Aab e Hayat || COMPLETED

part42

Is board room ka mahaul waisa nahi tha jaisa Salar ne hamesha dekha tha. Sanjeedgi har board ka hissa hoti thi, lekin jo usne is din wahan dekhi thi, woh sanjeedgi nahi thi, woh sard mehri thi aur woh sard mehri board room mein baithe sirf kisi ek ya do logon ke andaaz aur harkato se nahi jhalak rahi thi. Wahan is board room mein baithe saath ke saath logon ke chehron aur aankhon mein ek jaisi thandak aur sard mehri thi. Aisi sard mehri jo kisi kamzor asaab ke insaan ko hawas bakhta karne ke liye kaafi thi... Be ta'asur chehre, doosre ke ousaan khata kar dene wali nazrein kisi dostana muskurahat se aari bhinche huye lab... Jin par agar kabhi koi muskurahat aati bhi to woh ek tazheek aamez aur tawheen aamez kham se zyada kuch nahi hota tha jo pal bhar reh kar gayab ho jata tha. Ek bezvi shakal ki mez ke ird gird taangon par taanghein rakhe woh paanch mard aur do aurtein is kaam ke maahir the jo is waqt kar rahe the. Woh World Bank ke Salar Sikandar jaise kai bazameer employees ka dhadan takhta kar chuke the jinhein zindagi mein kabhi baithe bithaye World Bank mein kaam karte karte professional ethics yaani ikhlakiyat ka doura padta. Insaniyat yaad aana shuru hojati... Salar Sikandar unke samne kya shai tha. Kam az kam is meeting ke aghaz se pehle woh yahi soch kar aaye the. Ijtimai tor par unki hikmat yeh nahi bhi thi to bhi infiradi tor par unka tareeqa kar yahi tha. Woh saath log Salar Sikandar ke career ke hawale se ek ek cheez jaante the aur itni hi malumat woh unke baare mein rakhta tha..Unme se kisiko kisi ke ta'aruf ki zarurat nahi thi. Salar Sikandar ne meeting ke aaghaz mein is meeting ki sarbarahi karne waale head ke ibteda kaamat bade tahammul se sune the..wo Salar Sikandar ki naa ahli kotahiyo aur naakamiyon ko discuss kar raha tha..Salar ne baaki chhe logo ko nazrein khud par jami mehsus ki.. wo ek charge sheet thi jo is project ka zikr karte hue Michael Frank us par laga raha tha..Salar bhi itne hi beta'assur chehre ke sath in ilzamat ko sunta raha...is meeting ka agenda yeh nahi tha lekin iske bawajood Salar ke liye wo sab ilzemat gair mutawaqquh nahi the..."Main inme se kisi bhi baat ka jawaab dene se pehle is project ke hawale se presentation dena chahta hu kyunki mera khayal hai yeh presentation in mein se bohot saare sawaalon aur aitrazat ka jawab de degi, jo aap log mujh par kar rahe hain." Salar ne Michael ke ibtedai kalimat ke baad uss ke kisi ilzaam ka jawab dene ke bajaye kaha tha. Un saat afrad mein se kisi ne usay is presentation ko pesh karne se roka nahi tha lekin un mein se kisi ne is presentation ki noayat aur maqsad jaanne mein dilchaspi bhi nahi li thi.

Salar ek ke baad ek slide projector par dikhata gaya. Us mein bohot saare haqaiq aur adad o shumar the aur us ki apni zaati tehqiq thi woh in tamam cheezon ko un slides ke zariye dikha raha tha. World Bank ke taawun se agar woh mansooba tor charh jaata to Africa ki jungli hayatiyaat ke saath saath pygmies ki mumkinah tabahi ke hawale se hulnaki adaad o shumar... World Bank ke charter ki kaun kaun si shikhoon ki khilaaf warzi is project ke zariye ho rahi thi. In junglaat mein kaam karne wali companies ki taraf se Congo ki maqami abadi ke istihsal ke documentary saboot... aur international donor companies aur NGOs ke khadshshaat par mushtamil reports ke hawale se us ki presentation mukammal thi, aur woh agar kisi akhbaar ya news network ke haath lag jaati to Africa mein woh World Bank ka sab se bada scandal hota. In saat logon ne woh presentation be ta'asur chehron ke saath apni apni kursiyon par sakhit bethe dam saadhe dekhi thi, lekin aadh ghanta ki is presentation ke khatam hone ke baad un saatoo ke zehan mein jo khadsha utha tha woh ek hi tha ... Salar Sikandar ke haath mein woh grenade tha jis ki pin woh nikaal kar usay haath mein liye bethe tha. Masla yeh nahi tha ke woh grenade doosre ki taraf phenk dene se un ki jaan chhoot jaati... woh jahan bhi phatta wahi tabahi phailata. Projector ki screen taareekh hui. Salar ne apne laptop ko band karte hue in saatoo logon ke chehron par nazar daali, Michael ke chehre ko dekha jo us ki sadarat kar raha tha. Itne saalon ki public dealing ke baad woh itna andaza to laga hi paaya tha ke usne presentation tayyar karne aur usay yahaan pesh karne mein apna waqt zaya kiya tha.

"Toh tum is project par kaam nahi karna chahte?"

Michael ne apni khamoshi todte hue us se sawal kiya tha, usne board room mein maujood logon ke hawale se Salar ke khadshat ki jaise tasdeeq ki thi.