° فالـكـويـت °
جالسة فالدار كاترتاح فهاد الويكاند من تمارة ديال لوزين و بالها غير مع هادشي لي كايوقع فلوزين كانت مرتااحة ولكن هضرة ياسين زاادت حتى هي غرزات فيها الشك ... إجهاض آية وموت هاد البنت عاد الشاف اللول لي كان قبل منها و دابا هاد 2 رجال سخفو بالضبط فاش هبطو للاكاف لتحت و بقاو فيه مدة طويلة ... شي كايقول عادي حيت مزموت و مع ريحة الكبريت ماصبروش وشي كايقول غير بسباب قلة النعاس و تمارة لي ضربوها مؤخرا
كادور تشوف كاتلقا حتى واحد ماكايقول بلي هادشي غريب ... كلشي كايشوفو عادي شنو زعما واش غير شاكّة بلا فايدة؟ ولكن فاش شاكة بعدا.؟ فالمجهول؟
حدرات راسها بتعب عيااات من التفكير حاجة وحدة لي عارفاها هِيَ هاد الحالات كاملين لي دازو قدام عينيها جامعاهم حاجة وحدة ولي هي هاد لوزين فين خدامين ... حسات بعرق راسها كايضرب
حطات يديها على جنب راسها كاتحاول تمسدو حتى يسترجع عقلها هضرة آية ... عاقلة بلي فالنهاار اللول قالت شي هضرة ولكن واش صحيحة؟ ماعرفاتش ... واش زعما الشيخ فوزي هادشي كامل لي كايدير معاهم جميل منو؟ كاع هادا خير منو فيهم
راسها ضرهااا بالتفكير راس كايقولها تسول الشيخ فوزي و راس كايقولها اش ضمن لك غايقول الحقيقة؟ ... عياات بالتفكير لي ما مشا بيها فين من غير " خاصها تهضر مع آية فاش تولي مزياان " مدام عندها فكرة عامّة على هادشي
• عـنـدو •
وسط بيت مضروب غير بالسيما فوق الياجور ... كان مكيتيب صغيير و سامپل ديال العود من فوقو كارنيّات و شي وراق فيهم السميّات و الحسابات بجنبهم و كالعادة طفّايتو و باكيتو ديال الݣارو مع بريكتو مايخطاوهش ... جالس هو و مُراد و مُصعَب و سادين عليهم الباب كايشوفو داكشي لي على برّا غير من واحد الجزء فالحيط دايرو ديال الزاج
مُصعَب : الفلوس مابقا لها والو و تجي هادي ديال هاد المرّة غانمشي انا نجيبها [ شاف فخوه و ضحك ] انا كون تخليوني غير مع الزرقة مونامور نولي انا نتعرض لهم تّا باقي خليه لكم
متكي ضهرو على الكُرسي عينيه مع واحد الورقة خاوية قدامو و يديه كايلعب فيهم بالباكيّة ديال الݣارو ... كايتسمع غير طقطقاتها فوق المكتب البسيط لي قدامو
عِز : [ هز عينو فخوه ] زرقتك باقا معطلة يلا فيك ماتتسنا تسناها ولّا يمشي لها مُراد
تعجـب من آخِر المُستَجَدّات
مُراد : علاش؟ واش واقع شي مشكل؟
مُصعَب : [ قطب حجبانو ] ماشي كانت غاتوصلنا هاد ليام؟ اش طرا؟ ياك كانت من المحمدية ديريكت للهنا؟
عِز : ماطاري والو [ لاح الباكيّة قدّامو ] ديك الطريق مابقاش بان ليا فيها [ شاف فمُراد ] قوِّيــنا عليها وديك الخطرة تفاهمنا ديرو النوبة فالطرقان ماتشدوش طريق وحدة و تورركو عليها
أنت تقرأ
زوجة الكولونيل / COLONEL'S WIFE
Romanceهو : تَبْتَغين من غضبي الخمود ... وتأملين أن أضع أصفاد لأسد غيرتي بينما أرى حولك من الرجال حشود ... تستقصي من زئيري الجُمود ... ومن ردود أفعالي الخمود ... بينما تجوبين دروب الفجور بأنوثتك الفاتنة ا ولا تعلمين أن الفتنة أشد من القتل وأن حكم الفتنة هو...
