فيروز : صباح الخير [ كاتحك عينيها ] شحال الساعة؟
- [ شدات الكراطة بيديها موقفاها مع الحيط ] 4 ونص ديال العشية كنت باغا نفيقك ا لالة وايني مابغيتش نصدعك ونتي عيانة
فيروز : [ واقفة شادة فالحيط و كاتقلب بعينيها عليه ] وشكون تينا؟
رحمة : انا رحمة [ تحركات بالخف تجيب لها شي حاجة ] جلسي رتاحي ا لالة [ هزات صاشي ديال الدوا وعطاتهم لها ] هادو خلاهم لك عزيزي قبل مايمشي صبري عليا غير شوية نحط لك الغدا تغداي
شدات ديك الساشي ومشات بخطوات بطيئة مُجهَدة حتى وصلات لديك الكاناپي لي كاينة حدا الجِدار الزجاجي .. شادة فيديها دوك الكارطونات ديال الدوا وكاتقرا فيهم ديالاش
فيروز : [ نطقات بسُخريّة ] مرضني و داويني
رحمة : قلتي شي حاجة ا لالة؟
فيروز : لا لا ا ختي رحمة [ حطات الساشيات و جمعات رجليها هازاهم من فوق الكاناپي و مرجعة راسها اللور متكية باغا ترتاح ] عطيني كاس دمّا نݣووز بيه هاد دوا يرحم باباك
رحمة : لا لا ا لالة غايهلك لك المعدة ديالك خايب عليها ماتشربيهش على الخوا هانا غادا داابا دااابا نسخن لك الغديوة تغداي و شربيه
فيروز : [ غمضات عينيها و حركات راسها بلا ] غا بلا مادعدب راسك والله مافياشي و ماعندو ماين يݣوز
رحمة : يوا لاواه ا لالة كولي غير شوية بعدا ردي النفس فيك تلقاي غير الجهد باش توقفي
حلات عينيها وتقادات فالجلسة قلبها مرروع عليها
فيروز : ريحة الماكلة اتغيلفني وكرشي ماقادشي على شي حاجة تقيلة والله عطيني غا الما
رحمة : ايوا تسناي نقاد لك غير شي حاجة خفيفة ونجي نقولك وقيتة دوك دوايات
أومأت ليها براسها بواخا ... مافهماتش هاد بنادم واش مريض؟ ولا فيه شي مشكل؟؟ ولا سبحاان الله هاد الضمير عندو ماكايخدم حتى كايدير لي دار وماعرفاتش أساسًا فين تقدر تصنفو
حتى بغات تمشي توجد ليها شي حاجة خفييفة و هي توقفها
فيروز : فيواخ خروج؟ وفيواخ تينا جيت؟
رحمة : [ ضارت لعندها وكراطتها و سطل الجفاف فيديها ] غير انا جيت ا لالة و عزيزي خرج قولي جوايه ديك 12 بحال هكاك وايني قال غايرجع مع ديك 9 ولا ل10
فيروز : [ هزهزات راسها بتعب و مبرزطها نيفها المخنوق ] وماين اصلك ا اختي رحمة؟
رحمة : من دوار إيمرنيسن
حركات لها براسها بمعنى فهمات وخلاتها تمشي تقضي شغالها اما هي جلسات فبلاصتها مكمشة على راسها ومربعة يديها .. قالبة راسها للجردة كاتتفرج فيها
× عـنـد فـاروق ×
متكي فوق البياص و شاد فيديه التيليفون من مور مادخلوه لو خزنة ... كان عاارف البارح ختو رجعات لعند عائلة بلحاج ، عاارف بلي البارح عاودو لها العرس و ردوها ليهم و المقوودة ݣاع هي عاودو رجعو داك عهد الصلح بيناتهم ولا كي سماه طارِق " التحالف بين العائلتين " بحال شي جوج دول دخلو فمعركة دَموية وتحاربو حتى تحاربو وفالأخير تاحدو فإتحاد شبيه بالإتحاد السوفيتي بين عائلة الأنصاري وبلحاج
أنت تقرأ
زوجة الكولونيل / COLONEL'S WIFE
Romanceهو : تَبْتَغين من غضبي الخمود ... وتأملين أن أضع أصفاد لأسد غيرتي بينما أرى حولك من الرجال حشود ... تستقصي من زئيري الجُمود ... ومن ردود أفعالي الخمود ... بينما تجوبين دروب الفجور بأنوثتك الفاتنة ا ولا تعلمين أن الفتنة أشد من القتل وأن حكم الفتنة هو...
