ဆန်ကုန်မြေလေးတွေကခွင့်လွတ်ဖို့တောင်းခံနေကြတယ်

chapter 118

Chapter 118 The Scum
December 29, 2023

Chapter 118

ဧပြီလအစောပိုင်းတွင် လမ်းဘေးရှိ သစ်ပင်များ၌ ပန်းများပွင့်ဖူးနေကြကာ ပတ်ဝန်းကျင်က အေးချမ်းသာယာနေသည်။ ထိုအချိန်မျိုးတွင် မြို့နယ်ရုပ်သံဌာနက သတင်းတစ်ခု လွှင့်လာ၏။

လွန်ခဲ့သည့်၁၈နှစ်၌ ဤပြည်နယ်၏ ဧရာမမိကျောင်းကြီးဖြစ်သည့်ကျုံးမိသားစု၏ ကလေးချင်းလဲထားခဲ့သည့် အဖြစ်အပျက်သည်  ရွှေရောင်မျက်လုံးဥပဒေစနစ်၏ နောက်ဆုံးထုတ်လွှင့်မှုတွင် ပါဝင်လာသည်။ ၎င်းက လူကြီးမင်းထန်၏ အလုပ်သင် ရှောင်ချန်းကိုယ်တိုင် ဆောင်ရွက်သော အစီအစဥ်ဖြစ်သည်။ ဗီဒီယိုတွင် တစ်ဝက်သည် အင်တာဗျူးကဏ္ဍဖြစ်ပြီး တစ်ဝက်သည် လွန်ခဲ့သော ၁၈နှစ်က မုန့်ချန်ကျူးလွန်ခဲ့သည်များကို စုံစမ်းစစ်ဆေးထားသည့် အချက်အလက်များဖြစ်သည်။

လွန်ခဲ့သည့်၁၈နှစ် ဆေးရုံမှစ၍ အစီအစဥ်မှူးသည် ထိထိရောက်ရောက်ကိုယ်တိုင်သွား၍လေ့လာသည်။ ကျုံးမိသားစုပြောပြသည့် အချက်အလက်များအတိုင်း ရိုက်ကူးရေးသမားများက နေရာစုံအောင်သွားကြသည်။ ထိုနေရာသည် မုန့်ချန် ကျုံးယို့ယို့ကိုခေါ်သွားခဲ့သော တိဘက်၏ ဆင်းရဲနွမ်းပါးလှသည့် လမ်းများဖြစ်၏။

ရိုက်ကူးရေးသမားများသည် အိမ်နီးနားချင်းတို့ကို လိုက်လံမေးမြန်းရာ အချက်အလက်များစွာရလာ၏။

“မုန့်ချန်အကြောင်းကိုမေးတာလား ဟုတ်တယ် သူက ကလေးမလေးတစ်ယောက်နဲ့ ဒီမှာနေသွားတာ သူ့ကိုမှတ်မိတယ် သူကဒေါသကြီးတယ် တစ်နေ့လုံးအလုပ်လုပ်ပြီးပင်ပန်းတာကြောင့်လဲပါမှာပေါ့ အိမ်ပြန်ရောက်လို့ ကလေးနဲ့အဆင်မပြေရင် အိမ်အပြင်ကိုကန်ထုတ်တယ် ကလေးမလေးရဲ့လက်မှာ အိမ်ပြင်ဆွဲထုတ်ခံရလို့ ရတဲ့ဒဏ်ရာတွေဆိုတာ ရက်တော်တော်နဲ့ပျောက်မသွားခဲ့ဘူး ကျွန်မတို့အိမ်နီးနားချင်းတွေက သည်းမခံနိုင်ပေမယ့် သူတို့ကိုဝင်လဲမပြောနိုင်ခဲ့ဘူး”

သတင်းထောက်ကမေးလိုက်သည်။ “သူ့ကလေးကိုဘာလို့အဲ့လို ဆိုးဆိုးဝါးဝါးဆက်ဆံရတာလဲ”