ဆန်ကုန်မြေလေးတွေကခွင့်လွတ်ဖို့တောင်းခံနေကြတယ်

Chapter 55 The Scum
December 11, 2023
Chapter 55

ကျုံးရှီယို့ပြင်ဆင်ထားသော လက်ဆောင်များသည် ဒုတိယအကြိမ် အချည်းနှီးဖြစ်သွားပြန်သည်။

ဒီလက်ဆောင်တို့ကိုပြင်ဆင်ရန် လဝက်လောက်အချိန်ယူခဲ့ရသည်။ အသက်တစ်နှစ်မှသည် ဆယ့်ရှစ်နှစ်မှ မိန်းကလေးများ သဘောကျနိုင်မည့် လက်ဆောင်တို့ကို လူတစ်ရပ်စာမြင့်အောင် ထုတ်ပိုးထားသော လက်ဆောင်ထုပ်ကြီးဖြစ်သော်လည်း ကျုံးယို့ယို့ကထွက်သွားပြီဖြစ်ပြီး ပေးရန်ပင်အချိန်မရလိုက်ပေ။

စွန့်ပစ်ခံလိုက်ရသလိုပင် သူတို့က ကားနောက်ဖုံးထဲတွင် ကျန်နေခဲ့သည်။ မွေးနေ့ပွဲပြီးနောက် သူက၎င်းတို့ကို ကျုံးအိမ်တော်ကို ပြန်ယူလာခဲ့သော်လည်း...

ကျုံးယို့ယို့က ကျုံးအိမ်တော်သို့ပြန်မလာသည်မှာ ကြာပြီဖြစ်၏။ သူမ၏အခန်းနှစ်ခန်းကို နေ့တိုင်း သန့်ရှင်းရေး လုပ်နေကြသောကြောင့် ကျုံးရှီယို့က လက်ဆောင်တွေကို သူမအခန်းထဲသို့ထည့်မထားရဲပေ။ မဟုတ်လျှင် တစ်စုံတစ်ယောက်က ခွင့်ပြုချက်မရှိဘဲ ဖောက်လိုက်မည်စိုးသည်။ ထို့ကြောင့်သူသည် လက်ဆောင်တွေ အကုန်လုံးကို သူ့အခန်းထဲသာထည့်ထားလိုက်တော့သည်။

သူကအနောက်တိုင်းဝတ်စုံကိုချွတ်လိုက်ပြီး ဆေးကြောကာ ရေချိုးခန်းထဲမှ ထွက်လာသည့်အခါ  အခန်းထဲရှိ လက်ဆောင်တစ်ပုံတစ်ပင်ကြီးမြင်လျှင် သက်ပြင်းချလိုက်တော့၏။

သူက စိတ်ညစ်မှုတို့ကို မထိန်းနိုင်ကာ “ မင်းကနောက်တစ်ကြိမ်ပြန်မွေးဖွားလာတာတောင်မှပဲ မင်းအစ်မရဲ့ လျစ်လျူရှုတာကို ခံနေရတုန်းပဲ” ဟု ကိုယ့်ကိုကိုယ် ပြစ်တင်ပြောဆိုလိုက်သည်။

သူသည် အိပ်ယာပေါ်သို့လှဲချလိုက်ကာ ဖုန်းကိုဖွင့်ပြီး သတင်းတို့ကိုကြည့်လိုက်သည်။

ကျုံးမိသားစု၏ ရုတ်တရက်ဆန်စွာ ကြေညာချက်ကြီးသည် အမှန်တကယ်ကိုပင် အုတ်အုတ်ကျက်ကျက်ဖြစ်သွား ခဲ့သည်ပင်။ တစ်နေ့ကုန်ပြီး ညဘက်ရောက်သွားသည်ထိ သတင်းက နာမည်ကြီးနေဆဲဖြစ်သည်။ သူကကြည့်နေရင်း မွေးနေ့ပွဲမှ ဗီဒီယို အတိုလေးတွေကိုတွေ့သွားသည်။