زوجة الكولونيل / COLONEL'S WIFE

PART 118

شافت بّاها ناض و تحركات من تما بزربة لعند ماماها و ختها لايشوفها في حين فاروق مشا هز داكشي لي جاب عِز و حطو فالطوموبيل .. سند ضهرو عليها و جبد ݣارو من جيبو كايتكيف و يتسنا بوبكر و جواد يخرجو على ود شي خدمة عندهم

كان دماغو مخربق بالمزياان إيلا جا يدير بهضرة جدو و يرد السخرة غادي غير يكبر المشكل خصوصًا أن الغلط حاليا باقي جاي منهم لا من ناحية جدو لي جابو حتى لعندو غير باش يجري عليه و يمرمد بيه والا من ناحية فيروز لي حيدها ليه و هو كايشوف ... أما بخصوص علاش راجل ختو ماكايخليها تشد والو هي بالذات ماشي عائلتو ... كانت هادي حاجة من بين الحوايج لي باقي باغي يهضر فيهم معاه حتى تبرد على الأقل الدعوة و يدوز هاد النهار على خير

سمع صوت الروايض ديال شي طوموبيل كاتقرب و ناض من فوق الطوموبيل كايتحقق من شكون جا ... بان ليه واحد الفورݣو كحل جا وقف قدام الباب ديال الفيرمة و مع طاحت عينيه عليه جمع يديه و مسح وجهو

خشا صبعانو فشعرو كايشوف هادشي لي باقي كايدير فيه جدو
فاروق : اش كايدور عندك فداك الراس و فين باغي توصل

عرفو جاي من جهة جدو كيفما حتى دوك 6 ديال الرجال لي هبطو منو من اللور كانو جايين من جهة جدو ... لاح داك الݣارو زطم عليه و مشا ناحية دوك لي جاب الحاج باش يحضيو الفيرمة بحالا ماكافيينش دوك 3 لي كانو حاطينهم حدا الباب حتى زاد هادو

وقف قدامهم كايحقق فيهم واحد واحد كمامر جدو هدا بااينة للعمى .. مع جا بغا يهضر و هو يسمع صوت الباب ديال الفيرمة كايتحل و خرج جدو بالكرسي المتحرك ديالو

شاف فجدو و نطق بصوت رجولي و باين من تقطيبة حجبانو ماعاجبوش المنوال لي غادي فيه هاد المشكل
فاروق : هادو علاش ا جدي؟ كون عرفت باقي خاص لي يجي يعس الفيرمة كنت نسيفط من دراري لي عندنا لهيه

جمع يدو قدامو فوق ركابيه و نطق بصوت قــاار
الحاج الرحماني : هادوك ا ولدي فاروق دراري ديالكم [ شاف فدوك لي قدامو ] وانا خصني رجال يتصنطو لهضرتي ماشي دراري

ببساطة كان باغي وحدين لي يسمعو ليه غير هو ... يعاودو ليه الشّادّة و الفادّة ماشي لي يكونو من تحت يدين حفايدو ولا ولادو بمعنى ايلا ماقالش ليهم تحركو ماغايتحركوش من بلايصهم

° عــنــدهــا °

كانت كاتعاود تقاد فراش بيتها بحكم جدها غايرجع لبيتو و حداها كانت غزلان لي كاتعاونها و باين فيها فرحانة من رجوع ختها أما هي فالحقيقة كانت مشوشة ... خايفة غير يهضرو معاه و يمشي يعاود لهم داكشي لي ماقالتش ليهم .. خايفاه يقلبهم عليها و هادشي بالضبط لي كايزيد يدفعها باش تصوني عليه تهضر معاه و ترطب معاه بشي طريقة ولكن فنفس الوقت كاتشوف ايلا دارتها غير ماغايزيد يشوف بلي قادر يلوي لها دراعها ... ولكن بلاتي ممكن تهضر معاه بشي طريقة خرا بلا ماتجبد لو هاد الموضوع ... ممكن غير تصوني عليه على الاهانة وصافي