مساء الخير يا ورود🌷🖤
متدرون شكد تعبت بهالبارت من البارحة اكتب بي الله شاهد حتى نفسيتي تعبت وياه ،الله لا يضوك احد مر الفقد والفراك 🖤
بعدني ممراجعة البارت لان طويل
(صغيرة ال حمدان)
للكاتبة روشان
البارت الثالث والثلاثون
سوله بواهسي مشغول افكر بيك
يمكن ها اجه ،ها راح ،ادورنك
اتعنه المجان البي كعدت وياك
ما الكاك ،بس رايد اثر منك
بلجن كلمه ضلت ما نكلها الريح
الكاها وتجاوب بالنشد عنك
لو ادور عطر منك بقى اعلى الكاع
احط نفسي عليه افيييش اشمنك
اجدامي من النشد دوخن راس الكاع
يدورن اثر منك بي يتبعنك
بويه ،عكده براس فكري كلي احلها شلون
ائيس لو اضل للموت انطرنك
هذال: وك شلوووون مو يمكم ويين راح من الصبح ادك عليه وما يجاوب وهسه انت تكلي من الصبح طلع من عدنا ،، چا وين يرووووح لخاطر محمممد
يلا روح روح انا طالع اشوفه بالمكتب ،اذا دك عليك خله يخابرني كله هذال رح يطلع روحك بس يشوفك ،
سديت الخط وانا انافخ وراسي يريد ينفجر من التفكير ،من الصبح وانا بالدوام ادك على جواد الي بايت برا ابيت صديقة وهو ماكو وتلفونه مرة مشغول وبعدين كام يطلع مغلق وخلاني افور واتخبل وعلى هالحال طلع الدوام علي ابتلاء وماعولت شوكت اخلصة وارد للبيت حتى اشوف وجه ربي وادور جواد وين صار
والي حرك كلبي بالزايد من خابرت صاحبه وكلي من الصبح طلع من عندي هالنوب خله روحي تفور ،
باوعت جيلان وسرى كبالي يباوعون بقلق وجيلان عيونها حمر ارد اسال واعرف البيها بس گلبي لاجمني على اخوي والدنيا كلها طالعة من عيني ،
جيلان: بقينا ساكتين لحدما خلص مكالمته واني وسرى وحده عينها عالثانيه والتوتر عم علينا ،لحد ما غلق الخط وسالته سرى
سرى: هذال منو هذا الماكو ؟!!
هذال: فركت راسي بتوتر وكلت
جواد ماكو من الصبح مختفي وتلفونه مغلق
سرى: يممه عزه العزاني وين راح اخوي
هذال: ماااادري مادري حتخبل ولكممم ماله اثر ،،حجيت الكلمة وكعدت عالدرج وانا اجر النفس بالكوة
جيلان: حسيت بنغزه بگلبي من كال هالكلمة وماعرف ليش اتذكرت من دعيت على فلك بحركة گلب وكلتلها الله يحرك كلبج ،لزمت كلبي الي انعصر واحس وجهي وملامحه كلها انعقجت وبداخلي اتوسل بربي،
فدوه رحتلك ربي مو جواد مو جواااد ولا اي احد بولدها والله مقصدت تحرك كلبها بيهم
ربي رجعه سالم غانم النا والله جواد طيب وميستاهل اذية
احس النفس صار طابوكه بالكوة يصعد وينزل مو نسمة هوى خفيفه، شويه وكام هذال بسرعة
سرى: وين رايح !؟
هذال: رايح للمكتب الي يشتغل بي ويا جماعته
سرى: زين ماخابرتهم
هذال: ماعندددي ارقامهم ،حجيتها الكلمة بعصبية وطلعت بسرعة ركبت السيارة وطلعت طاير حتى الطريق ما اشوفه من السرعة ،
أنت تقرأ
صغيرة ال حمدان
Ficción Generalيُهزم المرء بأشيائه التي يحبها يُهزم بالاشياء التي التفت روحه حولها بما كان يظن انه باقي ،لكنه رحل بما كان يضن انه مصدر قوته ،لكنه اصبح نقطة ضغف رواية عراقية حقيقية (تتراوح احداثها بين الجنوب وبغداد)عن عائلة كاملة واكثر من جيل عائلة قوية ومترابط...
