× فـالــكـويــت ×
كانت واقفة بعيد على صحاباتها لي كايتغداو و مستغلة الروپو ديال الغدا فهضرتها مع ياسين و هاد المرة عاودات ليه كلشي كيما هو بلا ماتخبي حتى شي تفصيلة .. هي كاتعاود و هو كايسمع مركز فهضرتها حتى سالات عاد نطق
نطق بصوت رجولي مستفسر منها
ياسين : و هدا منين جاب نمرتك؟
نورة : جابها من عَند بَابَا قولتا لك
ياسين : ودابا شنو ناوية ديري؟
نورة : ماعارفاشي بالحَق كانفكَّار مانهضار مع بَابَا تا يعدلولي وراقيا و نعدل اموري
ياسين : هادشي لي كنت غانݣولك ، هداك كايبقا الواليد ديالك قضية تقطعي الهضرة معاه مابلانش
مابقا لها ماتقول ولكن فضلات ماتسكتش و نطقات
نورة : عاندك الحَق
تسالات لها الهضرة و سكتات كاتتسنا منو يزيد يقول شي حاجة في حين هو سكاتو طال على شلا حوايج من بينهم هادشي باش صارحاتو من نهار تعرفات على عثمان حتى لفاش صونا عليها فاروق .. كان جالس فواحد المحلبة تحت العمارة لي فيها واحد الپرطمة كايبريكولي فيها و قدامو كاس ديال الرايب مع 5 دراهم ديال الحرشة بأملو مامقيوسينش ، سقماتو و سدات ليه الشهية بهاد الهضرة
هرس داك السكات لي بيناتهم بالسؤال ديالو
ياسين : ݣلتي لي باغا تتشاوري معايا فشي حاجة ، فاش باغا تشاوري؟
سكتات لثواني كاتفكر فكيفاش تعاود ليه الموضوع من واحد الناحية رتااحت بزاف فاش عاودات ليه و لأول مرة تعاود مشكلتها بنسختها الأصلية و هي حرفياا ماخايفاش من كيفاش غايشوفها داك لي غاتعاود ليه ولا شنو غايقول عليها
نطقات بنبرة هادئة كاتكمل ليه البقية من موضوعها معاه و السبب لي خلاها تهضر معاه
نورة : شغانقولك ا خاي ياسين الشيخ فوزي فاش قولت لو على المشكل لي عاندي قاليا نمشي نسكون معاه و مع عائلتو بالحَق نقدار نبقا خدامة فلوزين عادي
ياسين : و شنو باغي منك؟
عرفاتو غايكون شاك فيه عندو شي نية خايبة ... نطقات بنفس النبرة الهادئة و هي كاتوضح ليه النية الحسنة
نورة : المقابل دهادشي نقابل ليه الخداما لي معايا فلوزين و نكون انا هي العينين والودنين دالشيخ تمّاكين قول نكون بحال الشّافّ وصافي
ياسين : و مالو ماعندوش لي يدير هاد الخدمة من غيرك؟ راه پوسط زوين حسن من لي راكي شاداه دابا على ماكانعرف
نورة : عاندك الحَق بوسط مزيون بالحَق كايخاصُّو واحيد تقة و انايا ولا كايتيق فيا من نهار كونت باغا نرجع لو الفلوس اما لي كان شاد داك البوسط على ما سمعت مسكين جَبرو المرض الخايب و مابقاشي قادر يخدم الله يشافيه
ياسين : و هاد الشيخ معامن ساكن؟ غير بوحدو؟
نورة : ا لا ماشي بوحدو كاينة مراتو معاه و الخدّامات اما ولادو كايكونو مسافرين بسباب الخدمة
أنت تقرأ
زوجة الكولونيل / COLONEL'S WIFE
Romanceهو : تَبْتَغين من غضبي الخمود ... وتأملين أن أضع أصفاد لأسد غيرتي بينما أرى حولك من الرجال حشود ... تستقصي من زئيري الجُمود ... ومن ردود أفعالي الخمود ... بينما تجوبين دروب الفجور بأنوثتك الفاتنة ا ولا تعلمين أن الفتنة أشد من القتل وأن حكم الفتنة هو...
