Aab e Hayat || COMPLETED

part 62

Kinshasa se wapsi unki zindagi ka be-had khushgawar tareen safar hota agar is safar ke peeche Salar Sikandar ki bimari na khadi hoti. Woh paanch saal ke baad apne mulk wapas aaye the. Lekin ab aage andeshon ke siwa filhaal kuch nazar nahi araha tha. Kayi saalon ke baad Imama phir ghar se beghar hui thi apni chatt se yak dum woh Salar ke walidain ke ghar aa beti thi. Woh be-had achhe log the pyar karne wale... ehsaan na jatanay wale. Par ehsaan to tha unka... Kinshasa se Pakistan aane se pehle usne ek din charon bachon ko baitha kar samjhaaya tha. "Hum ab jahan ja rahe hain woh hamara ghar nahi hai. Wahan hum guest hain aur jitni der bhi hamein wahan rehna hai, achhe mehmaan ki tarah rehta hai. Aur achhe mehmaan kya karte hain?"

Usne apne bachon ke samne beghari ko naya malboos de kar pesh karte huye kaha. "Achhe guest dher saari cheezein late hain. Maze maze ki baatein karte hain aur jaldi chale jaate hain. Aur koi bhi kaam nahi karte, rest karte hain."

Hameen ne hasb e adat aur hasb e tawaqqu sab par sabqat le jaane ki koshish mein apne tajrubat aur mushahidat ki bunyad par apna jawab pesh karte hue Imama ko ek hi waar mein lajawab kar diya.

"Use hansi aagayi. Maa ko haste dekh kar Hameen be had jazbati ho gaya.

"Hurraayy..! Mein jeet gaya!" Usne hawa mein mukke lehrate hue jaise sahi jawab boojh leene ka elaan kiya. "Kya usne theek kaha hai?" Anaya ko jaise yaqeen nahi aaya tha.

"No" Imama ne kaha. Hameen ke chehre par be yaqeeni jhalak uthi.

"Achhe mehman kisi ko tang nahi karte, kisi se farmayish nahi karte, kisi cheez mein nuqs nahi nikalte aur har kaam mezban se ijazat le kar karte hain. Woh apne kaamon ka bojh mezban par nahi daalte."

Imama ne unhein samjhane wale andaz mein kaha.

"Oh! My God, Mummy! Main achha guest nahi hona chahta, main bas guest banna chahta hoon."

Hameen ne maa ki baat kaat'te hue behad sanjeedgi se kaha. "Hum dada, dadi ke ghar ja rahe hain aur humein wahan waise rehna hai jisse woh comfortable ho. Unhein shikayat ya takleef nahi ho." Imama ne iski baat ko nazar andaz karte hue kaha.

Ok Anaya, Reisah aur Jibreel ne baek waqt maa ko itminan dilaya.

"Aur hum apne ghar mein kab jaenge?" Hameen ne maa ko apne aap ko nazar andaz karne par bilaakhir poocha. "Jaldi jaenge!" Usne nazar milaye baghair Hameen ko jawab diya. Woh mutma'in nahi hua.

"Jaldi kab?" Woh be sabra tha.

"Bohot jaldi. " Aur humara ghar hai kahan?" Main ne peechle jawab se mutma'in na hote hue sawal badla aur Imama ko jaise chup lag gayi. Sawal theek tha, jawab nahi tha.

"Hum naya ghar kharidenge." Anaya ne jaise uski chup ka dafaa kiya. "Kahan?" Hameen ko mukammal jawab chahiye tha.

"Jahan baba honge." Jibreel ne is baar usay mukammal jawab dene ki koshish ki. "Aur baba kahan honge?" Hameen ne ek aur mantiqi sawal kiya jo Imama ko chuba tha.

"Abhi hum Pakistan ja rahe hain phir baba jahan jaayenge, wahan hum log bhi chale jaayenge." Jibreel ne maa ki aankhon mein asar ne wali nami ko bhanpa aur jaise deewar banne ki koshish ki. "Wow, yeh toh bohot achha hai." Hameen bilaakhir mutma'in hua.

"Main baba ke saath rehna chahta hoon." Usne jaise elaan kar ke maa ko apni tarjeeh batayi... Imama un charon se mazeed kuch nahi keh sakhi. Yeh samjhana bada mushkil kaam hota hai aur khaas tor se us cheez ko samjhata jo khud samajh mein nahi aa rahi hoti. Usne in charon ko sone ke liye jaane ka keh diya aur khud unke kamre se nikal aayi.

"Mummy" Hameen uske peeche lounge mein nikal aaya tha. Imama ne usay palat kar dekha. Woh jaise kisi soch mein tha.."Yes" Usne jawab diya.

"Main aapko kuch batana chahta hoon lekin main confused hoon." Usne maa se kaha.