بارت حلو لعيونكم اعرف هسه مشغولين ويا بنات طه 😂😍وريومة منزلة البارت
بس بردو كلبكم ويا هالبارت اليوم وانطلقو وياي يلا 😍
وهم غلسو عالاخطاء ممراجعه🙈لان اذا اراجعه اتأخر عليكم
(صغيرة ال حمدان)
للكاتبة روشان
البارت التاسع عشر
كم هو مؤلم
ان تعيش حلم...
وانت تعلم انه وهم..لا تستطيع التخلص منه
ولا تستطيع تحويله الى واقع تعيشه
كم هو مؤلم؟؟
خالد:جبتها ساعات وايام وشهور احسبلهن يوم يوم وانا ادري بيها احلام
وانا ادري بيها جذبات بس مقنع روحي بيها
ادري هي ما ترجع ،وادري انا عايش ويا خيالها ،ادري بغزالتي عايشه بگلبي مو بعيوني
بس اكذب روحي واكولن اهي كاعدة كبالي
وبكل يوم اكضي وياها الساعات وما اشبع ،اجيب اكلي واكعد يمها اكله واتخيل عيونها تباوعلي وتضحك مثل من جانت تسويلي الاكل وتنتظر اكلها شكد طيب حتى تفرح
اكعد وياها ساعات ليلية اتسامر وياها وساعات اقرالها القرآن والدعاء
ساعات التهي ازرع ورد يمها وساعات احجيلها حبي وشكد مشتاگ اضمها لگلبي واشم ريحتها الترفة
ساعات اشكيلها ضيم گلبي ولوعاته وشلون انحنى ظهر شاب كل عمرة ٢٧ سنة بغيابها ووجعها العافته بيه
اصفن واكول شلون هالناس تطفى نارها بفراك التحبهم چا انا ليش نار گلبي تسعر وما خفتت ابد
ليش حسها بعده يمر بكل لحظه لاذني
واحسبلها يوم يوم من يوم النامت بي جوة تراب وكطعت انفاسها وعافتني مكطوع النفس وانا فوك التراب
هوى الله هواي بس مو ياهو اليجي يكدر يشمه
مرات رياتك يشتغلن وتتنفس عدل بس الي تحسه بدنياك
مثل واحد غركان وهو يعرف يسبح وسباح زين همات
بس الذبوك بالمي علگو برجولك سبايك حديد
وانت تتلوه حتى تطلع وتجر النفس وما تكدر
اليوم انا يمج من الفجر يبعد النظر واهله صار ٧ شهور و26 يوم وساعتين على فراگج
الورد خضر وفتح وانتي على نومتج باقية
تعرفين يغزالتي
جاي احاجيها واسكي الورد وانظف الگبر وكاعد بصفها بالمكان الحجزته الي
تعرفين انا اتمنيت لو ما اتزوجتج من الاول،تعرفين بكل شهكة عليج اكولن انا السبب
انا كعدتج بهالبيت الخذاج مني ،لو اني مخليج غزاله تتهافتين كدام ناظري من بعيد واشبع بشوفتج سنين وسنين ولا خذيتج ورحتي مني وانا رويحتج بعدها بنفسي باقية
حسيت بأيد اتخلت على چتافي رفعت راسي بثكل وباوعت شفته رجال يطلع عمرة ب٥٠
باوعلي بابتسامة هادية وكال
الرجال: كلما امر هنا بكل شهر اشوفك بمكانك ،شنو يابويه ماعندك بيت
خالد: رديتله بحسرة
هذا بيتي هنا اشرتله على گبرها
ضحك الرجال
الرجال: بعدك صغير يبوية ومو هنا مكانك ،بعدك ماشفت الدنيا شكبرها وما شفت وكعاتها الثكيلة
وچنها هاي اول طسة بحياتك
خالد: مو اول وحده ،بس اول مرة افگد روحي
الرجال: عندك اهل ؟
خالد: رديتله بتعب ،ايييي
جر نفس الرجال وكعد متربع بصفي وبدا يحجي
الرجال : انا فد بيوم جنت كدك شاب وزاهيتلي الدنيا وجنت كبران على عشگ الطفوله تعرفه هذا يبويه؟
مجرب احساس شلون يكبر حبك وياك وتقيسه شبر شبر وتباوعله جنه دنيا بكبرها كدام عيونك
انا هيج اعشكت وحدة جنت جاهل ودك گلبي الها وعرفت الحب شنو
وكبرنا وحلت بعيوني وخطبتها وطردوني اهلها
ورجعت مرة ثانيه وثالثة وعاشرة وجبتلهم شيوخ الديرة كلها وبطلعان الروح خذيتها منهم
وصارتلي كلشي والله رزقني منها بولد ثنين جنة لحياتي صارو وعشت وياهم وربيتهم احسن تربيه وجانو نعم الخلفة والدنيا كلها تحمد بيهم
أنت تقرأ
صغيرة ال حمدان
General Fictionيُهزم المرء بأشيائه التي يحبها يُهزم بالاشياء التي التفت روحه حولها بما كان يظن انه باقي ،لكنه رحل بما كان يضن انه مصدر قوته ،لكنه اصبح نقطة ضغف رواية عراقية حقيقية (تتراوح احداثها بين الجنوب وبغداد)عن عائلة كاملة واكثر من جيل عائلة قوية ومترابط...
