صغيرة ال حمدان

البارت التاسع والاربعون

اسفه حبايبي عالتأخير بس الكهرباء شلعت كلبي😭
بعدني ممعدلة البارت🖤

(صغيرة ال حمدان)
للكاتبة روشان

البارت التاسع والاربعون

بدينه بشوك لعيونــك #بدينه
ولك تشتاك روحي مو #بدينـه
احلفك بالله وبشرعــه #وبدينه
انا بهل الدنيا غيرك منهو اليه !!!

جيلان: انحضنت بقوة من ورى ومن الصدمة والخوفة حسيت لساني بلحظتها انعكد ويا ما ردت اصرخ سمعت همساته بأذني

هذال: احببببج يا روح وعشگ هذال ودنيته كلها
وج اموت وما اخليه ياخدج مني ،انتي الي وما اضيعج مرة ثانية لو على جنازتني ،

جيلان: كل كلمة سمعتها بصوته مو بس خلت جسمي يخدر ،
خلت كل قطرة دم تجري بيه هي الي تخدر ،كمت اغمض وافتح بعيني
شبيه يا ربيييي ،اكو بشر يحلم هو واكف وهالنوب طالعة من الحمام يعني مصحصحة ،لا اكيد مو حلم جاي احس بدفو جسمه
وانفاسه الي يم اذني دنكت راسي وشفت ايده الي ملفوفة على بطني وحاضني منها بقوة ،رغم جانت الغرفة ظلمة بس الضوى الجاي من ورا البردة الواكفين احنا وراها جان كافي حتى اشوف بوضوح

وهو بقى ساكت بس انفاسه التعبانه جاي تترنح يم اذني ،

مديت ايدي الثنين على ايده وهو حاضني، طخت ايدي بيده ورجفت كلني وشهكت بأنفاسي ،
كمت اتنفس بسرعة ومجاي اصدك روحي ولا مصدكة الموقف هذا لازمة ايده وهم اكول مو حقيقة ،لحد ما حجى بثكل وهدوء

هذال: حبيبي ! احجي لا تسكتين

جيلان: حجاها وفرني لوجهه وصارت عيوني بعيونه ،
اول ما شفته وهو هيج قريب ردت ابجي ،بلعت ريك وحاولت ما اطلع الدمعة واني اباوع لتفاصيل وجهه الي احبهن وابتسامته وحتى عيونه جانت مبتسمه

حركت ايدي بهدوء وصعدتها لوجهه ولزمت وجهه ناحية لحيته
واني اباوع بعيونه وهو ينتظر كل حركة مني ،حجيت برجفه
انت صدك؟! يعني مو حلم ،
حجيتها وبرطمت وفقدت السيطرة على دموعي ورجعت كلت بصوت مهزوز ،
حتى لو حلم ما اريد اكعد منه ،،

رفع ايده الجانت حاضنتني ولزم وجهي بيهن وكام يمسح بدموعي وهو عيونه مليانه تعب وحجى

هذال: هسسس ،مو حلم مو حلم والله ،انا هنا يمج ،
حجيتها وانا گلبي جاي يرجف وا جاي يدك ،واحس الدنيا كلها تسمع صوت دكاته ورجفته ،وانا لازم وجها بيدي وامسح بدموعها الي من تنزل احسها تيزاب ويقطر على گلبي

جريتها الي وبستها بلهفة من كصتها وبقيت مطول بالبوسة وحتى الخاولي الجانت لافته على شعرها وكع وانفتح شعرها الجان مخربط ويقطر مي ،
جريت انفاسي منها بقوة وبعدت شفتي عن كصتها ،
ورجعت لزمت ايدها الثنين وكمت ابوس بيهن من وحده لوحدة
وانا عيوني عليها وابتسامتي شكت حلكي ،