وقف قدام الطوموبيل و جبد ݣارو كايتسنا بّاه يسالي ديك لابيل حتى عاود تبعو خوه
مصعب : لا نتا حالك مابقاش عاجبني
جبد البريكة شعل ݣاروه و عينيه مع خوه
عِز : علاش؟!
جبد من جيبو ورقة مكتوبة فيها واحد النمرة و معاها سمية مرا .. مدها لخوه لي شدها و بقا كايقرا فالسمية
مُصعب : شد معاك هادي [ رجع يدو لجيبو جبد حتى هو ݣارو ] هاد خيتي كاتجيب شي دريات صحابات المساج باقيين رمَّانات مغمضات شوف معاها و سير عزل و تخير مع راسك
خشا ليه الورقة فجيب القميجة و نطق بصوت حرش هالكاه بحة الݣارو
عِز : شفتك هاز ليا الهم , دمك حارقك عليا؟ [ طبطب ليه على جيب الشوميز ] شوف معاها ليك و للدراري
رجع جلس نص جلسة فوق الطوموبيل كايسف ݣاروه اما خوه عرفو ماراشقاش ليه عليهم
مُصعب : وا جي بعدا هاد الليلة نقصرو شي قصارة نفوجو فيها
مُراد : [ قرب لجهتهم و شاف فعِز ] شي قصارة غير عندك لهيه بلا داك الصداع و كترة بنادم
مشا وقف حدا مُراد و نطق
مُصعب : اش بان لك؟ نتقاشعو هاد الليلة عندك فالدار؟
زطم على البونتة ديال الݣارو و مشاو عينيه لبّاه لي كان جاي من مور ما سالا المكالمة
عِز : دابا نشوف اش كاين
الحاج المُرتضى : [ وقف حداهم و نطق بصوت رصين ووقور ] صافي فضيتو شغالكم هنا؟
ضور عينيه على الڤيلات لي كايتبناو و هو قاصد بهضرتو غير ولدو مصعب و رجال بناتو
هز كتافو و خشاويدو فجيبو وبصوت ذكوري نطق
مصعب : ساليت انا هنا الواليد شوف معاهم
لحق عليهم سماعيل من مور ما سيفط التصاور ديال السكنة لمراتو مريم باش تشوفها فين وصلات و تشوف المساحة ديالها و الشكل
سماعيل : وا على هاد الحساب صافي مشينا؟
مراد : سير عالله مشينا [ شاف فعِز ] اش درنا؟ صافي نعولو عليك؟ الليل
جبد التيليفون كايشوف شحال الساعة .. النهار كان باقي طويل و باقي عندو فيه مايدار ، شاف فمراد و نطق بصوت رجولي
عِز : نتباشرو تم بالليل
مراد : وا حتى الليل
تحرك من حداهم و هو باقي كايهضر مع سماعيل و كل واحد فيهم مشا ركب فالطوموبيل ديالو خلاوهم غير ب3 .. مع بغا يتحرك و هو يحبسو باه
الحاج المُرتضى : [ شاف فولدو ] عيطو لي نسابك ا ولدي
وقف كايشوف فيه و يسمع لشنو غايقول .. كان باين الموضوع غايكون على الزواج مدام سمَّاهم بنسابو
الحاج المُرتضى : [ بصوت رصين ] خاصنا ا ولدي نشوفو شي وقيتة هاد السيمانة إن شاء الله نطرݣو لعندهم
عِز : كنت دايرهم فبالي الحاج نشوفو فهاد اليوماين ندوزو لعندهم
الحاج المُرتضى : غدا ان شاء الله يلا لقيتي شي وقيتة و نهبطو لتاونات [ جبد تيليفونو ] نعلم الحاج قاسم بمشيتنا غدا
أنت تقرأ
زوجة الكولونيل / COLONEL'S WIFE
Romanceهو : تَبْتَغين من غضبي الخمود ... وتأملين أن أضع أصفاد لأسد غيرتي بينما أرى حولك من الرجال حشود ... تستقصي من زئيري الجُمود ... ومن ردود أفعالي الخمود ... بينما تجوبين دروب الفجور بأنوثتك الفاتنة ا ولا تعلمين أن الفتنة أشد من القتل وأن حكم الفتنة هو...
