Aab e Hayat || COMPLETED

part 54

"Mummy Hameen kab bada hoga?" Is din Jabreel ne apni art book mein kuch banate hue Imama se poocha jo rote bilakte Hameen ko hamesha ki tarah thapak thapak kar khamosh karne aur kuch khilane ki koshish kar rahi thi aur uski koshish mein behaal ho rahi thi aur uski yeh halat Jabreel aur Anaya baghor dekh rahe the. Woh kuch mahine pehle Congo mein apne naye ghar mein muntaqil hue the. Is hotel mein do teen mahine rehne ke baad.

"Bada toh ho gaya hai." Imama ne uske sawaal aur andaaz par gaur kiye baghair kaha.

"To phir rota kyun rehta hai?" Imama becharagi se apne bade bete ko dekh kar rah gayi. "Aap isse poochh lein ke usko kya chahiye." Woh Imama ko jaise masle ka hal bata raha tha. Main poochh nahin sakti aur woh bata nahin sakta. Imama ab bhi usse uthaaye lounge mein thalte hue usse thapak rahi thi aur woh isi tarah rote hue uski giraft se azaad hone ke liye machal raha tha. Woh use neeche betha deti to woh god mein uthaaye jaane ke liye haath buland karke dhaadain marta aur yeh drill din mein do teen baar ka mamool tha... Rona Hameen Sikandar ka man pasand mashghila tha. Woh baghair aansuon ke gala phaad phaad kar rota tha aur phir rone ke beechon beech koi bhi dilchasp cheez nazar aane par yak dam rona band kar ke uska jaiza lene mein masroof ho jaata aur jab is kaam se farigh ho jaata to ek baar phir apne ronay ke silsile ko wahi se jaari karta jahan usne chhoda tha. Saat aath mah ki umr mein hi usne bayak waqt chaar daant nikalne shuru kar liye the jo khargosh ke daanton ki tarah uske munh ke darmiyan mein the aur uske rone aur hasne par nazar aate the. "Isko jaldi kis baat ki hai?" Baik waqt chaar daanton ko nikalte dekh kar Salar ne kaha tha tha. Jabreel aur woh Hameen Sikandar ke baare mein ek jaise tassurat aur khayalat rakhte the. "Yeh tum khud is se poochh lo." Imama ne jawab diya tha. Hameen ko paalna uske pehle do bachon ki nisbat zyada thakane aur aazmaane wala kaam sabit ho raha tha. Hameen Sikandar in chaar daanton ke zuhoor pazeer hone se pehle bhi sirf baron ke khanay wali har us cheez mein dilchaspi mehsoos karta tha jo chatkhare wali hoti apne pohle munh ke saath bhi chips uski pasandeeda khurak thi jise woh sirf chaba nahin nighal bhi sakta tha. Woh chips ka packet tak pehchaanta tha aur aisa mumkin nahin tha ke Jibreel aur Anaya uske qareeb baith kar koi cheez itminan se use khalaye baghair khud kha lete. Woh ek ajeeb o ghareeb bacha tha. Aur yeh bayaan us ke bare mein Salar Sikandar ne diya tha jiska khayal tha usne aisi makhlooq kabhi nahin dekhi. Sikandar Usman ne usse kaha tha. "Main ne dekhi hai. Woh tumhari copy hai." Yeh ziadti hai. Salar ne unki baat par ihtijaaj kiya tha, woh aur Tayyaba un logon ke paas Congo aaye hue the jab woh dono Hameen Sikandar ke haathon bannay wali unki durgat dekh rahe the. Woh tab das mah ka tha aur sab se pehle jo lafz usne bolna shuru kiya tha woh Sala tha aur har baar Salar ko ghar mein dakhil hote dekh kar woh be had khushi se haath paon marta. Sala, sala chillate hue uski taraf jaane ki koshish karta tha. Yeh pehla lafz tha jo usne bolna shuru kar diya tha. Jibreel aur Anaya ki tarah woh bhi jaldi bolna seekh raha tha.

Us mein cheezon ki shanakht aur pehchaan ki salahiyat bhi un dono ki tarah munfarid thi lekin uski bolne ki salahiyat un dono se bhi achi thi.

Beta Baba pehli baar Salar ke liye woh lafz sun kar hansi se be-haal hone ke bawajood Imama ne is lafz ko badalne ki koshish ki thi. Woh Salar par haath rakhte hue use tod tod kar sikhha rahi thi. Ba-ba, sa-la, Hameen ne maa ki mehnat par paani pheretay hue Salar ke liye wahi lafz istemal kiya jo woh Salar ke liye maa ko pukarte sunta tha.

"Tum ise baba mat sikhaao, sirf re lagwa do mere naam ke saath, yeh bhi ghaneemat hoga mere liye," Usman aur Tayyaba ke liye ek tafree ban gayi thi aur paanch saala Jabreel buddha ke se tahammul aur danai ke sath apne is eklaute chote bhai ko dekhta rehta tha jisne unke ghar ke amn aur sukoon ko pichle taqreeban ek saal se tahobaala kar ke rakha hua tha. Pehle uska khayaal tha Hameen bada ho jaaye aur chalna shuru ho jaaye to theek ho jaayega lekin jab bila akhir usne chalna shuru kiya to dekh kar usse andaaza hua ke woh is masle ka ghalat hal tha.

Hameen Sikandar ko pair nahin par mil gaye the aur woh ab kahin bhi ja sakta tha aur kahin se muraad kahin bhi tha. Aur uski favorite jagah bath room thi. Woh bhi wahan us waqt jaana pasand karta tha jab Jabreel use bath room mein jaata dikhayi deta. Aur Jabreel ne uske haathon kayi baar khaas sharmnak surat-e-haal ka samna kiya... Jis bath room ko bachay istemal karte the, us bath room mein lock nahin tha aur darwaze ka handle ghuma kar use kholna Hameen ke baayein haath ka khel tha. Jabreel ke liye Hameen ki mojoodgi mein bath room jaana, jaan jokhon ka kaam ban jaata tha. Woh Imama ya Haedi ke aas paas na hone par bath room ke darwaze ke andruni taraf bath room mein padi un sab cheezon ko rukaawaton ke tor par darwaze ke samne dher kar ke phir bath room ka istemal karta tha. Salar Sikandar agar use ajeeb o ghareeb kehta tha to Hameen Sikander, baap ke diye gaye is title par pura utarne ki koshish kar raha tha aur poori dil jama'ai ke saath kabhi kabhi un sab ko lagta tha, Hameen Sikandar ko koi bhi control nahin kar sakta tha magar duniya mein har Fir'aun Musa hota hai aur chunni ki unki zindagi mein aamad ek aisi hi ne'mat ke tor par hui thi.