Aab e Hayat || COMPLETED

part43

"President ko is project par tumhari support chahiye. Mutlaq aur ghair musharrif support." Rafael ne ab lafziyat aur tamheedon mein waqt zaya nahi kiya tha. Usay andaaza ho gaya tha. Salar Sikandar ke liye yeh dono cheezein bekaar aur be asar thi. "Mera khayaal hai, main woh nahi de sakoon ga. Is project ke hawale se meri jo raay aur stand hai, woh main bata chuka hoon. Mera aat aur ohde meri stand ko badal nahi sakte. Meri khwahish hai Africa ke liye President agar itni hamdardi aur ikhlaaq rakhte hain to woh is report se sirf muta'asir na ho, woh fori tor par is par koi action lein. Kya kuch aur hai, jo aap ko kehna hai?" Salar ne coffee ke us cup ko haath bhi nahi lagaya tha jo us ke samne pada tha. Alexander Rafael duniya ki bohot badi badi organizations mein har tarah ke logon ke saath kaam kar chuka tha. Salar Sikandar ko woh us mulaqat se pehle kuch bhi nahi samajhta tha. Woh ab usay be waqoof samajhta tha. Saintis saal ki umr mein... plate mein rakh kar usay itna bada ohda peish kiya ja raha tha aur woh usay thukra raha tha ghuroor tha to be ja tha be waqoofi thi to inteha ki aur tanak thi to be maqsad... us ne apni poori zindagi mein kisi zaheen aadmi ko itna be waqoof aur be gharz nahi paaya tha. Woh yeh aitraf nahi karna chahta tha par kar raha tha. Woh pehli baar zahanat ko be los aur be gharz dekh raha tha aur woh jaanta tha woh jis duniya mein kaam kar raha tha, wahan is be gharz aur be los zahnat ko arooj kabhi hasil nahi hota. Wahan bethe us ne Salar Sikandar se kaha tha. "Tumhein sab kuch aata hai. Tact nahi aate, is liye tum kamyabi ke sab se oopar wale zeenay par kabhi khade nahi ho sako ge." Woh us se aisi baat nahi kehna chahta tha, phir bhi keh baitha tha. Agar tactful hone ka matlab be zameer aur bad-deeyanat hota hai to phir yeh khassosiyat mein kabhi apne andar paida nahi karna chahu ga. Main apna istifa aaj hi mail kar doon ga." Woh uth khada hua tha. Us ne aakhri musaafaha ke liye Alexander Rafael ki taraf table par kuch jhuk kar haath badhaya tha Rafael uthna nahi chahta tha lekin use uthna pada tha. Wo musaafirah kar ke darwaze ki taraf barhte hue Salar Sikandar ki pusht ko dekhta raha aur kyun dekhta raha tha, wo ye nahi jaan paya tha...

Salar Sikandar jab World Bank headquarters se nikla, us waqt bunda bandi ho rahi thi, wo cab par wahan aaya tha aur wapasi par bhi usko cab mein hi wapas jaana tha magar jo kuch wo pichle chand ghanton mein andar bhugat aaya tha, us ke baad wo be maqsad, headquarters se bahar aa kar paidal footh path par chalta raha. Uska hotel wahan se qareeb tha. Wo paidal chalta rehta toh adha pon ghantay mein wahan pohanch jata. Wahan aate hue use jaldi thi. Wapas jaate hue nahi. Bunda bandi ki wajah se sardi barh gayi thi, magar wo apne suit ke upar long coat pehne huye tha. Wo Gumbay se chalte hue Washington ki agle teen din ki mosam ki pesh goi parh kar chala tha. Apni zindagi ka ek bohot bada hissa America mein guzarne ki wajah se, wo jaise aadi ho gaya tha. Ek lagi bandhi aur makanaki andaaz mein zindagi guzarne ka, jahan har cheez pehle se dekh kar ki jati hai. Mosam ka haal dekh kar safar plan kiya jata hai. Booking karwa kar kisi hotel ke liye rawana huya jaata hai. Har cheez ke bare mein pehle se tay kar liya jata hai. Usne World Bank mein us job ka bhi us makaanaki aur professional andaaz mein adraak kiya tha, lekin jo kuch wo ab bhugat raha tha wo kabhi uske farishton ne bhi nahi socha hoga...

Doctorate ki degree ke husool ke baad wo uski pehli job thi aur wo is job se bohot khush tha. Wo ab zindagi ko paanch, das, pandrah bees saalon ke tanaazur mein dekhta tha, kyun ke ab use apne saath saath kuch aur zindagiyon ki zimmedariyon ko bhi uthana tha aur ab yakdam wo apni pesha warana zindagi ke sab se bade bohran mein phans gaya tha. Uske saath biwi aur bachon ki zimmedariyan naa hoti, tab wo is tarah pareshan naa hota kyun ke jo bhi nataij hote, uske kisi bhi faisley ke, wo sirf use bhugatnay parhtey. Koi aur uske kisi faisley se pohnchnay walay kisi nuqsaan mein shareek naa hota lekin ab... foot path par chalte chalte usne be ikhtiyar ek gehra saans liya. Wo chand din pehlay tak apne aap ko duniya ka masroof tareen insaan samajhta tha aur ab in chand ghanton ke baad duniya ka bekaar tareen insaan...

Kuch ajeeb si zehni kefiyat thi us waqt uski... Filhal uske paas karne ke liye kuch bhi nahi tha. Koi meeting, koi visit, koi agenda nahi, koi phone call, koi email, koi presentation bhi nahi lekin sochne ke liye bohot kuch tha. Ek lamhe ke liye chalte chalte use khayal aya kya hua agar wo samjhauta karle wahi se wapas headquarters chala jaye. Wo paishkash qubool karle jo abhi use ki gayi thi. Koi mushkil aur namumkin to nahi tha yeh abhi sab kuch uske hath mein tha. Sab kuch theek ho jata... zindagi phir pehle jaise ho jati. World Bank mein pehle se bhi zyada bada ohda taraqqi maraat Status kya burai thi agar wo zameer ko kuch der ke liye sula deta, Congo us ka mulk nahi tha, na pygmies us ke log phir?