aaya.

"Salar".. Imama ki awaaz par woh rocking chair par baithe baithe chauka. Woh darwaze mein hi khadi thi. "Tum soyi nahi abhi tak? Tum meri wajah se upset ho? Toh isne mehsoos kar liya? Salar ne uska chehra dekha aur socha. Uski aankhon mein ek ajeeb sa khauf aur isteraab tha. Woh nighty mein malboos ooni shawl apne gird lapete hui thi. Salar jawaab dene ke bajaye rocking chair ki pusht se tik lagaye use dekhta raha. Usne kursi ko hilaana band kar diya tha. Uski khamoshi ne jaise uske isteraab mein aur izafah kiya.
"Tumhari family ne kuch kaha hai? Ya meri family ne kuch kiya hai?" Woh kya soch rahi thi? Salar ne beikhtiyar ek gehra saans liya. Kaash yeh wajah hoti, na hoti jo thi.

"Kya kahegi meri family? Ya kya karegi tumhari family?" Usne madham awaaz mein usse poocha. Woh usi tarah uljhi hui  yun chup khadi rahi jaise use khud bhi is sawaal ka jawab maloom nahi tha lekin woh khamosh use dekhti rahi, yun jaise use yaqeen ho ke woh sach nahi bol raha. Woh hairaan tha ke woh kaise kaise khadshaat zehan mein le bethi hai.

Woh rocking chair par seedha ho kar baith gaya. Use us waqt Imama par jaise tars aaya tha. "Yahan ao!" Usne seedhe hote huye uska baaya haath pakda. Woh jhijhki thhatki phir uski aaghosh mein aa gayi. Salar ne uske dono haathon ko uski shawl ke andar karte huye, uski shawl ko uske gird aur achhi tarah se lapette huye kisi nanhe bacche ki tarah use apne seenay se lagate huye thapka aur uska sar chuma. Koi kuch nahi keh raha aur koi kuch nahi kar raha. Har koi apni zindagi mein masroof hai aur agar kuch hoga toh main dekh lunga sab kuch. Tum ab in cheezon ke baare mein pareshan hona chhod do."