Aab e Hayat || COMPLETED

part 61

"Mummy! Main aapko seb kaat kar la kar doon?" Imama Jibreel ki baat par hairaan hui thi. Ghar ke saman ki packing ka silsila shuru ho chuka tha aur woh har roz thoda thoda samaan pack kar ke store karti ja rahi thi. Is waqt bhi woh ghar ke ek kamre mein isi kaam mein masroof thi jab Jabreel ne uska haath bataate bataate ek dam se usse kaha tha. Imama ki hairani baja thi... Phal kaat kar khilne ki offer Hameen ki taraf se toh normal baat thi lekin Jabreel is tarah ke kaam nahi karta tha, na hi woh khud phal khane ka shoqeen tha.

"Tum khana chahre ho toh main tumhein kaat doon?" Imama ne jawaban use offer ki. "Nahi," Jibreel ne jawab diya. Woh us kamre ki khuli hui wardrobe se kapde nikaal nikaal kar Imama ke qareeb bed par rakh raha tha jinhein Imama ek bag mein rakh rahi thi. Woh shayad itne mahinon mein pehla mauka tha jab Imama ko tashweesh hui thi. Uske bachay uski pareshani aur takleef ko mehsoos karna shuru ho gaye the aur yeh koi achi alaamat nahi thi, kayi mahinon ke baad usne Jabreel ko ghor se dekha tha. Woh ek do mahinay mein das saal ka hone wala tha aur woh das saal ka hone ke bawajood apne qad kaat se das saal se bara lagta tha.

Woh shakal o soorat mein Salar ki nisbat us se zyada mushabihat rakhta tha aur Hameen Salar hai lekin uske dono beton ki aankhein Salar ki tarah thi. Badi ghehri, zahanat se chamakti hui koi agar kisi aur cheez se nahi toh aankhon se yeh zarur pehchaan leta ke woh Salar Sikandar ki aulad the. "Aap aise kyun dekh rahi hain?" Jibreel ne maan ki nazrein khud par mabzool pa kar poocha tha. Woh muskuraa di. "Tum bade ho gaye ho." Jibreel ne kuch jheenp kar maa ko dekha phir ek sharmeeli muskurahat ke saath maa se kaha.

"Thoda sa."

"Han, thode se jald hi poore bade bhi ho jaoge." Woh bed par pade kapde uthate hue usse boli. "Lekin main bada hona nahi chahta." Bag mein kapde rakhte hue Imama ne usse kaha suna, woh wardrobe ki ek aur shelf khali kar raha tha. "Kyun?" Use achambha hua poocha. "Aise hi," usne bade aam se andaaz mein maa se kaha.

Woh pehla mauka tha jab Imama ko uska andaaz ajeeb uljha hua mehsoos hua, us ghar mein sirf woh nahi the jo pareshan the unki sab se badi aulad bhi aisi hi pareshani se guzar rahi thi lekin is pareshani ki noyat ko Imama tab boojh nahin saki thi. Woh use sirf ek rad-e-amal samjhi thi. Jabreel pehle bhi maa ke hawale se hasaas the. Be-had hassas tha. Usse koi bhi pareshani hoti toh woh sab se pehle mehsoos kar leta tha. Phir woh maa se kurede baghair nahi rehta tha. Yeh uski fitrat ka hissa tha.

Imama ne is phal kaatne ki offer ko bhi isi tashweesh ka hissa samjha tha. Use andaza tha ke koi bhi usay in dinon dekh kar yeh andaza lagaye baghair nahi reh sakta tha ke woh pareshan thi...dino mein uski girti hue sehat, us ke ankhon ke siyah halqay aur uski aksar ronay ki wajah se surkh aur sochi rehne wali ankhein kisi ko bhi aap ki zehni aur jazbati halat ka pata de sakti thi, is liye Jabreel agar koi andaza laga raha tha toh yeh koi ghair mamooli baat nahi thi. Woh kuch ulajhti sochti hui isi tarah samaan pack karte rahi aur waqfe waqfe se samaan la kar rakhte hue Jabreel ko dekhti rahi, phir jaise use khayal aaya tha ke use Jabreel ko apne hawale se koi tasalli aur dilasa dena chahiye tha uski tashweesh ko kam karne ke liye.

"Jibreel! Main bilkul theek hoon." Usay yeh jumla bolte hi us jumle ke halkay pan ka ehsas ho gaya tha. Jabreel ne wardrobe ke paas khade khade ek dam jaise palat kar maa ko dekha aur phir be had sanjeedgi se kaha, "Mujhe pata hai."

Imama us se nazrein chura gayi thi. Jibreel ne jaise maa ka parda rakha tha. Woh maa ko sharminda nahi karna chahta tha, na hi us se kuch poochna chahta tha kyun ke kai dinon ke baad, un donon ko ek doosre se baat cheet ka mauka mil raha tha. Ek bar phir se woh dono kaam mein masroof ho gaye the aur tabhi kaam karte karte Imama ne pehli bar kamre ki khamoshi ko mehsoos kiya.

Woh dono itni der se kaam kar rahe the lekin unke darmiyan bohat kam jumlon ka tabadla hua tha, mamool aisa nahi hota tha. Use aur Jibreel ko jab bhi akela kuch waqt guzarne ka mauka milta tha, woh dono bohat achi gap shap karte the. Jabreel usay school ki bohat si baatein sunata... Apne doston ke bare mein, teachers ke bare mein woh batooni hone ke bawajood aise muwaqen par maa se bohat kuch share karta tha. Aaj pehla mauka tha ke chhote behen bhaiyon ki adam mojoodgi mein bhi woh itna khamosh tha.