زوجة الكولونيل / COLONEL'S WIFE

PART 52

#الــعـودة_للـحـاضـر

مسد القبضة ديال يديه لي كان باين فيها أثار حمرر جهة 4 ديال الصبعان بحالا خلا دار بو شي حد قبل مايخرج من فاس ولكن ماشي بمرة ، باقي غايرجع ليها بوحدو وغايخرج وهو معاه الونيسة لي تونسو فالطريق لواحد الوقت حتى يدي مول الأمانة أمانتو .. من زهرو خرجات غير بالضرب حيت ديك البرݣاݣة كانت شادة الشرجم والدرب كان عامر بالبعالك أما يعلم الله أش كان غايوقع ليه فديك الطوموبيل قبل مايلوحو منها.

عدوه لي يتعدا جنسيًا على بنات الناس ولا يمارس عليهم صحة عليهم وهادي من بين الحوايج لي فايت سالخ عليها جواد سلخة ديال الكلاب فاش كانت عندو 18 العام.

عارف مزيان بلي نورة ماواصلاش بيها الجرأة حتى لهاد الدرجة لي هضر بيها عثمان ، واحد لي كايفرز الغدر من عينين بنادم ماغاتكونش صعيبة عليه يعرف بلي السيد غير كايماطل وباغي الخلوة لي يمشي يهضر فيها مع صاحبو ، و وأخيرا ماكانش صعيب عليه يفرز بنت دارهم من البنت لي موالفة تعطيها .. شحال من مرة كانت غير كاطيح عينيها فعينيه كاتخوي البلاصة لي هي فيها .. هضرتو عطاتو سبب منطقي لي يبرر الهروب ديال مع ختو 2 مرات بلا ما دير بحساب بّاها ، السبب لي خلاها تفضل تهرب لأي قنت من غير عائلتها.

× عند نورة ×

جالسة فالكلينيك ومغطيين ليها ديك الجرحة لي كانت شادة لها على طول الحنك ، فِعلا ماكانتش جرحة غارقة وعريضة لي غاتحتاج للغراز بحكم حننكها داك الشمكار غير بزيزوار ولكن كانت عارفة مزيان بلي ديك السيكاطريس ماغاتتحيدش وغاتولي بحال شي شقة فشي مرايا.

كان قدامها داك الكويتي كايهضر مع الفرملية لي كاتشريه ليه طريقة الإستعمال ديال 2 پومادات .. ماكانتش داياها فهضرتهم بقدر ماكانت هازة الهم لكيفاش غاترجع للدار؟ عندها 5 دراهم وهي ماعارفاش هاد القنت فين جا و 5 دراهم ماعرفاتش واش غاتوصلها ولا لا .. تنهدات وهي كاتفكر واش كان حسن تخلي الفلوس طايحين؟ ولا كان حسن تخلي داك خونا يديهم بلا ماتحاول دير شي خير ولا زبل

ضار لعندها الكويتي ونطق
- [ بتأسف ] بتلشتي ويّا هاد عديم الضمير بسببي شلون كان يفكر هاد

بدلات الموضوع لي مابغاتش تهضر فيه ، على أسااس راها ماعارفاش دابا بلي دخلات فمشكل بسبابو وهو باقي كاايفكرها فيه

نورة : شُكرًا لاحقاش جيبتيني لسبيطار

- في شي بسَوِّيه لج ولا بݣدر ساعدج فيه؟ مو عارف يا بنتي كيف رد لك جميلج شتِبي؟ بدَوِّر لك على ها عديم الضمير و زجو بالسجن؟

نورة : رَجَّعني غا ماين جِبتِيني يَرحم والديك مابغيت حِتّة

لا هو فهم هضرتها مزيان والا هي كانت فاهمة هضرتو مزيان حدها فهماتو بغا يعاونها وهو فهم بلي مقلقة و باغا ترجع