أسماء : [ نطقات لا شعوريًا و عينيها معاهم و ودنيها مع المعزوفة ] سبحاان الله
لمحات عينيها تمثال الحرية لي كانو مصورينو من شي هليكوبتر بلا مايغفلو على تصوير الجزيرة لي كاين فيها أَو الما ديال خليج نيويورك لي ضاير بيه و هو عازلو و عازل ديك المساحة الخضراء لي ضايرة بالنجمة لي كايتوسطها على المدينة .. مربع من العُشب الأخضر لي كانت باينة فيه العِناية الشديدة ليه كيفما باينة حتى فشي شجيرات من اشجار الصنوبر كايطلو على الجهة الشرقية من الجزيرة في حين كانت كاميرا خرا لتحت كاتنقل الحدث و كاتصور داكشي لي كان غير تما ... كانت مجموعة ديال التماثيل من تحت تمثال ليبرتي .. الفنّان لي جسدهم بداك الشكل مزج موهبة النحت فتجسيد الأعضاء و الأطراف ديال الجسد مع موهبة الرسم فرسم الملامح و تلوينهم بشكل رهيـب يخليك تحير واش يد بشرية لي كانت من مور هاد الإبداع .. كاتحسد لي عندهم الموهبة ديال الرسم و التلوين ، ياما شافت هاد الموهبة فالحلويات و كيفاش كايقدرو يشكلو لك بالمكونات ديال الأكل و بعجين السكر مجسمات كايبانو حقيقيين 100% ولكن هنا كانت كاتشوف هادشي على شكل تماثيل هدا لي صايبهم كان كايستاهل سمية فنان عن إستحقاق و جدارة .. فِعلًا كان ساهل تكتاشف بلي هادوك مجرد تماثيل ولكن الرسم لي عتامد عليه فالملامح و التلوين كان فارز فيهم الملامح بحالا راسم لوحة
كانو تما تماثيل لعِدّة شخصيات كانسمعوهم غير فالاساطير الإغريقية بحال أثينا ، أفروديت ، أرتميس ، أورانيا ، إيريس ماكانتش عارفة كل وحدة فيهم بشكل خاص بحُكم ماكانت عندها حتى علاقة بالميثولوجيا ولكن من لباسهم كانو باينين منين هما
عينيها خلّاو دوك التماثيل و خلّاو العازِف لي كايعزف قدامهم و هما وراه و تمركزو على تِمثال واحد جذب إنتباهها بشكل خاص و هي كاتدقق فيه و تعاود مامتيقاش الشبه الكبير لي بينو و بين شخص كاتعرفو مزيان
تلفتات تشوف شكون جالس حداها لقات بقات غير ختيمة
أسماء : [ بإنبهار ] سبحان من خلق من الشبه أربعين
هزات راسها من داكشي لي فيديها و شافت فلوستها
ختيمة : شكون كايشبه لشكون
طَوال هاد الايام لي دازو ماكانتش لاقية شي حاجة تثير إنتباهها حتى لهاد النهار شافت حاجة لي عجباتها
أسماء : العار ا مرات خويا ما شوفي [ شافت فالتلفازة ] و قولي لي واحد التمثال ماكايشبهش لشي وحدة كانعرفوها
شافت فالتلفازة كاتشوف هادشي لي كاتهضر عليه ولكن مابان ليها والو كانت الكاميرا مشات للملامح ديال داك الشخص لي كايبان كايعزف .. قلبات عينيها لأسماء بإستفسار
اشارت ليها بيديها باش تصبر
أسماء : لا لا تسناي شوية راها مشات
ختيمة : شنو غانشوف الله يهديك؟ ماكايبان لي والو
بقات كاتتسنا بفارغ الصبر يعاودو يبينوها حتى لواحد اللقطة و هما يرجعو لها
أسماء : صافي صافيي شوفي شوفي دابا واش شفتيها؟؟
أنت تقرأ
زوجة الكولونيل / COLONEL'S WIFE
Romanceهو : تَبْتَغين من غضبي الخمود ... وتأملين أن أضع أصفاد لأسد غيرتي بينما أرى حولك من الرجال حشود ... تستقصي من زئيري الجُمود ... ومن ردود أفعالي الخمود ... بينما تجوبين دروب الفجور بأنوثتك الفاتنة ا ولا تعلمين أن الفتنة أشد من القتل وأن حكم الفتنة هو...
