صغيرة ال حمدان

البارت الثامن والثلاثون

مساء الخير حبايبي
هذا بارت هدية لعيونكم ولكثرة طلباتكم ما حبيت اردكم واعوفكم لباجر، واقتنصت الفرصة بالكوة حتى بس ابرد گلوبكم حتى لو جان البارت قصير 😘
بعدين ارجع اعدله

(صغيرة ال حمدان)
للكاتبة روشان

البارت الثامن والثلاثون

وين تريد توصل يا زمن وياي
اطخلك راس تحلم وأخضع شحدي
ما احتاج كصبه من أعزف على الناي
بيه أحزان تطلع حتى بالبردي
وأفوت بزود جرحي معاند أكبر سيف
واني بكيفي أنتهي وبكيفي من ابدي
يجرحني الزمن واستصغره بملكاي
وأستخطيه واكول صغير مو كدي

هذال: اخذها كدام عيني طلعت ببدلتها الجنت اتخيلها بيها بصفي ولازمة ايدي وعيونها تلمع بحبي ،،جنت طالع ردت انهزززم يانااس ردت انهزم وما اشوفها مزفوفه لغيري ،طلعت بالسياره بس احس كلشي بيه جمد وانا واصل لراس الفرع وكفت السياره وبقيت كلشي بيه بهت وما يقبل يروح اكو صوت جواي يكلي شوفها ،،،شوفها هذال شلون انزفت لغيرك حتى تكرها حتى تنساها حتى تبقى صورتها بعيونك وتبقى سجينتها بگلبك وما تسحبها حتى لا تنسى الوجع فد يوم حتى تدوووس على گلبك وتضربه بالقندرة اذا حن الها ،،

جنت واكف بمكان بين سيارتين وزرع نازل عالسيارات بحيث سيارتي ما تبين ،بقيت انتضر وانا سمعت صوت المزيقه غمضت عيني وابتسمت نص ابتسامه وشردت بخيال عقلي الي اتخيلها بيدي هسه وانا العريس
جان المفروض هذا اناااا بس اااخ من عبادك يالله شياطين وتمشي عالكاع ،خذوها مني وخلوها بيد واحد ثاني ،
طلعت كبالي زفتها ومشت وخذت انفاسي وياها
بس ليش مبتسسسم شبيييه انا شبييه ليش مبتسم
وانا كل شبر مني جاي يتكطع ،،والخنكة ترستني من راسي لرجلي
فرغ الشارع الجان مليان بسياراتهم
ورديت انا للبيت لن حتى السياره ماكدر اسوقها من الوجع ،،فتت للبيت لكيت ابوي وجديتي كاعدين بالحديقه ،عفتهم ومشيت كبل بدون ما اندار حتى ماعرف ابوي شحجى وياي كلشي ما افتهمت ،اساساً مادري انا وين بس الي اعرفه انا برا الدنيا ،،
صعدت لغرفتي ونزعت ملابسي بقيت بس بالشورت احس نار مشتعله بكل جسمي بقيت يا متمدد يا واكف يم الشباك يا اتمشى بالغرفة وجكارتي ما فاركت ايدي وشفتي مو ساعات لا ،،
صارن سنين علي ولا جنهن ساعات معدودة ،،اباوع للغرفة ماجاي يصفى الهوى بيها الدخان تارسها لان جكارة ورا الثانية احرك بالجكاير وانا داخلي صاير رماد
كمت ما اباوع للساعة بس صار الليل ماعرف ساعة بيش واندكت الباب ،لبست الفانيلة النص الردن الجنت مخليها يمي وكلت تعال

سرى: دخلت يمه ،وريحة الغرفة تخنك بكل معنى الكلمة حتى صدري قبط وكمت اكح ،
رحت يمه جان كاعد وعيونه حمر ورافع حاجبه بس مو بعصبيه ،لا جان رافعة بوجع
گلبي اتكطع الف وصله عليه وانا ماجنت رايده اروح لا انا ولا جواد بس هو الي جبرنه وكال روحو وماريد احد يكول مقهورين ،،
وانا جاي اطلع بيومها ارد اروح لبيت عمي ، اجه يمي وانطاني تلفون ايفون جان صغير ومد ايده الي دون ما يباوع بوجهي
وكال اخذيلها صور ،،هو حجاها وانا كلبي انمرررد مرد عليه
ارد اكله لييش؟! وشتسوي بيهن بس مو هذال الينحجي ويتناقش وياه
اخذته منه وطلعت ،رحت لجيلان اول ما شفتها دمعت ماعرف على حال اخوي لو حالها الصارت بي وجبرها تعوف كل حلم جانت تحلم بي واولهن هذال الي بيوم جان الهوى الي تتنفسه،،