صغيرة ال حمدان

البارت الثالث

مساء الخير حبايبي🖤شويه تفاعلكم ترى القصة مجرد بدايات وبعدها المواقف القوية جاية وحرامات تنظلم بهيج تفاعل💔

(صغيرة ال حمدان)
للكاتبة روشان

البارت الثالث

خالد:طلعت بالسيارة كلت خل اروح لام سعد ومناك اطلع لابوي وهي قريبة علينا بعد فرعين بينا
وصلت يم بابهم ونزلت دكيت الباب شوي وطلع ابنها الصغير
حمدت الله ما طلعت هي حتى افلت بسرعه وما تضل تاخذ وتنطي وياي
كتله يابه خل الوالده تروح لبيت حمدان ابو عباس
يردونها هناك الجماعة
وعفته وطلعت رحت للمعمل ولكيت ابوي هناك والولد كلهم حتى ولد عمي
رحت للغرفه الي بيها كعده ابوي وسوالف الحسابات والشغل مثل المكتب يعني
كعدت اسويلهم القياسات مال بعض الشغلات عدهم الي يواجهون بيها صعوبه وبطريقي سويت تصاميم غرف وقنفات وطاولات حلوه وشي جديد يشبه الي اشوفهن ببغداد وانا كوني دارس هندسة ورسم فجانت التصاميم سهله عليه
شافهن ابوي وتعجب بيهن وصاح العمال المسؤولين عالتنفيذ كالهم تكدرون تنفذون هيج شغلات؟؟
عجبتهم فكره التصاميم الجديده وكالو اي عمي نكدر
وين جنت عنا يالمهندس عاشت ايدك هالشغل راح يطلع شي كلش حلو وحتى المحلات الي نوزعلها راح يعجبهم

خالد:الفضل الكم انتم راح تشتغلوها ما سويت انا بس شي بسيط

راحو العمال والتهيت ويا ابوي والولد شوي وكبت العيطة برا المعمل وطلعنه نتراكض
لكينا عمال ثنين جاي يتعاركون و واصله بينهم للستار والولد يردون يفكونهم من بعض وما يكدرون

صرخ ابوي بصوت عالي
وهم هدو بعض جانو كلش يحترمو ا العمال

حمدان:شنهي السالفة تخبلتم ،عندي شقاوچيه انا بالمعمل وما عرف لو شارع ابوكم هذا وتتمالخون بي على كيفكم
ما خليتم احترام لجبير البكان ،امشو من وجهي ماريد اشوف جهرتكم امشوووو

-صرخ ابوي وهم تراكضو من وجهه
الحلو ب ابوي ما سألهم ولا راد يعرف الي بينهم هم احترام لخصوصياتهم كدام باقي العمال وهماتين ينتضر نفسه يبرد حتى يكدر يحكم بينهم ،وهيج ماخذ امور حياته خاصه هو صار رجال معروف بهالمنطقة والكل تهابه وتصيحله شيخ حتى لو مو من عشيرته هم لانه شخص عادل ودايما يحكم بينهم بالحق والناس كامت ترجعله اذا عدهم مشكله ويا احد واذا احد راد يعرس واهل البت ما انطو يجي لابوي يتوسطله لنه جبير ويحترمو والي عنده دين يم احد او عليه دين همات يدفعهن ابوي وهو يقسطهن اله براحته والماعنده يساعده وينطي ،ابوي يمكن اجه بلايا سند ولا اهل بس هو كبر روحه بروحه وخله اله قدر وحشيمه بديرته.

ورا ما فضت الهوسه اجه هذال صاحني
-عمي عمي يردوك عالتلفون

-رحت جان الخط مفتوح
الو
-ها وليدي
-هلا يمه امريني
-ما يأمر عليك ظالم يمه ،بس صديقك مروان اجه اليوم وما رضى يدخل للبيت