Aab e Hayat || COMPLETED

part41

Congo ka saddar bane ka. Salar ke chehre par muskurahat aayi.

"Tum hanse nahi?"..Ibaka ne jawaban kaha tha.

"Tumne koi aisi baat nahi ki, ki main hans parhun. Harvard Kennedy School se parhne ke baad tumhe itne hi bade khawab dekhne chahiye." Ibaka uski baat par muskura diya tha.

Woh mahine Salar ke liye be had pareshani ke the. Kya karna chahiye aur kya kar sakta tha, ke darmiyan bahut faasla tha. Woh Ibaka ki madad na bhi karta tab bhi. Woh jitni jaanfishani se woh apne haqooq ki jung lad raha tha. Salar ko yakeen tha jald ya bader World Bank ke chehre par kalak milne wala ek bahut bada scandal aane wala tha. Hifazati iqdamat ka waqt ab guzar chuka tha. Petrus Ibaka sirf Kengala ya sawahili bolne wala ek past qad siyah faam nahi tha jise Congo ke junglat tak mehdood kiya ja sakta, woh America mein apni zindagi ka ek bada hissa guzarne wala shakhs tha jis ke contacts the. Woh rabte waqti taur par agar woh uske kaam nahi bhi aa rahe toh bhi us se Ibaka kamzor nahi pad raha tha balke kayi hawalon se woh zyada taqatwar ban kar ubhra tha. Woh sirf Pygmies ki awaz nahi raha tha balke Bantu qabeelay ke bohot se afraad ki awaz bhi ban chuka tha wo Pygmies ki tarah junglat par inhsaar karte the. Agla koi qadam uthane se pehle hi Ibaka ke saath us ka mail jol un logon ki nazron mein aa gaya tha jin ke mafaadat World Bank ke zariye poore ho rahe the. Salar par nazar rakhi jaane lagi thi aur us se pehle ke us ke khilaaf koi karwai hoti, England ke ek akhbar ne Petrus Ibaka ki faraham ki gayi maloomat ki tehqeeq karne ke baad Congo ke Pygmies aur World Bank ke Congo ke barani junglat mein hone wale projects ke bare mein ek cover story ki thi jismein World Bank ke kirdar ke hawale se bohot sarey eitrazaat uthaye gaye thay. Washington mein World Bank ke headquarters mein jaisey hulchal mach gayi thi. World media mein is muamle ki reporting aur coverage ko dabaane ki koshish ki gayi thi magar is se pehle hi Europe aur Asia ke bohot sarey mumalik ke mumtaaz akhbarat is article ko reprint kar chuke thay aur World Bank ke andar machi woh hulchal us waqt apne urooj par pahunch gayi thi, jab Salar Sikander ki taraf se head office ko Congo mein chalne wale un projects ke hawale se ek tafseeli e-mail ki gayi jis mein us ne mukhtalif mahooliati idaroon se milne wala data bhi munsalik kiya tha jo in junglat ki is tarah katai ko ek bade mahooliati adam-tawazon ka paish khema qarar de chuke thay. Ek insaani almeya ke ilawa. Us ka woh khat bank ke aala ohde daron ke liye shadeed pareshani ka bais bana tha aur yehi woh waqt tha jab Salar Sikandar ko na-maaloom zarai ke taraf se dhamkiyon ka aghaz hua tha. Woh projects jo unhein chalane wali companiyo ko arbo dollars ki aamdani de rahe thay bank ke apne country head ki mukhalfat ka bais bante toh wo companies aur un ke peechay khadi bein-ul-aqwami taqatain khaamosh tamashaai nahi bani rah sakti thi. Koi aam surat e haal hoti toh us waqt tak Salar Sikandar se istefa le kar use bade had tak aamez tareeqey se mulazmat se farigh kiya ja chuka hota magar is waqt us ka istefa, international media ke tajassus ko aur ubhaar deta. Woh toofan jo abhi chaaye ke cup mein aaya tha woh us se bahar aajata. Is e-mail ka jawab Salar Sikandar ko ek tanbeeh ki soorat mein diya gaya tha jo sadah lafzon mein khamosh ho
jaane ki taakeed thi aur Salar ke liye ghair mutawaqqu nahi thi.

Bank ne na sirf is e-mail mein hone wale us ke tajziye ko napasand kiya tha balke Petrus Ibaka ki faraham ki jaane wali bunyad par guardian mein sha'ee hone wali cover story ka malba bhi us ke sar daalte hue usay, Ibaka aur uske cover story mein istemaal hone wali maloomat ka zariya qarar diya gaya tha.

Yeh ilzaam Salar Sikandar ke professional kaam par ek dhabbe ke mutaradif tha. Petrus Ibaka se hamdardi rakhne, muta'asir hone aur mail-jol ke bawajood Salar ne us se bank ki kisi information ya dastawaiz ki baat kabhi nahi ki thi. Ibaka ne sari maloomat ya dastawaizat kahan se li thay, woh Ibaka ke ilawa aur koi nahi janta tha. Is tambhi ke jawab mein Salar ne bank ko apne istefa ki paish kash ki thi. Usay ab yeh mehsoos ho raha tha ke usay monitor kiya jaata tha. Us ki phone calls tape horahi thi aur us ki e-mails hack horahi thi.. Dino mein us ke office ka mahol tabdeel ho gaya tha. Us ne bank ki narazi aur hidayat ke bawajood Ibaka se na to apna mail-jol khatam kiya tha na hi rabta khatam kiya tha. Istife ki paish kash ke saath us ne bank ko Cogo mein chalne wale junglat project ke khilaf apni tafseeli report bhi bhej di thi jo Salar Sikandar ki apni tehqiqat aur maloomat ki buniyad par thi aur tawaqqo ke mutaabik use Washington talab kar liya gaya tha..