ဆန်ကုန်မြေလေးတွေကခွင့်လွတ်ဖို့တောင်းခံနေကြတယ်

chapter 83

Chapter 83 The Scum
December 18, 2023

Chapter 83

ထိုစကားလုံးများကို အေးအေးဆေးဆေး ချရေးပြီးနောက် ကျုံးယို့ယို့သည် အင်တာနက်ပေါ်ရှိ လူတစ်စု၏ ပုတ်ခတ်ပြောဆိုမှုများနှင့် ငြင်းခုံမှုများကို ဂရုမစိုက်တော့ချေ။ သူမသည် ဖိုရမ်ကိုပိတ်ပြီး ပြိုင်ပွဲဝင်မေးခွန်းဘဏ်ကို ဖွင့်လိုက်သည်။ ထိုပို့စ်က သူမ၏ တိုက်ပွဲဝင်စိတ်ဓာတ်ကို လှုံ့ဆော်ပေးနိုင်ခဲ့သည်။ သူမသည် စာရွက်ကြမ်းတစ်အုပ်ကိုထုတ်ပြီး စားပွဲပေါ် ချလိုက်သည်။ ဖြည့်စွက်စာတစ်ဗူးကိုလည်းချ၍ အင်္ကျီလက်များကိုဆွဲတင်ကာ ထိပ်တွင် ထွက်ပေါ်လာသည့် ပြိုင်ပွဲမေးခွန်းများရှိသည့် စခရင်ကို စူးစိုက်စွာဖြင့် စတင်ကြည့်လိုက်တော့၏။

ပဏာမအကျော့၏ ပထမနေ့သာရှိသေးသော်လည်း ပြိုင်ဆိုင်မှုက အလွန်ကိုပြင်းထန်နေပြီပင်။ သွေးလွှမ်းသောညဟု ခေါ်နိုင်သည်။

နေ့ခင်းဘက်တွင် ပြိုင်ပွဲ၀င်များသည် အတန်းများတက်ရောက်ရသောကြောင့် ညဘက်တွင်တော့ အွန်လိုင်းအထက်တန်းကျောင်း ကျောင်းသားဦးရေမှာ ငါးထောင်၊ခြောက်ထောင်မှ ၂၀၀၀၀ကျော်အထိ ရုတ်တရက် တိုးသွားခဲ့သည်။ ကံကောင်းထောက်မစွာဖြင့် ဆာဗာသည် လုံလုံလောက်လောက်ပင် အားကောင်းသည်။

လူများလာသည်နှင့်အတူ ပထမနေရာ၌ တည်တည်ငြိမ်ငြိမ်နှင့် မြဲမြဲမြံမြံရှိနေသော ထိုငနဲအား သဘာဝကျကျပင် လိုက်ကြည့်မိကြတော့သည်။

ထိုငနဲ၏နာမည်ပြောင်သည် အလွန်ပင်ကျပမ်းဆန်ပြီး QYXLP သည် မျက်နှာဖြင့် ကီးဘုတ်ထဲမှ လှိမ့်ထွက်လာလုနီးပါးပင်။ ထိုစာအတွဲလိုက်ဖြင့်နာမည်သည် ရှစ်ကျစ်ထန်၊ ကျန့်ကျီရိတို့နှင့် သက်ဆိုင်လောက်မည်ဟု ဖိုရမ်ပေါ်ရှိလူများက ခန့်မှန်းကြသည်။ နံပါတ်တစ်နတ်ဘုရားက မည်သူနည်း။ သို့သော် မှန်းဆခြင်းနှင့် ခန့်မှန်းခြင်းတို့သည် လေနောက် လိုက်ဖမ်းရသကဲ့သို့ပင်ဖြစ်ပြီး ၎င်းနှင့်ပတ်သက်၍ မည်သည့်သဲလွန်စမှ မရှိပေ။

ပရိုဂရမ်နှင့်ပတ်သက်သည့်ဖိုရမ်ပေါ်ရှိ လူကြိုက်များသော ပို့စ်အစဥ်လိုက်ကို ရှစ်ကျစ်ထန် မည်သို့မသိပဲ ရှိနိုင်မည်နည်း။ သူသည် နေ့ဘက်တွင် ကျောင်းသွားတက်ပြီး အတန်းပြီးနောက်လည်း မေးခွန်းများကိုသာ လုပ်နေခဲ့ခြင်းဖြစ်သည်။ သူ့ကိုယ်သူ ယုံကြည်မှုရှိ၍ ထိုသို့လုပ်ခဲ့ခြင်းပင်။ သို့သော်လည်း သူ ဘယ်တုန်းကမှ မမျှော်လင့်ထားမိသည်က ရှုပ်ထွေးနေသည့်စာလုံးအတွဲလိုက်ကို နာမည်ပြောင်မှည့်ထားသည့် တစ်စုံတစ်ယောက်၏ နင်းခြေခြင်းကို ခံရလိမ့်မည်ဟုပင်။